പരീക്ഷയില്ല, 10th യോഗ്യത മാത്രം; കേന്ദ്ര സർക്കാർ ജോലി നേടാൻ സുവർണാവസരം

കേന്ദ്ര പ്രതിരോധ മന്ത്രാലയത്തിന് കീഴിലുള്ള പൊതുമേഖലാ സ്ഥാപനമായ യന്ത്ര ഇന്ത്യ ലിമിറ്റഡ്, വിവിധ ഓർഡനൻസ് ഫാക്ടറികളിലായി ഏകദേശം 3979 അപ്രന്റീസ് ഒഴിവുകളിലേക്ക് അപേക്ഷ ക്ഷണിച്ചു. സ്കിൽ ഇന്ത്യ മിഷന്റെ ഭാഗമായി നടത്തുന്ന ഈ റിക്രൂട്ട്‌മെന്റിൽ ഐടിഐ (ITI) കഴിഞ്ഞവർക്കും അല്ലാത്തവർക്കും (Non-ITI) ഒരേപോലെ അപേക്ഷിക്കാവുന്നതാണ്. ആകെ ഒഴിവുകളിൽ 2843 എണ്ണം ഐടിഐ വിഭാഗത്തിലേക്കും 1136 എണ്ണം നോൺ-ഐടിഐ വിഭാഗത്തിലേക്കുമാണ് മാറ്റിവെച്ചിരിക്കുന്നത്.

യോഗ്യതയും പ്രായപരിധിയും
നോൺ-ഐടിഐ വിഭാഗത്തിലേക്ക് അപേക്ഷിക്കുന്നവർ പത്താം ക്ലാസ് (Madhyamik) കുറഞ്ഞത് 50 ശതമാനം മാർക്കോടെ വിജയിച്ചിരിക്കണം. കൂടാതെ കണക്ക്, സയൻസ് എന്നീ വിഷയങ്ങളിൽ ഓരോന്നിനും കുറഞ്ഞത് 40 ശതമാനം മാർക്ക് നിർബന്ധമാണ്. ഐടിഐ വിഭാഗക്കാർ പത്താം ക്ലാസ് 50 ശതമാനം മാർക്കോടെ വിജയിച്ചിരിക്കണം എന്നതിനൊപ്പം ബന്ധപ്പെട്ട ട്രേഡിൽ എൻസിവിടി (NCVT) അല്ലെങ്കിൽ എസ്‌സിവിടി (SCVT) അംഗീകരിച്ച ഐടിഐ സർട്ടിഫിക്കറ്റും ഉണ്ടായിരിക്കണം. അപേക്ഷകരുടെ പ്രായം 14 വയസ്സിനും 35 വയസ്സിനും ഇടയിലായിരിക്കണം. സംവരണ വിഭാഗക്കാർക്ക് സർക്കാർ നിയമപ്രകാരമുള്ള പ്രായപരിധി ഇളവുകൾ ലഭിക്കുന്നതാണ്.

തിരഞ്ഞെടുപ്പ് രീതിയും ശമ്പളവും
ഈ തസ്തികകളിലേക്ക് അപേക്ഷിക്കുന്നവർക്ക് രേഖാമൂലമുള്ള പരീക്ഷ ഉണ്ടായിരിക്കില്ല. അപേക്ഷകരുടെ പത്താം ക്ലാസിലെയും ഐടിഐയിലെയും മാർക്കിന്റെ അടിസ്ഥാനത്തിൽ തയ്യാറാക്കുന്ന മെറിറ്റ് ലിസ്റ്റ് വഴിയാണ് തിരഞ്ഞെടുപ്പ് നടക്കുന്നത്. മെറിറ്റ് പട്ടികയിൽ ഉൾപ്പെടുന്നവർക്ക് ഡോക്യുമെന്റ് വെരിഫിക്കേഷനും മെഡിക്കൽ പരിശോധനയും ഉണ്ടായിരിക്കും. തിരഞ്ഞെടുക്കപ്പെടുന്നവർക്ക് പരിശീലന കാലയളവിൽ പ്രതിമാസം നിശ്ചിത തുക സ്റ്റൈപ്പൻഡായി ലഭിക്കും. നോൺ-ഐടിഐ വിഭാഗക്കാർക്ക് ഏകദേശം 8200 രൂപയും, ഐടിഐ വിഭാഗക്കാർക്ക് 9600 രൂപയുമാണ് ലഭിക്കുക.

അപേക്ഷിക്കേണ്ട വിധം
താല്പര്യമുള്ള ഉദ്യോഗാർത്ഥികൾക്ക് ഔദ്യോഗിക വെബ്സൈറ്റായ www.yantraindia.co.in വഴി ഓൺലൈനായി അപേക്ഷിക്കാം. 2026 ഫെബ്രുവരി 1 മുതൽ അപേക്ഷകൾ സ്വീകരിച്ചു തുടങ്ങും. അപേക്ഷ സമർപ്പിക്കേണ്ട അവസാന തീയതി 2026 മാർച്ച് 3 ആണ്. പൊതുവിഭാഗക്കാർക്കും ഒബിസി വിഭാഗക്കാർക്കും 200 രൂപയാണ് അപേക്ഷാ ഫീസ്. എസ്സി/എസ്ടി, സ്ത്രീകൾ, ഭിന്നശേഷിക്കാർ എന്നിവർക്ക് 100 രൂപ നൽകിയാൽ മതിയാകും. അപേക്ഷിക്കുന്നതിന് മുൻപായി ഔദ്യോഗിക വിജ്ഞാപനം പൂർണ്ണമായും വായിച്ചു മനസ്സിലാക്കേണ്ടതാണ്.