മഴക്കാലത്ത് പൈപ്പ് വെള്ളം അതേപടി ഉപയോഗിക്കുകയാണോ? ഈ രോഗത്തെ ക്ഷണിച്ചുവരുത്തരുത്

മഴക്കാലത്ത് പൈപ്പ് വെള്ളം കുടിക്കുന്നത് വലിയ അപകടം ക്ഷണിച്ചുവരുത്തും. വെള്ളം സ്വാഭാവികമായി കാന്‍സറിനുള്ള ഘടകമല്ലെങ്കിലും മഴക്കാലത്തെ കെട്ടിക്കിടക്കുന്ന വെള്ളം, വര്‍ധിച്ച ഈര്‍പ്പം, മലിനമായ ജലസ്രോതസുകള്‍ എന്നിവ അണുബാധകള്‍ക്കും മറ്റു പല ഗുരുതരമായ രോഗങ്ങള്‍ക്കും കാരണമാകുന്നു. ഇന്ത്യയിലെ മുന്‍നിര കാന്‍സര്‍ വിദഗ്ധരാണ് ഈ മുന്നറിയിപ്പ് നല്‍കുന്നത്.

മഴക്കാലത്ത് കാന്‍സര്‍ ഉള്‍പ്പെടെയുള്ള മാരകമായ രോഗങ്ങളുടെയും അണുബാധകളുടെയും സാധ്യതയുണ്ട്. ഇത് എങ്ങനെ എന്നല്ലേ..

കാന്‍സര്‍ ബാധിച്ചവരുടെ രോഗപ്രതിരോധ ശേഷി പലപ്പോഴും ദുര്‍ബലമാകുന്നു, ഇത് ജലജന്യ രോഗങ്ങള്‍ക്കും മറ്റ് രോഗങ്ങള്‍ക്കും സാധ്യത ഗണ്യമായി വര്‍ദ്ധിപ്പിക്കുന്നു. വെള്ളപ്പൊക്കത്തില്‍ മലിനജലം, കീടനാശിനികള്‍, പ്ലാസ്റ്റിക് മാലിന്യങ്ങള്‍, ഘന ലോഹങ്ങള്‍ എന്നിവ കലരുന്നു.

ഇന്ത്യന്‍ നഗരങ്ങളിലെ മഴക്കാലത്തുണ്ടാകുന്ന വെള്ളപ്പൊക്കത്തില്‍ ആര്‍സെനിക്, ലെഡ്, കാഡ്മിയം എന്നിവ അടങ്ങിയിട്ടുണ്ടെന്ന് പഠനങ്ങള്‍ തെളിയിക്കുന്നു - എല്ലാം അര്‍ബുദകാരികളാണ്. മണ്‍സൂണ്‍ വെള്ളപ്പൊക്കത്തില്‍ വ്യാവസായിക മാലിന്യങ്ങളും മലിനജലവും നദികളിലേക്ക് ഒഴുകുന്നു. ഇവ മത്സ്യങ്ങളുടെ ഉള്ളിലും ചെല്ലുന്നു.

മുംബൈ മാര്‍ക്കറ്റുകളില്‍ നടത്തിയ ഒരു പഠനത്തില്‍ മണ്‍സൂണ്‍ മത്സ്യ സാമ്പിളുകളില്‍ ഹെവി മെറ്റല്‍ പരിധി കവിഞ്ഞതായി കണ്ടെത്തി. കാന്‍സറിന് കാരണമാകുന്ന വിഷവസ്തുക്കള്‍ ഈ മീനുകളില്‍ അടങ്ങിയിരിക്കുന്നു.

കനത്ത മഴയും നനഞ്ഞ ചുവരുകളും ആസ്പര്‍ജില്ലസ് ഫ്‌ലേവസ് പോലുള്ള പൂപ്പലുകള്‍ വളര്‍ത്തുന്നു, ഇത് ശക്തമായ അര്‍ബുദകാരികളായ അഫ്‌ലാറ്റോക്‌സിനുകള്‍ പുറത്തുവിടുന്നു. 'ഏഷ്യയിലെ കരള്‍ കാന്‍സര്‍ കേസുകളില്‍ 25-28 ശതമാനവും അഫ്‌ലാറ്റോക്‌സിനുമായി ബന്ധപ്പെട്ടിരിക്കുന്നുവെന്ന് ലോകാരോഗ്യ സംഘടന പറയുന്നു. ഓര്‍മ്മക്കുറവ് അല്ലെങ്കില്‍ ശ്വാസകോശ രക്തസ്രാവം പോലുള്ള ഗുരുതരമായ ആരോഗ്യപ്രശ്‌നങ്ങള്‍ക്കും പൂപ്പല്‍ കാരണമാകുമെന്ന് അപൂര്‍വമായ റിപ്പോര്‍ട്ടുകള്‍ ഉണ്ട്.