കുളിമുറികളിലെ ദുർഗന്ധം എന്തൊക്കെ ചെയ്തിട്ടും മാറുന്നില്ലേ? ഈ ചെടികൾ വളർത്തിയാൽ മതി
മോശം വായുസഞ്ചാരമുള്ള കുളിമുറികളിലെ ഈർപ്പവും ക്ലീനിംഗ് ഉൽപ്പന്നങ്ങളിൽ നിന്നുള്ള വോളറ്റൈൽ ഓർഗാനിക് സംയുക്തങ്ങളും ദുർഗന്ധത്തിന് പ്രധാന കാരണമാണ്. കൃത്രിമ സ്പ്രേകൾക്ക് പകരം, വീടിനകത്തെ ചെടികൾക്ക് പ്രകൃതിദത്ത പരിഹാരം നൽകാം. ഈ സസ്യങ്ങൾ വായുവിന്റെ ഗുണമേന്മ മെച്ചപ്പെടുത്തി, മലിനീകരണങ്ങളെ ആഗിരണം ചെയ്ത് ശുദ്ധമായ ഓക്സിജൻ പുറത്തുവിടും. അമിത ഈർപ്പവും വായുവിലെ വിഷവസ്തുക്കളും കുറച്ച്, കുളിമുറിക്ക് സുഗന്ധപൂരിതമായ 'സ്പാ' അനുഭവം സൃഷ്ടിക്കാൻ ഇവ സഹായിക്കും.
ക്ലീനിംഗ് ഏജൻ്റുകൾ, സോപ്പുകൾ, മറ്റ് ഉൽപ്പന്നങ്ങൾ എന്നിവയിൽ നിന്നുള്ള വോളറ്റൈൽ ഓർഗാനിക് സംയുക്തങ്ങളെ ചെടികൾ നീക്കം ചെയ്യുന്നു. ഈർപ്പം നിയന്ത്രിച്ച് പൂപ്പൽ തടയാനും ഇവ സഹായകമാണ്. രാസവസ്തുക്കളില്ലാതെ കുളിമുറിക്ക് പുതുമ നൽകാൻ ഓക്സിജനും പ്രകൃതിദത്ത സുഗന്ധവും പുറത്തുവിടും. കുളിമുറിയെ ഉന്മേഷദായകമാക്കാൻ സഹായിക്കുന്ന ചില ഇൻഡോർ ചെടികളെക്കുറിച്ചാണ് താഴെ.
പീസ് ലില്ലി: ഫോർമാൽഡിഹൈഡ്, ബെൻസീൻ, അമോണിയ തുടങ്ങിയ മലിനീകരണങ്ങളെ ആഗിരണം ചെയ്ത് ദുർഗന്ധം നിയന്ത്രിക്കുന്നു. കുറഞ്ഞ പ്രകാശത്തിലും ഉയർന്ന ഈർപ്പത്തിലും വളരും. പതിവായ നനയും വെള്ളം തളിക്കലും മതി. കുളിമുറികൾക്ക് ഉന്മേഷം നൽകും.
സ്പൈഡർ പ്ലാന്റ് : തുടക്കക്കാർക്ക് എളുപ്പത്തിൽ പരിപാലിക്കാവുന്ന ഈ ചെടിക്ക് ക്ലീനിംഗ് ഏജന്റുകളിൽ നിന്നുള്ള ഫോർമാൽഡിഹൈഡ്, സൈലീൻ, ടോളുയീൻ തുടങ്ങിയവയെ ആഗിരണം ചെയ്യാൻ കഴിയും. വായു ശുദ്ധീകരിക്കുകയും ഈർപ്പം കുറയ്ക്കുകയും ചെയ്യുന്ന ഇവ പുതിയ ചെടികൾ വളർത്താനും സഹായിക്കുന്നു.
കറ്റാർവാഴ : ചർമ്മ സംരക്ഷണം കൂടാതെ, വായു ശുദ്ധീകരണത്തിലും കറ്റാർവാഴ മികച്ചതാണ്. സോപ്പുകൾ, സൗന്ദര്യവർദ്ധക വസ്തുക്കൾ എന്നിവയിൽ നിന്നുണ്ടാകുന്ന ഫോർമാൽഡിഹൈഡ്, ബെൻസീൻ തുടങ്ങിയവയെ നീക്കം ചെയ്യുന്നു. നേരിട്ടല്ലാത്ത പ്രകാശത്തിൽ കുറഞ്ഞ വെള്ളത്തിൽ വളരുന്ന ഇത് പരിപാലിക്കാൻ എളുപ്പമാണ്.
അരീക്ക പാം : ബട്ടർഫ്ലൈ പാം എന്നും അറിയപ്പെടുന്ന ഈ ചെടി ടോളുയീൻ, സൈലീൻ തുടങ്ങിയവ നീക്കം ചെയ്ത് ഈർപ്പം കൂട്ടുന്നതിലൂടെ ദുർഗന്ധം ഇല്ലാതാക്കുന്നു. നേരിട്ടല്ലാത്ത പ്രകാശവും പതിവായ നനയും ഇവയ്ക്ക് നല്ലതാണ്. ഓക്സിജൻ പുറത്തുവിട്ട് വായുവിനെ ശുദ്ധവും ഉന്മേഷദായകവുമാക്കുന്നു.
സ്നേക്ക് പ്ലാന്റ്: കുറഞ്ഞ പ്രകാശത്തിലും ക്രമരഹിതമായ നനയിലും നിലനിൽക്കുന്ന ഇവ ചെറുതോ ജനലുകളില്ലാത്തതോ ആയ കുളിമുറികൾക്ക് അനുയോജ്യമാണ്. ബെൻസീൻ, ഫോർമാൽഡിഹൈഡ്, സൈലീൻ തുടങ്ങിയവയെ വായുവിൽ നിന്ന് നീക്കം ചെയ്യും. രാത്രിയിലും ഓക്സിജൻ പുറത്തുവിട്ട് വായുവിന്റെ ഗുണമേന്മ വർദ്ധിപ്പിക്കുന്നു. നേരായ ഇലകൾ സ്ഥലം ലാഭിക്കാൻ സഹായിക്കും.
ബോസ്റ്റൺ ഫേൺ: ഈർപ്പമുള്ള സാഹചര്യങ്ങൾക്ക് അനുയോജ്യയായ ഇവ വായു ശുദ്ധീകരിക്കുന്നു. ഫോർമാൽഡിഹൈഡ്, സൈലീൻ എന്നിവയെ വായുവിൽ നിന്ന് വലിച്ചെടുത്ത് ഈർപ്പം നിയന്ത്രിക്കാൻ സഹായിക്കും. നേരിട്ടല്ലാത്ത പ്രകാശവും സ്ഥിരമായി നനഞ്ഞ മണ്ണും ഇഷ്ടപ്പെടുന്ന ബോസ്റ്റൺ ഫേൺ കുളിമുറിക്ക് ഉന്മേഷദായകമായ സ്പാ പോലുള്ള ഒരനുഭവം നൽകുന്നു.
ബാംബൂ പാം: കുളിമുറികൾക്ക് ഉഷ്ണമേഖലാ സ്പർശം നൽകി മികച്ച വായു ശുദ്ധീകരണിയായി വർത്തിക്കുന്നു. ഫോർമാൽഡിഹൈഡ്, ബെൻസീൻ, ട്രൈക്ലോറോഎഥിലീൻ തുടങ്ങിയവയെ നീക്കം ചെയ്യും. നീളമുള്ള ഇലകൾ സ്വാഭാവികമായും ഈർപ്പം വർദ്ധിപ്പിക്കുന്നു. നന്നായി നീർവാർച്ചയുള്ള, ഈർപ്പമുള്ള മണ്ണും നേരിട്ടല്ലാത്ത പ്രകാശവും ഇവയ്ക്ക് ഉത്തമമാണ്. ദുർഗന്ധം ചെറുത്ത് അന്തരീക്ഷം മെച്ചപ്പെടുത്താനും സഹായിക്കും.
Click it and Unblock the Notifications
Sign in with Google