കൊതുകടിയേറ്റ് മതിയായോ? കൊതുകുകളെ തുരത്താൻ ഈ ചെടികൾ വളർത്തിയാൽ മതി, അറിയാം
വേനൽക്കാലത്തെ കടുത്ത ചൂടിലും മഴക്കാലത്തെ തണുപ്പിലും ഒരുപോലെ നമ്മളെ അലട്ടുന്ന വില്ലനാണ് കൊതുകുകൾ. ഇവയുടെ ശല്യം കാരണം വൈകുന്നേരങ്ങളിൽ ബാൽക്കണിയിൽ സമാധാനമായി ഇരുന്ന് ഒരു ചായ കുടിക്കാൻ പോലും പലർക്കും സാധിക്കാറില്ല. കൊതുകുകളെ ഓടിക്കാൻ വിപണിയിൽ ലഭിക്കുന്ന രാസവസ്തുക്കൾ അടങ്ങിയ കോയിലുകളും സ്പ്രേകളും ഉപയോഗിക്കുന്നത് പലപ്പോഴും നമ്മുടെ ആരോഗ്യത്തെ തന്നെ ദോഷകരമായി ബാധിക്കാറുണ്ട്.
എന്നാൽ ഇതിനൊരു അടിപൊളി പരിഹാരമുണ്ട്. നിങ്ങളുടെ വീടിന്റെ ബാൽക്കണിയിലോ ജനൽപടിയിലോ മനോഹരമായ ചില ചെടികൾ വളർത്തിയാൽ കൊതുകുകളെ വീട്ടിൽ നിന്ന് പാടേ അകറ്റി നിർത്താം. അത്തരത്തിലുളള 8 ചെടികൾ ഏതൊക്കെയാണെന്ന് നോക്കാം.
1. ലെമൺ ഗ്രാസ്
കൊതുകുകളെ അകറ്റാൻ ഏറ്റവും ഫലപ്രദമായ ഒന്നാണ് ഇഞ്ചിപ്പുല്ല് അഥവാ ലെമൺ ഗ്രാസ്. ഇതിൽ അടങ്ങിയിരിക്കുന്ന സിട്രോനെല്ല എന്ന ഘടകത്തിന് ശക്തമായ നാരങ്ങയുടെ സുഗന്ധമുണ്ട്. ഈ മണം കൊതുകുകൾക്ക് ഒട്ടും ഇഷ്ടമല്ല. ഇതിന്റെ സാന്നിധ്യമുള്ള സ്ഥലങ്ങളിലേക്ക് കൊതുകുകൾ വരാൻ മടിക്കും. ബാൽക്കണിയിൽ കുറച്ച് സൂര്യപ്രകാശം ലഭിക്കുന്ന എവിടെയും ഇത് എളുപ്പത്തിൽ വളർത്താം.
2. തുളസി
നമ്മുടെയെല്ലാം വീടുകളിൽ സാധാരണയായി കാണുന്ന തുളസി വെറുമൊരു ഔഷധച്ചെടി മാത്രമല്ല, മികച്ചൊരു കൊതുക് നിവാരിണി കൂടിയാണ്. തുളസിയിലകളിൽ നിന്ന് പുറപ്പെടുന്ന പ്രത്യേക സുഗന്ധം കൊതുകുകളെയും മറ്റ് ചെറിയ പ്രാണികളെയും വീടിനുള്ളിലേക്ക് കടക്കാതെ തടയുന്നു. തുളസിയില അരച്ച് ചർമ്മത്തിൽ പുരട്ടുന്നത് കൊതുക് കടിയേൽക്കാതിരിക്കാനും നല്ലതാണ്.
3. മരിഗോൾഡ്
മനോഹരമായ പൂക്കൾ തരുന്ന ചെണ്ടുമല്ലി ചെടികൾ ബാൽക്കണിയുടെ ഭംഗി കൂട്ടുക മാത്രമല്ല ചെയ്യുന്നത്. ഇതിന്റെ പൂക്കൾക്കും ഇലകൾക്കും സവിശേഷമായ ഒരു മണമുണ്ട്. ഇതിൽ അടങ്ങിയിരിക്കുന്ന പൈറെത്രം എന്ന ഘടകം കൊതുകുകളെയും കീടങ്ങളെയും അകറ്റി നിർത്താൻ സഹായിക്കുന്നു. ചെടികൾക്ക് നല്ലതുപോലെ സൂര്യപ്രകാശം ലഭിക്കുന്നുണ്ടെന്ന് ഉറപ്പുവരുത്തുക.
4. ലാവെൻഡർ
മനുഷ്യർക്ക് വളരെ പ്രിയപ്പെട്ടതും മനസ്സിന് ശാന്തത നൽകുന്നതുമായ ഒന്നാണ് ലാവെൻഡറിന്റെ സുഗന്ധം. എന്നാൽ കൊതുകുകൾക്ക് ഈ മണം അസഹനീയമാണ്. ലാവെൻഡർ ചെടിയിൽ അടങ്ങിയിരിക്കുന്ന അവശ്യ എണ്ണകൾ കൊതുകുകളുടെ ഘ്രാണശേഷിയെ തടസ്സപ്പെടുത്തുന്നു. ഇത് ബാൽക്കണിയിൽ വളർത്തുന്നത് വഴി കൊതുകുകളെ ഒരതിർത്തി വരെ അകറ്റാം.
5.പുതിന
നമ്മൾ ഭക്ഷണത്തിൽ ഉപയോഗിക്കുന്ന പുതിനയില കൊതുകുകളെ ഓടിക്കാൻ മിടുക്കനാണ്. പുതിനയുടെ കടുപ്പമേറിയ മെന്തോൾ മണം കൊതുകുകൾക്ക് അസ്വസ്ഥത ഉണ്ടാക്കുന്ന ഒന്നാണ്. ബാൽക്കണിയിലെ ചെറിയ ചട്ടികളിൽ പോലും പുതിന എളുപ്പത്തിൽ വളർത്തിയെടുക്കാം. വായുസഞ്ചാരമുള്ള ജനലിനരികിൽ ഇത് വെക്കുന്നത് കൊതുകുകൾ അകത്തേക്ക് വരുന്നത് തടയും.
6. റോസ്മേരി
ഒരു ഹെർബൽ ചെടിയായ റോസ്മേരിയുടെ മണം കൊതുകുകളെ തുരത്താൻ വളരെ നല്ലതാണ്. പ്രത്യേകിച്ച് വൈകുന്നേരങ്ങളിൽ ബാൽക്കണിയിൽ ഇരിക്കുമ്പോൾ കൊതുക് ശല്യം ഒഴിവാക്കാൻ ഇത് സഹായിക്കും. ഈ ചെടിയുടെ ഇലകൾ ചെറുതായി നുള്ളി കൈകളിൽ തിരുമ്മുന്നത് കൊതുകുകൾ അടുക്കാതിരിക്കാൻ സഹായിക്കും. ഇതിന് അധികം പരിചരണവും ആവശ്യമില്ല.
7. കാറ്റ്നിപ്പ്
പൂച്ചകൾക്ക് ഏറെ പ്രിയപ്പെട്ട ഒരു ചെടിയാണിത്. എന്നാൽ കൊതുകുകളെ തുരത്തുന്ന കാര്യത്തിൽ വിപണിയിൽ ലഭിക്കുന്ന പല രാസവസ്തുക്കളേക്കാളും പത്തിരട്ടി വീര്യമുള്ളതാണ് കാറ്റ്നിപ്പ് ചെടി എന്ന് പഠനങ്ങൾ പറയുന്നു. ഇതിലെയുള്ള നെപെറ്റാലാക്ടോൺ എന്ന ഘടകമാണ് കൊതുകുകളെ അകറ്റി നിർത്താൻ സഹായിക്കുന്നത്.
8. സിട്രോനെല്ല ജെറേനിയം
കൊതുകുകളെ അകറ്റാൻ വേണ്ടി മാത്രം പലരും വളർത്തുന്ന ഒന്നാണ് ജെറേനിയം ചെടികൾ. ഇതിന്റെ ഇലകൾക്ക് സിട്രോനെല്ലയ്ക്ക് സമാനമായ ശക്തമായ നാരങ്ങയുടെ മണമുണ്ട്. ബാൽക്കണിയിൽ മറ്റ് ചെടികൾക്കൊപ്പം ഇതും കൂടി വെക്കുന്നത് കൊതുകുകളുടെ ശല്യം പൂർണ്ണമായും കുറയ്ക്കാൻ സഹായിക്കും.
ഈ ചെടികൾ ബാൽക്കണിയിൽ വെക്കുന്നതിനൊപ്പം തന്നെ, ചട്ടികളുടെ അടിയിലെ പ്ലേറ്റുകളിലോ മറ്റ് പാത്രങ്ങളിലോ വെള്ളം കെട്ടിക്കിടക്കുന്നില്ല എന്ന് ഉറപ്പുവരുത്തുക. കാരണം കെട്ടിക്കിടക്കുന്ന വെള്ളത്തിലാണ് കൊതുകുകൾ മുട്ടയിട്ട് പെരുകുന്നത്.
Click it and Unblock the Notifications
Sign in with Google