തടി കുറക്കാൻ പാട് പെടുകയാണോ? കഴിക്കാം ഈ ലഘു ഭക്ഷണങ്ങൾ..സെലിബ്രിറ്റി ന്യൂട്രഷ്ണിസ്റ്റ് പറയുന്നു

Updated: Monday, August 21, 2023, 9:25 [IST]

ശരീര ഭാരം നിയന്ത്രിക്കാൻ എന്ത് കഴിക്കണം, കഴിക്കരുത്, എത്ര കഴിക്കണം തുടങ്ങിയ കാര്യത്തിൽ പലർക്കും പലവിധ സംശയങ്ങൾ കാണും. എന്നാൽ ഇന്ന് ആ സംശയങ്ങൾക്കുള്ള ഉത്തരം നൽകുകയാണ് സെലിബ്രിറ്റ് ന്യൂട്രീഷണിസ്റ്റ് ആയ അഞ്ജലി മുഖർജി. നിങ്ങളുടെ ഡയറ്റിൽ ഉൾപ്പെടുത്താവുന്ന 7 ലഘു ഭക്ഷണങ്ങളെ (മിനി മീൽ) കുറിച്ചാണ് അഞ്ജലി വിശദമാക്കുന്നത്. ഇന്ത്യ.കോമുമായി പങ്കുവെച്ച ചില റെസിപ്പികൾ പരിചയപ്പെടാം.

1. ബദാം ചേർത്ത് ഒരു കപ്പ് സോയ മിൽക്ക്- നിരവധി ആരോഗ്യ ഗുണങ്ങളുള്ള ഭക്ഷണങ്ങളാണ് സോയ മിൽക്കും ബദാമും.ഇവയിൽ അടങ്ങിയ കുറഞ്ഞ കലോറി ആരോഗ്യകരമായ കൊഴുപ്പും ശരീരഭാരവും കുറയ്ക്കാൻ സഹായിക്കുന്നു.

2. ഹോൾ വീറ്റ് ബ്രെഡ് സാന്റ്വിച്ച്- ചിക്കൻ കക്കിരി, തക്കാളി അല്ലെങ്കിൽ പനീർ പോലുള്ള ആരോഗ്യകരമായ ഭക്ഷണങ്ങൾ ചേർത്ത് ഹോൾ ഗോതമ്പ് ബ്രെഡിനൊപ്പം ചേർത്ത് കഴിച്ച് നോക്കൂ. ശരീരഭാരം കുറക്കാനുള്ള യാത്രയിൽ തീർച്ചയായും ഭാരം കൂട്ടാതെ തന്നെ വിശപ്പടക്കാൻ ഇത് സഹായിക്കും

3. നിലക്കടലയും കടലയും- നിലക്കടല പോഷകങ്ങളാൽ സമ്പന്നമാണ്. അൽപ്പം കഴിച്ചാൽ തന്നെ വയർ നിറഞ്ഞിരിക്കുന്നതായി തോന്നും. അതോടെ ഇടയ്ക്കിടെ വിശപ്പ് തോന്നുകയുമില്ല ഭക്ഷണം കഴിക്കണമെന്ന ചിന്തയും ഉണ്ടാകില്ല. അതേസമയം മിതമായ അളവിലാണ് ഇത് കഴിക്കുന്നതെന്ന് ഉറപ്പാക്കാം. തടി കുറക്കാനായി നിലക്കടലയും ചന്നയും 1:1 എന്ന അനുപാതത്തിൽ കഴിക്കാം എന്നാണ് അഞ്ജലി മുഖർജി നിർദ്ദേശിക്കുന്നത്.

4. ഗോതമ്പ് റോട്ടി-സാധരണ റോട്ടിക്ക് പകരം ഗോതമ്പ് റോട്ടി ഡയറ്റിൽ ഉൾപ്പെടുത്താം. സാധാരണ കഴിക്കുന്ന അത്രയും കഴിക്കാതെ റോട്ടികളുടെ എണ്ണം കുറയ്ക്കാനും ശ്രദ്ധിക്കണമെന്ന് അഞ്ജലി നിർദ്ദേശിക്കുന്നു.

5. ടോസ്റ്റും മുട്ട ഓംലെറ്റും- ശരീരഭാരം കുറയ്ക്കാനുള്ള ആരോഗ്യകരമായ ഭക്ഷണങ്ങളിൽ ഒന്നാണ് ഇത്. 2 മുട്ടയുടെ വെള്ള ചേർത്തുള്ള ഓംലെറ്റ് അല്ലെങ്കിൽ ഒരു ഫുൾ എഗ് ഓംലെറ്റ് അടങ്ങിയ 1 ടോസ്റ്റാണ് കഴിക്കേണ്ടത്. പ്രോട്ടീൻ സമ്പന്നമാണ് മുട്ട എന്ന കാര്യം അറിയാമല്ലോ. ശരീരഭാരം കുറക്കുമ്പോൾ കൃത്യമായ അളവിൽ ശരീരത്തിൽ ഊർജം ലഭിക്കുന്നുണ്ടെന്ന് ഉറപ്പാക്കണം. അതിനായി പ്രോട്ടീൻ ധാരാളം അടങ്ങിയ മുട്ട നിങ്ങളെ സഹായിക്കും.

6. ഫ്രൂട്ട് ബൗൾ- ഒരു ആപ്പിൾ അല്ലെങ്കിൽ ഓറഞ്ച്, ചെറി അല്ലെങ്കിൽ ഒരു പാത്രം തണ്ണിമത്തൻ എന്നിങ്ങനെയുള്ള പഴങ്ങൾ കഴിക്കാം. ഇവ ശരീരത്തിൽ ജലാംശം നിലനിർത്താനും ആവശ്യമായ നാരുകൾ ശരീരത്തിലെത്താനും സഹായിക്കും.

7.സാലഡിനൊപ്പം ഒരു പാത്രം പരിപ്പ് അല്ലെങ്കിൽ തൈര്-ശരീരഭാരം കുറയ്ക്കുകയാണ് ലക്ഷ്യമെങ്കിൽ ധൈര്യമായി ദിവസേന ഒരു ബൗൾ പരിപ്പ് കഴിക്കാം. മറ്റൊരു ഭക്ഷണമാണ് പയർ. ഇവയിൽ പ്രോട്ടീൻ, നാരുകൾ എന്നിവ ധാരാളം അടങ്ങിയിട്ടുണ്ട്. ഇടയ്ക്കിടെ ഭക്ഷണം കഴിക്കണമെന്ന തോന്നൽ ഇല്ലാതാക്കാൻ ഇത് സഹായിക്കും.