മുടി കൊഴിച്ചിൽ വേഗത്തിൽ തടയാൻ 21 ദിവസം ഈ 7 കാര്യങ്ങൾ ചെയ്താൽ മാത്രം മതി, ഫലം ഉറപ്പ്

മുടികൊഴിച്ചിൽ ഇന്ന് പലരെയും അലട്ടുന്ന ഒരു സാധാരണ പ്രശ്നമായി മാറിയിരിക്കുകയാണ്. സമ്മർദ്ദം, പോഷകാഹാരക്കുറവ്, മലിനീകരണം തുടങ്ങിയ ജീവിതശൈലി പ്രശ്നങ്ങളാണ് ഇതിന് പ്രധാന കാരണം. ആധുനിക ജീവിതരീതികളും പാരിസ്ഥിതിക ഘടകങ്ങളും തലയോട്ടിയുടെ ആരോഗ്യം മോശമാക്കുന്നു, ഇത് മുടി കനംകുറയാനും ആത്മവിശ്വാസം നഷ്ടപ്പെടുത്താനും ഇടയാക്കും. തുടക്കത്തിലേ ശ്രദ്ധിച്ചാൽ മുടികൊഴിച്ചിൽ തടയാൻ സാധിക്കും. നല്ല മുടിക്കായി ചില ആരോഗ്യകരമായ ശീലങ്ങൾ പാലിക്കേണ്ടതുണ്ട്.

മുടികൊഴിച്ചിൽ പ്രശ്നമുള്ളവരെ സഹായിക്കാനായി, മെറ്റബോളിക് ഡോക്ടറും സ്പോർട്സ് ഫിസിയോയുമായ ഡോ. സുധാംശു റായ്, അടുത്തിടെ ഒരു സോഷ്യൽ മീഡിയ പോസ്റ്റിൽ ചില നുറുങ്ങുകൾ പങ്കുവെച്ചിരുന്നു. മുടികൊഴിച്ചിൽ വേഗത്തിൽ തടയാൻ 21 ദിവസം പിന്തുടരേണ്ട ഏഴ് വഴികൾ ഇതാ:

പ്രോട്ടീൻ, ഇരുമ്പ്, സിങ്ക്

മുടിയുടെ പ്രധാന ഘടകം കെരാറ്റിൻ എന്ന പ്രോട്ടീനാണ്. ഇതിന് ശരിയായ വളർച്ചയ്ക്ക് ആവശ്യമായ അമിനോ ആസിഡുകൾ വേണം. 2017-ൽ പ്രസിദ്ധീകരിച്ച 'ഡയറ്റ് ആൻഡ് ഹെയർ ലോസ്' എന്ന പഠനം പറയുന്നത്, ക്വാഷിയോർക്കർ, മറാസ്മസ് പോലുള്ള പ്രോട്ടീൻ പോഷകാഹാരക്കുറവ് മുടി കനംകുറയാനും മുടികൊഴിച്ചിലിനും കാരണമാകുമെന്നാണ്.

മുട്ട, പയർ, ചീര, നട്‌സ് തുടങ്ങിയ ഭക്ഷണങ്ങൾ നിങ്ങളുടെ ദിനചര്യയിൽ ഉൾപ്പെടുത്തുന്നത് മുടിയുടെ രോമകൂപങ്ങളെ പോഷിപ്പിക്കാൻ സഹായിക്കും. ഇവ പ്രോട്ടീൻ, സിങ്ക്, ഇരുമ്പ് എന്നിവയാൽ സമ്പുഷ്ടമാണ്.

ആഴ്ചയിൽ മൂന്ന് തവണ മസാജ്

സ്ഥിരമായ തലയോട്ടി മസാജ് രക്തയോട്ടം വർദ്ധിപ്പിക്കുകയും മുടിയുടെ വേരുകളെ ശക്തിപ്പെടുത്തുകയും സ്വാഭാവിക എണ്ണകൾ തലയോട്ടിയിൽ തുല്യമായി വിതരണം ചെയ്യാൻ സഹായിക്കുകയും ചെയ്യുന്നു. വെളിച്ചെണ്ണ, ആർഗൻ ഓയിൽ, ബദാം ഓയിൽ എന്നിവ പോലുള്ള കനംകുറഞ്ഞ എണ്ണകൾ തലയോട്ടിയുടെ വരൾച്ചയും വീക്കവും കുറയ്ക്കാൻ സഹായിക്കും. 2016-ൽ നടന്ന ഒരു പഠനത്തിൽ, ഒമ്പത് ആരോഗ്യമുള്ള പുരുഷന്മാർക്ക് 24 ആഴ്ചത്തേക്ക് ദിവസവും 4 മിനിറ്റ് മസാജ് നൽകി. മസാജിന് ശേഷം മുടിയുടെ കനത്തിൽ കാര്യമായ വർദ്ധനവ് രേഖപ്പെടുത്തി.

സൾഫേറ്റ് രഹിത ഷാംപൂ

അമിതമായി മുടി കഴുകുന്നതും, സൾഫേറ്റ് അടങ്ങിയ ഷാംപൂ ഉപയോഗിക്കുന്നതും മുടിയുടെ സ്വാഭാവിക എണ്ണമയം ഇല്ലാതാക്കുകയും വരൾച്ചയ്ക്കും പൊട്ടലിനും കാരണമാവുകയും ചെയ്യും. എന്നാൽ, സൾഫേറ്റ് രഹിത ക്ലെൻസറുകൾ തലയോട്ടിയുടെ ഈർപ്പം നിലനിർത്താനും അസ്വസ്ഥതകൾ തടയാനും സഹായിക്കുന്നു. ആഴ്ചയിൽ രണ്ടുതവണ മുടി കഴുകുന്നത് തലയോട്ടി വൃത്തിയായി സൂക്ഷിക്കാനും മുടിയുടെ ആരോഗ്യകരമായ വളർച്ചയ്ക്ക് പ്രധാനമായ സ്വാഭാവിക മൈക്രോബയോമിനെ തടസ്സപ്പെടുത്താതിരിക്കാനും സഹായിക്കും.

സമ്മർദ്ദം നിയന്ത്രിക്കുക

സ്ഥിരമായ സമ്മർദ്ദം കൊളസ്ട്രോളിനെയും രക്തസമ്മർദ്ദത്തെയും മാത്രമല്ല, മുടികൊഴിച്ചിലിനും കാരണമാകും. വിട്ടുമാറാത്ത സമ്മർദ്ദം കോർട്ടിസോൾ എന്ന സമ്മർദ്ദ ഹോർമോൺ വർദ്ധിപ്പിക്കുകയും, ഇത് മുടിയുടെ വളർച്ചാ ചക്രത്തെ തടസ്സപ്പെടുത്തുകയും ടെലോജൻ എഫ്ളൂവിയം (സമ്മർദ്ദം മൂലമുള്ള മുടികൊഴിച്ചിൽ) ഉണ്ടാക്കുകയും ചെയ്യും.

അതുകൊണ്ട്, ദിവസവും ധ്യാനം ശീലമാക്കുക. ദീർഘശ്വാസമെടുക്കൽ, ധ്യാനം, യോഗ എന്നിവ കോർട്ടിസോളിന്റെ അളവ് കുറയ്ക്കാനും തലയോട്ടിയിലേക്കുള്ള രക്തയോട്ടം മെച്ചപ്പെടുത്താനും സഹായിക്കും. ദിവസവും 10 മിനിറ്റ് ധ്യാനം ഓക്സിഡേറ്റീവ് സമ്മർദ്ദം കുറയ്ക്കുകയും മുടിയുടെ മൊത്തത്തിലുള്ള ആരോഗ്യം പ്രോത്സാഹിപ്പിക്കുകയും ചെയ്യും.

രാത്രി 11 മണിക്ക് മുമ്പ് ഉറങ്ങുക

മെലറ്റോണിൻ, ഗ്രോത്ത് ഹോർമോൺ എന്നിവ പോലുള്ള ഹോർമോണുകളെ ഉറക്കം നിയന്ത്രിക്കുന്നു. ഇത് മുടിയുടെ രോമകൂപങ്ങളുടെ പുനരുജ്ജീവനത്തിന് പ്രധാനമാണ്. എന്നാൽ, ഉറക്കക്കുറവ് ശരീരത്തിലെ താളക്രമത്തെ തടസ്സപ്പെടുത്തുകയും വീക്കവും ഓക്സിഡേറ്റീവ് സമ്മർദ്ദവും വർദ്ധിപ്പിക്കുകയും ചെയ്യും. ഇത് മുടിയുടെ രോമകൂപങ്ങളെ നശിപ്പിക്കും. അതുകൊണ്ട്, രാത്രി 11 മണിക്ക് മുമ്പ് ഉറങ്ങാൻ കിടന്ന് നിങ്ങളുടെ ഉറക്കചക്രം ക്രമീകരിക്കുക.

ഇറുകിയ ഹെയർസ്റ്റൈലുകളും രാസ ഉത്പന്നങ്ങളും

ഇറുകിയ പോണിടെയിലുകൾ, ബ്രെയ്ഡുകൾ അല്ലെങ്കിൽ ബണ്ണുകൾ എന്നിവയിൽ നിന്നുള്ള നിരന്തരമായ സമ്മർദ്ദം ട്രാക്ഷൻ അലോപ്പേഷ്യയിലേക്ക് നയിച്ചേക്കാം - ഇത് തടയാൻ കഴിയുന്ന ഒരുതരം മുടികൊഴിച്ചിലാണ്. അതുപോലെ, രാസവസ്തുക്കൾ ഉപയോഗിച്ചുള്ള ചികിത്സകൾ, അമിതമായ ചൂടുപയോഗിച്ചുള്ള സ്റ്റൈലിംഗ്, ആൽക്കഹോൾ അടങ്ങിയ സ്പ്രേകൾ എന്നിവ മുടിയിഴകളെ ദുർബലമാക്കുകയും രോമകൂപങ്ങളെ നശിപ്പിക്കുകയും ചെയ്യും. ലളിതമായ ഹെയർസ്റ്റൈലുകളും കുറഞ്ഞ സ്റ്റൈലിംഗും മുടിയുടെ സ്വാഭാവികതയെ സംരക്ഷിക്കുന്നു.

തൈറോയ്ഡ്, വിറ്റാമിൻ ബി12, ഫെറിറ്റിൻ പരിശോധന

നിങ്ങൾക്ക് സ്ഥിരമായ മുടികൊഴിച്ചിൽ ഉണ്ടെങ്കിൽ, അത് ചില അടിസ്ഥാന ആരോഗ്യ പ്രശ്നങ്ങളുടെ സൂചനയായിരിക്കാം. 'തൈറോയ്ഡ് പ്രവർത്തനവൈകല്യം മുടിയുടെ പ്രശ്നങ്ങളിൽ ചെലുത്തുന്ന സ്വാധീനം' എന്ന 2023-ലെ പഠനം കാണിക്കുന്നത്, തൈറോയ്ഡ് ഹോർമോണുകൾമുടിയുടെ വളർച്ചയിൽ നേരിട്ട് പങ്കുചേരുന്നുണ്ടെന്നും ഹൈപ്പോതൈറോയിഡിസവും ഹൈപ്പർതൈറോയിഡിസവും മുടികൊഴിച്ചിലിന് കാരണമാകാമെന്നുമാണ്. അതിനാൽ, എന്തെങ്കിലും അസന്തുലിതാവസ്ഥകൾ കണ്ടെത്താനും മുടികൊഴിച്ചിലിന് ശരിയായ ചികിത്സ നേടാനും രക്തപരിശോധന നടത്തുന്നത് നല്ലതാണ്.

ഈ നുറുങ്ങുകൾ സ്ഥിരമായി പാലിച്ചാൽ ഫലം കാണാനാകുമെന്ന് ഡോ. റായ് പറയുന്നു. "മൂന്നാം ദിവസം കുളിക്കുമ്പോൾ മുടി കൊഴിയുന്നത് കുറയും. ഏഴാം ദിവസം മുടി വേരുകളിൽ കനം വർദ്ധിച്ചതായി തോന്നും," ഡോ. റായ് കൂട്ടിച്ചേർത്തു. കാഴ്ചയിൽ മാറ്റങ്ങൾ കാണാൻ ആറ് ആഴ്ച സ്ഥിരമായി ഈ ശീലങ്ങൾ തുടരുക.