നനഞ്ഞ ടവലുകള് ഇത്ര അപകടകാരികളോ ? സൂക്ഷിച്ചില്ലെങ്കില് പണി ഉറപ്പ്
പല വീടുകളിലെയും ശുചിമുറികളില് കാണുന്ന ഒന്നാണ് നനഞ്ഞ ടവ്വലുകള്. കുളി കഴിയുമ്പോള് ശരീരം തുടയ്ക്കാന് ഉപയോഗിക്കുന്ന ടവ്വലുകള് ഈര്പ്പത്തോടെ ബാത്റൂമില് തന്നെ വിരിച്ചിടുന്നതാണ് പലരുടെയും പതിവ്. എന്നാല് ഈ ടവലുകള് രോഗാണുക്കളുടെ വാസകേന്ദ്രമാണെന്ന് പലര്ക്കും അറിയില്ല. ചര്മ്മത്തിന്റെ മൊത്തത്തിലുള്ള ആരോഗ്യത്തെയും ശുചിത്വത്തെയും പ്രതികൂലമായി ബാധിക്കാന് നനഞ്ഞ ടവ്വലുകള് മാത്രം മതി.
കുളിച്ചതിനു ശേഷം, ശരീരത്തിലെ ഈര്പ്പം ദീര്ഘ നേരം ടവ്വലുകളില് നിലനില്ക്കുന്നു. ഇത് ബാക്ടീരിയ, ഫംഗസ്, അണുക്കള് എന്നിവ പെരുകുന്നതിന് അനുയോജ്യമായ അന്തരീക്ഷം സൃഷ്ടിക്കുന്നു. ഇരുണ്ട കോണുകളിലോ, ഫര്ണിച്ചറുകളിലോ, വായുസഞ്ചാരം കുറഞ്ഞ കുളിമുറികളിലോ വിരിച്ചിടുമ്പോള് ടവ്വലുകള് ഉണങ്ങാന് വൈകുകയും സൂക്ഷ്മാണുക്കളുടെ ഹോട്ട്സ്പോട്ടായി മാറുകയും ചെയ്യും. ഈ ടവ്വല് കൊണ്ട് ശരീരം തുടയ്ക്കുമ്പോള് ചര്മത്തില് ചൊറിച്ചില്, ചുവപ്പ്, തടിപ്പ് അല്ലെങ്കില് അണുബാധ എന്നിവയ്ക്ക് കാരണമാകും.
ഇരുട്ടുള്ള, വായുസഞ്ചാരമില്ലാത്ത കുളിമുറികളില് ടവലുകള് വിരിച്ചിടുന്നത് ഫംഗസ് വളര്ച്ചയെ പ്രോത്സാഹിപ്പിക്കുന്നു. ഇത് ചര്മ്മത്തെയും ബാധിക്കും. ദൈനംദിന ചര്മ്മസംരക്ഷണ ദിനചര്യകള് പോലെ ടവലിന്റെ ശുചിത്വവും പ്രധാനമാണ്.
ഈര്പ്പം ബാക്ടീരിയയെ ആകര്ഷിക്കുന്നു. വായുസഞ്ചാരമില്ലാത്ത സ്ഥലത്ത് ടവല് ഇടുമ്പോള് സൂക്ഷ്മാണുക്കള് അതിവേഗം പെരുകും. സ്റ്റാഫൈലോകോക്കസ് ഓറിയസ്, എസ്ഷെറിച്ചിയ കോളി തുടങ്ങിയ സാധാരണ ബാക്ടീരിയകള് മണിക്കൂറുകള്ക്കുള്ളില് നനഞ്ഞ തൂവാലകളില് വളരും. ഒരേ ടവല് ഒന്നിലധികം ദിവസം ഉപയോഗിക്കുമ്പോള് ദുര്ഗന്ധവും വമിക്കുന്നു.
നന്നായി വായുസഞ്ചാരമുള്ള മുറികളിലോ വീടിനു പുറത്തെ അയയിലോ ടവല് നന്നായി വിരിച്ചിട്ട് ഉണക്കുക. വീടിന്റെ ഇടുങ്ങിയ കോണുകളില് ടവല് ഉണക്കുന്നത് ഒഴിവാക്കുക. സൂര്യപ്രകാശം ലഭിക്കുമെങ്കില് ഏറ്റവും നല്ലത്. സൂര്യപ്രകാശവും ശുദ്ധവായുവും ബാക്ടീരിയ, ഫംഗസ് എന്നിവയുടെ വളര്ച്ചയെ തടയുന്നു. ടവലുകളെ നല്ല പുതുമയോടെ നിലനിര്ത്തുന്നു.
2-3 ദിവസത്തിലൊരിക്കല് ടവലുകള് മാറ്റിസ്ഥാപിക്കുക. പതിവായി ടവലുകള് മാറ്റുന്നത് സൂക്ഷ്മജീവികളുടെ വ്യാപനം തടയുന്നു. മുഖക്കുരു പോലുള്ള ചര്മ പ്രശ്നങ്ങള് തടയുന്നു. ഉയര്ന്ന താപനിലയില് ടവലുകള് കഴുകി വെയിലത്ത് ഉണക്കുക. ബാക്ടീരിയകളെ ഫലപ്രദമായി ഇല്ലാതാക്കാന് കുറഞ്ഞത് 60 ഡിഗ്രി സെല്ഷ്യസില് ടവല് കഴുകുക.
Click it and Unblock the Notifications
Sign in with Google