നിങ്ങള് ഉപയോഗിക്കുന്ന സ്റ്റീല് പാത്രങ്ങള് ആരോഗ്യത്തിന് സുരക്ഷിതമാണോ? ഈ ഫുഡ് ഗ്രേഡുകള് അറിഞ്ഞിരിക്കണം
ഇന്ത്യന് അടുക്കളകളില് പാചകത്തിന് സ്റ്റെയിന്ലെസ് സ്റ്റീല് പാത്രങ്ങള് ഉപയോഗിക്കുന്നത് വ്യാപകമാണ്. ചായ തിളപ്പിക്കാനും അരി തിളപ്പിക്കാനും കറി ചൂടാക്കാനുമൊക്കെ സ്റ്റീല് പാത്രങ്ങള് ഉപയോഗിക്കാറുണ്ട്. എന്നാല്, എല്ലാ സ്റ്റീല് ഉത്പന്നങ്ങളും ഭക്ഷണത്തിന് സുരക്ഷിതമല്ല. ദൈനംദിന പാചകത്തിന് 'ഫുഡ് ഗ്രേഡ് 304' എന്നു രേഖപ്പെടുത്തിയ സ്റ്റീല് പാത്രങ്ങള് ഉപയോഗിക്കണം എന്നാണ് ആരോഗ്യ വിദഗ്ധര് നിര്ദേശിക്കുന്നത്. ഈ അറിവ് മനസില് വയ്ക്കുന്നത് നമ്മുടെ ആരോഗ്യം സംരക്ഷിക്കാന് സഹായിക്കും.
ഫുഡ് ഗ്രേഡ് 304 സ്റ്റീലില് ക്രോമിയവും നിക്കലും നിശ്ചിത അളവിലുണ്ട്. ക്രോമിയം തുരുമ്പിനെ തടയുന്ന നേരിയ പാളി രൂപീകരിക്കുന്നു. ഇത് പാചകവും ചൂടുള്ള വിഭവങ്ങളുടെ വിളമ്പലും സുരക്ഷിതമാക്കുന്നു. കുറഞ്ഞ ഗ്രേഡുള്ള സ്റ്റീല് പാത്രങ്ങളില് പാചകം ചെയ്യുന്നത് ഭക്ഷണത്തില് ലോഹാംശങ്ങള് കലര്ത്താനും വേഗത്തില് തുരുമ്പടിക്കാനും രുചി വ്യത്യാസപ്പെടുത്താനും സാധ്യതയുണ്ട്.
200 സീരീസ് സ്റ്റെയിന്ലെസ് സ്റ്റീല് പോലുള്ള ഗ്രേഡുകളില് നിക്കല് കുറവാണ്. ഇവ ഉപ്പ്, പുളി, ഈര്പ്പം എന്നിവയുള്ള സാഹചര്യങ്ങളില് എളുപ്പത്തില് ദ്രവിക്കുന്നു. കാലക്രമേണ, പാത്രത്തിന്റെ അരികുകളില് തുരുമ്പു പാടുകള് കാണാം. ഇതില് ചൂടുള്ള കറികള് വിളമ്പുമ്പോള് ലോഹാംശങ്ങള് കലരാന് ഇടയാക്കും.
304 സ്റ്റെയിന്ലെസ് സ്റ്റീല് തിരിച്ചറിയാനുള്ള എളുപ്പവഴികള്
കാന്തം ഉപയോഗിച്ച് പരിശോധന നടത്താം, എന്നാല് ഇത് പൂര്ണമല്ല. ഒരു കാന്തമെടുത്ത് പാത്രത്തില് വെച്ച് നോക്കുക. യഥാര്ത്ഥ 304 സ്റ്റീല് ദുര്ബലമായ കാന്തികത കാണിക്കുകയോ ആകര്ഷിക്കപ്പെടാതിരിക്കുകയോ ചെയ്യും. കാന്തം ശക്തമായി ഒട്ടിച്ചേര്ന്നാല് അത് 201 അല്ലെങ്കില് 430 ഗ്രേഡ് സ്റ്റീല് ആയിരിക്കാം.
ഉപ്പോ നാരങ്ങാനീരോ ഉപയോഗിച്ചുള്ള പരിശോധനയും നടത്താം. പാത്രത്തിന്റെ ഒരു ചെറിയ ഭാഗത്ത് ഉപ്പ് ലായനിയോ നാരങ്ങാനീരോ തേച്ച് മണിക്കൂറുകളോളം വെക്കുക. പിന്നീട് കഴുകി ഉണക്കുക. നല്ല 304 സ്റ്റീലില് തുരുമ്പ് പാടുകള് ഉണ്ടാകില്ല. തവിട്ടുനിറമുള്ള പാടുകള് നിലവാരം കുറഞ്ഞ സ്റ്റീലിനെ സൂചിപ്പിക്കുന്നു.
പാത്രത്തിന്റെ അടിഭാഗത്തെ അടയാളങ്ങള് പരിശോധിക്കുക. പല മികച്ച ബ്രാന്ഡുകളും '304', '18/8', അല്ലെങ്കില് '18/10' എന്ന് രേഖപ്പെടുത്തും. ചില ഉല്പ്പന്നങ്ങളില് എസ്എസ് 304 അല്ലെങ്കില് ഐഎസ് 5522 സ്റ്റീല്' എന്നും ഉണ്ടാവാം. ഗ്രേഡ് രേഖപ്പെടുത്താത്ത, കുറഞ്ഞ വിലയിലുള്ള ഉല്പ്പന്നങ്ങള് ഗുണനിലവാരം ഇല്ലാത്തതിന്റെ സൂചനയാണ്.
അടുക്കളയിലേക്ക് സ്റ്റീല് പാത്രങ്ങള് വാങ്ങുമ്പോള്
അടുക്കളയിലേക്ക് പാത്രങ്ങള് വാങ്ങുമ്പോള് ലേബലിലെ ഗ്രേഡ് വിവരങ്ങള് പരിശോധിക്കുക. 304 അല്ലെങ്കില് 18/8 സ്റ്റീല് വ്യക്തമാക്കിയ വിശ്വസനീയ ബ്രാന്ഡുകള്ക്ക് മുന്ഗണന നല്കുക. സംശയമുണ്ടെങ്കില് ഉല്പ്പന്നത്തെക്കുറിച്ചുള്ള വിവരങ്ങള് കടക്കാരോട് ചോദിക്കുക. നേര്ത്തതും ഭാരം കുറഞ്ഞതും മൂര്ച്ചയുള്ള അരികുകളുള്ളതുമായ പാത്രങ്ങള് സാധാരണയായി വിലകുറഞ്ഞ സ്റ്റീല് ഉപയോഗിച്ചുള്ളതാണ്.
304 സ്റ്റീലിനും ദീര്ഘകാലം നിലനില്ക്കാന് പരിചരണം ആവശ്യമാണ്. ഉപ്പും പുളിയുമുള്ള വിഭവങ്ങള് ഉണ്ടാക്കിയ ശേഷം ഉടന് കഴുകുക. ഈര്പ്പമുള്ള അടുക്കളയില് പാത്രങ്ങള് പൂര്ണ്ണമായി തുടച്ച് ഉണക്കണം. പ്രതലം ഉരയ്ക്കുന്ന കടുപ്പമുള്ള സ്ക്രബറുകള് ഒഴിവാക്കി, വീര്യം കുറഞ്ഞ സോപ്പും മൃദുവായ സ്പോഞ്ചുകളും ഉപയോഗിക്കുക. അടിഭാഗം വളയുകയോ തുരുമ്പിക്കുകയോ ചെയ്താല്, പാചകത്തിന് ആ പാത്രം ഉപയോഗിക്കുന്നത് നിര്ത്തുക. വേണമെങ്കില് അവ ഉണങ്ങിയ സാധനങ്ങള് സൂക്ഷിക്കാന് ഉപയോഗിക്കാം.
Click it and Unblock the Notifications
Sign in with Google