കളിക്കാനും കളിപ്പിക്കാനും അറിയാവുന്ന താരം; ലോകകപ്പ് മെസിക്കെന്ന് കെ സുധാകരന്‍

കണ്ണൂര്‍: ഇത്തവണത്തെ ലോകകപ്പ് മെസിയുടേതാണെന്ന് കെ പി സി സി അധ്യക്ഷന് കെ സുധാകരന്‍ പറഞ്ഞു. അദ്ദേഹം ആ കപ്പ് അര്‍ഹിക്കുന്നുണ്ടെന്ന് സുധാകരന്‍ പറഞ്ഞു. എതിരാളി ഫ്രാന്‍സ് ആയതിനാല്‍ കടുത്ത മത്സരമുണ്ടാകുമെന്നും പക്ഷേ, കളിക്കാനും കളിപ്പിക്കാനും അറിയാവുന്ന താരമാണ് മെസിയെന്നും സുധാകരന്‍ കൂട്ടിച്ചേര്‍ത്തു.

ഇത്തവണ ബ്രസീലിന് തിരിച്ചടിയായത് ടീമില്‍ കൂട്ടായ്മ ഇല്ലാത്തതിനാലാണ്. ലോകം ഏറ്റവും കൂടുതല്‍ പ്രതീക്ഷയോടെ കാണുന്ന മത്സരമാണ് ഫ്രാന്‍സും അര്‍ജന്റീനയും തമ്മിലുള്ളത്. ലോകത്തെ എല്ലാ ഫുട്‌ബോള്‍ ആരാധകരും ആദരിക്കുന്ന താരമാണ് അര്‍ജന്റീന. അദ്ദേഹം വിരമിക്കല്‍ പ്രഖ്യാപനം നടത്തിയ ലോകകപ്പ് മത്സരം കൂടിയാണിത്. അതുകൊണ്ട് ഈ മത്സരത്തിന് ഒരുപാട് പ്രത്യേകതകളുണ്ട്. ഇനിയുള്ള ഫുട്‌ബോള്‍ ലോകകപ്പില്‍ അദ്ദേഹം ഇല്ല എന്നതാണ് ലോകത്തെ ഫുട്‌ബോള്‍ ആരാദകരുടെ ദുഖം.

ഈ ലോകകപ്പ് മെസിയുടേതാണ്, അദ്ദേഹം അത് അര്‍ഹിക്കുന്നു. അര്‍ജന്റീന വിജയിക്കണം. ഫ്രാന്‍സിലെ എംബാപെക്ക് കപ്പ് ഉയര്‍ത്താന്‍ ഇനിയും അവസരമുണ്ടെന്നും സുധാകരന്‍ കൂട്ടിച്ചേര്‍ത്തു. ഇതിനിടെ അര്‍ജന്റീനിയന്‍ ടീമിന് ആശംസകളുമായി പി സി വിഷ്ണുനാഥ് എം എല്‍ എയും രംഗത്തെത്തി. ഖത്തര്‍ ലോകകപ്പിന്റെ കിരീട പോരാട്ടത്തിനു ഇന്ന് രാത്രി ലുസൈല്‍ സ്റ്റേഡിയം വേദിയാവുകയാണ്..

ഒരു പക്ഷേ തന്റെ കരിയറിലെ അവസാന ലോകകപ്പില്‍ ഫുട്‌ബോളിന്റെ മിശിഹായ്ക്ക് വിശ്വകിരീടത്തില്‍ മുത്തമിടാന്‍ പൊരുതാനുറച്ച് കളത്തിലിറങ്ങുന്ന അര്‍ജന്റീനിയന്‍ പടയ്ക്ക് എല്ലാ വിധ ആശംസകളും നേരുന്നെന്ന് പി സി വിഷ്ണുനാഥ് ഫേസ്ബുക്കില്‍ കുറിച്ചു.

അതേസമയം, ലോകകപ്പ് ഫൈനലില്‍ ഇന്ന് വാശിയേറിയ പോരാട്ടമാണ്. മെസി ഇത്തവണ ലോകകപ്പ് നേടുമോ എന്നാണ് ആരാധകര്‍ ഉറ്റുനോക്കുന്നത്. മെസിയുടെ അവസാനത്തെ ലോകകപ്പാണെന്ന പ്രത്യേകതയും ഇത്തവണയുണ്ട്.

English summary

KPCC president K Sudhakaran Says this year's World Cup belongs to Messi