മുന്നോട്ടല്ല, ഇനി പുറകോട്ട് നടന്ന് നോക്കൂ, ഫിറ്റ്നസ് കൂടും, കൂടുതൽ കലോറി കത്തിച്ച് കളയാം

Updated: Monday, July 14, 2025, 21:54 [IST]

നടത്തം ആരോഗ്യത്തിന് വളരെ നല്ലതാണ്. എന്നാൽ മുന്നോട്ട് നടക്കുന്നത് മാത്രമല്ല വ്യായാമം. പുറകിലേക്ക് നടക്കുന്നത് അഥവാ റിട്രോ വാക്കിംഗ് എന്നത് അത്ഭുതകരമായ രീതിയിൽ ഗുണകരമായ ഒരു വ്യായാമമാണ്. ഇത് നിങ്ങളുടെ ശാരീരികവും മാനസികവുമായ ആരോഗ്യത്തെ നല്ല രീതിയിൽ സ്വാധീനിക്കുന്നു. മുന്നോട്ട് നടക്കുന്നതിനേക്കാൾ വ്യത്യസ്തമായി പേശികളെ ഇത് ഉത്തേജിപ്പിക്കുന്നു, മികച്ച ബാലൻസ്, ഏകോപനം, കോഗ്നിറ്റീവ് പ്രവർത്തനം എന്നിവ പ്രോത്സാഹിപ്പിക്കുന്നു, കൂടാതെ കാൽമുട്ടുകൾക്ക് ആയാസം കുറയ്ക്കുന്നു.

ഇത് നിങ്ങളുടെ തലച്ചോറിനെയും ശരീരത്തെയും പുതിയ രീതിയിൽ വെല്ലുവിളിക്കുന്നതിനാൽ, ഫിസിക്കൽ തെറാപ്പിയിലും പുനരധിവാസ കേന്ദ്രങ്ങളിലും ഇത് പതിവായി ഉപയോഗിക്കുന്നു. പുറകിലേക്ക് നടക്കുന്നത് ഹൃദയ സംബന്ധമായ ഫിറ്റ്നസ് വർദ്ധിപ്പിക്കാനും കുറഞ്ഞ സമയത്തിനുള്ളിൽ കൂടുതൽ കലോറി എരിച്ചു കളയാനും സഹായിക്കുന്നു. പുറകിലേക്ക് നടക്കുന്നതിലൂടെ നിങ്ങൾക്ക് ലഭിക്കുന്ന ആരോഗ്യപരമായ ഗുണങ്ങൾ താഴെ നൽകുന്നു.

1. ബാലൻസ് മെച്ചപ്പെടുത്തുന്നു: പുറകിലേക്ക് നടക്കുമ്പോൾ തലച്ചോറും ശരീരവും ഒരുമിച്ച് പ്രവർത്തിക്കേണ്ടിവരുന്നു, ഇത് നാഡീപേശികളുടെ ഏകോപനം മെച്ചപ്പെടുത്തുന്നു. ഇത് പ്രോപ്രിയോസെപ്ഷനെ (ശരീരത്തിന്റെ സ്ഥാന നിർണ്ണയം) പരിപോഷിപ്പിക്കുന്നു, ഇത് നല്ല ബാലൻസിന് അത്യാവശ്യമാണ്. കാലക്രമേണ, ഇത് വീഴ്ചയ്ക്കുള്ള സാധ്യത കുറയ്ക്കാൻ സഹായിക്കുന്നു, പ്രത്യേകിച്ചും പ്രായമായവരിൽ ഇത് കൂടുതൽ നല്ലതാണ്.

2. പേശികളെ ശക്തിപ്പെടുത്തുന്നു: മുന്നോട്ട് നടക്കുന്നതിനേക്കാൾ വ്യത്യസ്തമായി, പുറകിലേക്ക് നടക്കുമ്പോൾ കാൽവണ്ണ, ക്വാഡ്സ്, ഹാംസ്ട്രിംഗ്സ് എന്നീ പേശികൾക്ക് കൂടുതൽ ബലം ലഭിക്കുന്നു. ഇത് പേശികളുടെ ശക്തി വർദ്ധിപ്പിക്കുകയും കായികരംഗത്ത് മികച്ച പ്രകടനം നടത്താൻ സഹായിക്കുകയും ചെയ്യുന്നു.

3. കാൽമുട്ടുവേദന കുറയ്ക്കുന്നു: പുറകിലേക്ക് നടക്കുന്നത് കാൽമുട്ടുകളിലെ സമ്മർദ്ദം കുറയ്ക്കാൻ സഹായിക്കുന്നു. ഇത് കാൽമുട്ടിലെ വേദന കുറയ്ക്കുകയും പരിക്കുകളിൽ നിന്ന് സുഖം പ്രാപിക്കാൻ സഹായിക്കുകയും ചെയ്യുന്നു. ഫിസിക്കൽ തെറാപ്പിസ്റ്റുകൾ പലപ്പോഴും ഇത് വ്യായാമമായി നിർദ്ദേശിക്കുന്നു.

4. ഹൃദയത്തിന്റെ ആരോഗ്യം മെച്ചപ്പെടുത്തുന്നു: സാധാരണ നടക്കുന്നതിനേക്കാൾ പുറകിലേക്ക് നടക്കുമ്പോൾ ഹൃദയമിടിപ്പ് കൂടുന്നു. ഇത് ഹൃദയത്തിന്റെ പ്രവർത്തനം മെച്ചപ്പെടുത്താനും രക്തചംക്രമണം വർദ്ധിപ്പിക്കാനും സഹായിക്കുന്നു.

5. കൂടുതൽ കലോറി എരിച്ചു കളയുന്നു: പുറകിലേക്ക് നടക്കുമ്പോൾ കൂടുതൽ ശ്രദ്ധയും ഏകാഗ്രതയും ആവശ്യമാണ്. അതിനാൽ ഇത് സാധാരണ നടക്കുന്നതിനേക്കാൾ കൂടുതൽ കലോറി എരിച്ചു കളയാൻ സഹായിക്കുന്നു. ശരീരഭാരം കുറയ്ക്കാനും ഉപാപചയ ആരോഗ്യം മെച്ചപ്പെടുത്താനും ഇത് സഹായിക്കുന്നു.

6. മാനസികാരോഗ്യം മെച്ചപ്പെടുത്തുന്നു: പുറകിലേക്ക് നടക്കുന്നത് മാനസികമായി ഉത്തേജനം നൽകുന്നു, ഇത് ചുറ്റുപാടുകളെക്കുറിച്ച് കൂടുതൽ ബോധവാന്മാരായിരിക്കാൻ സഹായിക്കുന്നു. ഈ വെല്ലുവിളി ഓർമ്മശക്തി, സ്ഥലപരമായ അവബോധം, പ്രതികരണശേഷി എന്നിവ മെച്ചപ്പെടുത്തുന്നു.

7. ശരീരത്തിന്റെ ബാലൻസ് ശരിയായ രീതിയിൽ നിലനിർത്തുന്നു: പല ആളുകളും നടക്കുമ്പോൾ കുനിയുകയോ മുന്നോട്ട് ചാഞ്ഞ് നടക്കുകയോ ചെയ്യുന്നു. എന്നാൽ പുറകിലേക്ക് നടക്കുമ്പോൾ, ഇത് പേശികളെ പ്രവർത്തിപ്പിച്ച് നട്ടെല്ലിനെ ശരിയായ രീതിയിൽ നിലനിർത്താൻ സഹായിക്കുന്നു. ഇത് ശരീരത്തിന്റെ ബാലൻസ് ശരിയായ രീതിയിൽ നിലനിർത്തുകയും പുറംവേദന ഒഴിവാക്കുകയും ചെയ്യുന്നു.

8. കായികശേഷി വർദ്ധിപ്പിക്കുന്നു: കായികതാരങ്ങളെ സംബന്ധിച്ചിടത്തോളം, പുറകിലേക്ക് നടക്കുന്നത് വേഗതയും പേശികളേയും മെച്ചപ്പെടുത്തുന്നു. ഇത് പരിക്കിന്റെ സാധ്യത കുറയ്ക്കുകയും അത്ലറ്റിക് പ്രവർത്തനങ്ങളിൽ മികച്ച പ്രകടനം കാഴ്ചവയ്ക്കാൻ സഹായിക്കുകയും ചെയ്യുന്നു.

9. പരിക്ക് ഭേദമാക്കുന്നു: ശസ്ത്രക്രിയകൾക്ക് ശേഷം പരിക്ക് ഭേദമാക്കാൻ പുറകോട്ടുള്ള നടത്തം സഹായിക്കുന്നു. ഇത് സുരക്ഷിതമായി പേശികളെ ബലപ്പെടുത്തുകയും ചലനശേഷി വർദ്ധിപ്പിക്കുകയും ചെയ്യുന്നു.

ചിട്ടയായതും സുരക്ഷിതവുമായ രീതിയിലുള്ള ഈ വ്യായാമം നിങ്ങളുടെ ഫിറ്റ്നസ് ദിനചര്യയിൽ ഉൾപ്പെടുത്തുന്നത് ആരോഗ്യത്തിന് വളരെ നല്ലതാണ്.

Disclaimer: ഈ ലേഖനത്തിൽ നൽകിയിരിക്കുന്ന വിവരങ്ങൾ പൊതുവായ വിവരങ്ങൾ മാത്രമാണ്. അതിനാൽ ഒരു ഡോക്ടറുടെ നിർദേശപ്രകാരം മാത്രം ഉപയോഗിക്കുക.