നാരങ്ങാത്തൊലി ഇനി കളയേണ്ട! അടുക്കള മിന്നിക്കാൻ ഇതാ 5 കിടിലൻ വഴികൾ
നമ്മളിൽ ഭൂരിഭാഗം പേരും നാരങ്ങ പിഴിഞ്ഞ ശേഷം അതിന്റെ തൊലി കളയാറാണ് പതിവ്. എന്നാൽ ഈ നാരങ്ങാത്തൊലികൾക്ക് അടുക്കളയിൽ ഒട്ടനവധി ഉപയോഗങ്ങളുണ്ടെന്ന കാര്യം പലർക്കും അറിയില്ല.
ഇവയിൽ ധാരാളമായി അടങ്ങിയിരിക്കുന്ന പ്രകൃതിദത്ത എണ്ണകളും സിട്രിക് ആസിഡും കറകളും എണ്ണമയവും നീക്കം ചെയ്യാനും ദുർഗന്ധം മാറ്റാനും സഹായിക്കുന്നു. രാസവസ്തുക്കൾ അടങ്ങിയ ഉൽപ്പന്നങ്ങൾക്ക് പകരം നാരങ്ങാത്തൊലി ഉപയോഗിച്ച് അടുക്കളയിലെ പല ഉപകരണങ്ങളും വളരെ എളുപ്പത്തിൽ വൃത്തിയാക്കാം.
1. മൈക്രോവേവ് ഓവൻ
സ്ഥിരമായി ഉപയോഗിക്കുന്നത് കൊണ്ട് മൈക്രോവേവ് ഓവന്റെ ഉള്ളിൽ കറകളും ദുർഗന്ധവും ഉണ്ടാകാൻ സാധ്യതയുണ്ട്. ഇതിനൊരു നല്ല പരിഹാരമാണ് നാരങ്ങാത്തൊലി. ഒരു പാത്രം വെള്ളത്തിൽ കുറച്ച് നാരങ്ങാത്തൊലികൾ ഇട്ട് മൈക്രോവേവിനുള്ളിൽ വെച്ച് കുറച്ചു മിനിറ്റ് ചൂടാക്കുക (ആവി വരുന്നത് വരെ). ഈ ആവി ഓവന്റെ ഉൾച്ചുവരുകളിൽ പറ്റിപ്പിടിച്ചിരിക്കുന്ന ഭക്ഷണാവശിഷ്ടങ്ങളെ ഇളക്കാൻ സഹായിക്കും. നാരങ്ങയിലെ പ്രകൃതിദത്ത എണ്ണകൾ ദുർഗന്ധം മാറ്റുകയും ചെയ്യും. ചൂടാറിയ ശേഷം ഒരു തുണി ഉപയോഗിച്ച് ഉൾഭാഗം തുടച്ചെടുത്താൽ മൈക്രോവേവ് നല്ല നാരങ്ങയുടെ മണത്തോടെ വൃത്തിയായി കിട്ടും.
2. കട്ടിംഗ് ബോർഡ്
മീൻ, ഇറച്ചി, വെളുത്തുള്ളി, സവാള എന്നിവയെല്ലാം അരിയുമ്പോൾ കട്ടിംഗ് ബോർഡിൽ കറയും കടുത്ത മണവും ഉണ്ടാകാറുണ്ട്. ഇത് മാറ്റാൻ നാരങ്ങാത്തൊലി ഒരു സ്ക്രബ്ബർ പോലെ ഉപയോഗിക്കാം. കട്ടിംഗ് ബോർഡിൽ അല്പം ഉപ്പ് വിതറിയ ശേഷം നാരങ്ങാത്തൊലിയുടെ ഉൾഭാഗം കൊണ്ട് നന്നായി തിരുമ്മുക. ഉപ്പിന്റെ തരികളും നാരങ്ങയിലെ സിട്രിക് ആസിഡും ചേർന്ന് ബോർഡിലെ കറകൾ പൂർണ്ണമായും നീക്കി അതിനെ വൃത്തിയുള്ളതാക്കുന്നു.
3. സ്റ്റെയിൻലെസ്സ് സ്റ്റീൽ ഉപകരണങ്ങൾ
കൈയടയാളങ്ങൾ, വെള്ളത്തിന്റെ പാടുകൾ, എണ്ണമയം എന്നിവ കാരണം സ്റ്റെയിൻലെസ്സ് സ്റ്റീൽ ഉപകരണങ്ങളുടെ തിളക്കം നഷ്ടപ്പെടാറുണ്ട്. ഇതിനായി നാരങ്ങാത്തൊലി കൊണ്ട് ഈ ഉപകരണങ്ങളുടെ പുറംഭാഗം പതുക്കെ തിരുമ്മിയ ശേഷം മൃദുവായ ഒരു തുണി ഉപയോഗിച്ച് തുടക്കുക. തൊലിയിലെ പ്രകൃതിദത്ത എണ്ണകൾ അഴുക്ക് മാറ്റുകയും സ്റ്റീലിന് നല്ല തിളക്കം നൽകുകയും ചെയ്യും. ഇതിനായി പ്രത്യേകം ക്ലീനിംഗ് സ്പ്രേകൾ വാങ്ങേണ്ട ആവശ്യമില്ല.
4. സിങ്ക്, വേസ്റ്റ് ബാസ്കറ്റ്
ഭക്ഷണാവശിഷ്ടങ്ങൾ കാരണം കിച്ചൺ സിങ്കിലോ വേസ്റ്റ് ഇടുന്ന ഭാഗങ്ങളിലോ ചിലപ്പോൾ വല്ലാത്ത ദുർഗന്ധം വരാറുണ്ട്. ഇത് മാറ്റാൻ നാരങ്ങാത്തൊലിയുടെ ഏതാനും കഷണങ്ങൾ അവിടെയിട്ട് ചെറുതായി ഒന്ന് ഉരസുകയോ വേസ്റ്റ് ഡിസ്പോസൽ സിസ്റ്റം ഉള്ളവർ അതിലേക്കിട്ട് അല്പം പ്രവർത്തിപ്പിക്കുകയോ ചെയ്യുക. നാരങ്ങയുടെ ഗുണം കാരണം അവിടുത്തെ ദുർഗന്ധം മാറി അടുക്കളയ്ക്ക് നല്ല പുതുമയുള്ള മണം ലഭിക്കും.
5. ബ്ലെൻഡർ, മിക്സി, ഫുഡ് പ്രൊസസ്സർ ജാറുകൾ
മിക്സി ജാറുകളും ബ്ലെൻഡറുകളും സ്ഥിരമായി ഉപയോഗിക്കുമ്പോൾ കഴുകിയാലും ചിലപ്പോൾ അതിൽ എണ്ണമയവും മണവും അവശേഷിക്കാറുണ്ട്. ഇത് പരിഹരിക്കാൻ ജാറിനുള്ളിൽ കുറച്ച് നാരങ്ങാത്തൊലികളും വെള്ളവും അല്പം സോപ്പും ഒഴിച്ച് മിക്സി നന്നായി ഒന്ന് കറക്കിയെടുക്കുക. ഇങ്ങനെ ബ്ലെൻഡ് ചെയ്യുമ്പോൾ ജാറിന്റെ ഉൾവശത്തെ എല്ലാ മൂലകളിലും അടിഞ്ഞിരിക്കുന്ന അഴുക്കുകളും എണ്ണമയവും പൂർണ്ണമായി മാറി ജാർ വൃത്തിയാകും.
Click it and Unblock the Notifications
Sign in with Google