ആഗ്രഹിച്ചതെന്തും സ്വന്തമാക്കാം; ദിവസത്തിലെ ഈ 4 സമയങ്ങൾക്ക് ഒരു പ്രത്യേകതയുണ്ട്!

നല്ല ആരോഗ്യം, സാമ്പത്തിക അഭിവൃദ്ധി, വ്യക്തിപരമായ വിജയം എന്നിവ ജീവിതത്തിലേക്ക് ആകർഷിക്കുന്നതിനായി പലരും തങ്ങളുടെ ദിവസം ആരംഭിക്കുന്നത് പോസിറ്റീവ് ചിന്തകൾ, വിഷ്വലൈസേഷൻ അല്ലെങ്കിൽ ധ്യാനം എന്നിവയോടെയാണ്. വെറും ചിന്തകൾ കൊണ്ട് മാത്രം വിചാരിച്ച കാര്യങ്ങൾ നേടാനാകുമെന്ന് തെളിയിക്കാൻ ശാസ്ത്രീയമായ അടിത്തറകൾ ഇല്ലെങ്കിൽ പോലും, ചിന്തകളെ ഒരു പ്രത്യേക ലക്ഷ്യത്തിലേക്ക് കേന്ദ്രീകരിക്കാൻ ദിവസത്തിലെ ചില സമയങ്ങൾ കൂടുതൽ അനുയോജ്യമാണെന്ന് വിവിധ ആത്മീയ ശാസ്ത്രങ്ങൾ വ്യക്തമാക്കുന്നുണ്ട്. യോഗ, വൈദിക പാരമ്പര്യങ്ങൾ അനുസരിച്ച് നമ്മൾ ഏത് രീതി ഉപയോഗിക്കുന്നു എന്നതിനേക്കാൾ പ്രാധാന്യം നമ്മുടെ ശ്രദ്ധയുടെ ഗുണനിലവാരത്തിനാണ്. മാനസികമായ വ്യക്തതയും ഏകാഗ്രതയും വർദ്ധിപ്പിക്കാൻ സഹായിക്കുന്ന ദിവസത്തിലെ ആ പ്രധാന സമയങ്ങൾ ഏതൊക്കെയാണെന്ന് താഴെ വിവരിക്കുന്നു.

1. ബ്രഹ്മമുഹൂർത്തം: ഏറ്റവും മികച്ച സമയം

ദിവസത്തിലെ ഏറ്റവും പവിത്രവും അനുകൂലവുമായ സമയമായാണ് ബ്രഹ്മമുഹൂർത്തത്തെ കണക്കാക്കുന്നത്. സൂര്യോദയത്തിന് ഏകദേശം 1 മണിക്കൂർ 36 മിനിറ്റ് മുൻപ് ആരംഭിച്ച് 48 മിനിറ്റ് നീണ്ടുനിൽക്കുന്ന സമയമാണിത്. ഈ സമയത്ത് പ്രകൃതിയും മനുഷ്യന്റെ മനസ്സും സ്വാഭാവികമായും അതീവ ശാന്തമായിരിക്കും. അതുകൊണ്ട് തന്നെ ധ്യാനിക്കാനും ലക്ഷ്യങ്ങൾ മനസ്സിൽ കണ്ട് വിഷ്വലൈസേഷൻ ചെയ്യാനും പോസിറ്റീവ് വാക്യങ്ങൾ ആവർത്തിക്കാനും ഈ സമയം ഏറെ എളുപ്പമാണ്. ആരോഗ്യത്തിൽ ശ്രദ്ധ കേന്ദ്രീകരിക്കുന്നവർക്ക് ശാരീരിക സുഖം, ഊർജ്ജസ്വലത, മാനസിക സന്തുലിതാവസ്ഥ എന്നിവ വിഷ്വലൈസേഷൻ ചെയ്യാൻ ഈ സമയം ഉപയോഗിക്കാം. അതുപോലെ സാമ്പത്തിക വളർച്ച ആഗ്രഹിക്കുന്നവർക്ക് തങ്ങളുടെ കരിയറിലെ വിജയം, ബിസിനസ്സ് വളർച്ച എന്നിവയ്ക്കായി ശാന്തമായ ഈ അന്തരീക്ഷത്തിൽ ലക്ഷ്യങ്ങൾ ഉറപ്പിക്കാവുന്നതാണ്.

2. പ്രഭാതം: പുതിയ തുടക്കങ്ങളുടെ പ്രതീകം

പല സംസ്‌കാരങ്ങളിലും സൂര്യോദയം എന്നത് ഒരു പുതിയ തുടക്കത്തിന്റെ പ്രതീകമാണ്. വിഷ്വലൈസേഷൻ പരിശീലിക്കുന്നവർക്ക് ഉദിച്ചുയരുന്ന സൂര്യൻ പുതിയ ഊർജ്ജത്തിന്റെയും ആത്മവിശ്വാസത്തിന്റെയും ഉറവിടമാണ്. ഈ സമയത്ത് ആത്മവിശ്വാസവും അച്ചടക്കവും വർദ്ധിപ്പിക്കുന്ന പോസിറ്റീവ് ചിന്തകൾക്ക് പ്രാധാന്യം നൽകാം. പലരും സൂര്യോദയ സമയത്തെ ധ്യാനത്തോടൊപ്പം നന്ദി പ്രകടിപ്പിക്കാനും സമയം കണ്ടെത്തുന്നു. ദിവസത്തിന്റെ തുടക്കത്തിൽ തന്നെ നമ്മളിലുള്ള നല്ല കാര്യങ്ങൾക്ക് പ്രകൃതിയോട് നന്ദി പറയുന്നത് വരാനിരിക്കുന്ന മണിക്കൂറുകളെ കൂടുതൽ സമാധാനപൂർണ്ണമാക്കാൻ സഹായിക്കും.

3. സൂര്യാസ്തമയം: നെഗറ്റീവ് ചിന്തകളെ ഒഴുക്കിക്കളയാം

പ്രഭാതം എന്നത് പുതിയ കാര്യങ്ങൾ സൃഷ്ടിക്കാനുള്ള സമയമാണെങ്കിൽ, സൂര്യാസ്തമയം എന്നത് അനാവശ്യമായ കാര്യങ്ങളെ ഉപേക്ഷിക്കാനുള്ള സമയമാണ്. നമ്മുടെ വ്യക്തിഗത വളർച്ചയെ തടസ്സപ്പെടുത്തുന്ന ഭയം, മാനസിക സമ്മർദ്ദം, ദേഷ്യം, പരിമിതമായ ചിന്തകൾ എന്നിവയിൽ നിന്ന് മുക്തി നേടാൻ വൈകുന്നേരങ്ങൾ ഉപയോഗിക്കാമെന്ന് ആത്മീയ ഗുരുക്കൾ നിർദ്ദേശിക്കുന്നു. അസ്തമയ സമയത്തെ ചെറിയൊരു ധ്യാനം അന്നത്തെ ദിവസത്തെ അനുഭവങ്ങളെ വിലയിരുത്താനും ഭാവി ലക്ഷ്യങ്ങൾക്കായി മനസ്സിനെ സജ്ജമാക്കാനും സഹായിക്കും.

4. കറുത്ത വാവും വെളുത്ത വാവും

ചന്ദ്രന്റെ വിവിധ ഘട്ടങ്ങൾക്കും വിഷ്വലൈസേഷനിൽ വലിയ പ്രാധാന്യമുണ്ട്. കറുത്ത വാവ് അല്ലെങ്കിൽ അമാവാസി സമയം ആരോഗ്യം, സാമ്പത്തികം, ബന്ധങ്ങൾ എന്നിവയിൽ പുതിയ തുടക്കങ്ങൾ കുറിക്കാനും ലക്ഷ്യങ്ങൾ നിശ്ചയിക്കാനും ഉപയോഗിക്കുന്നു. എന്നാൽ വെളുത്ത വാവ് അഥവാ പൗർണ്ണമി സമയം എന്നത് കൃതജ്ഞത പ്രകടിപ്പിക്കാനും, മാനസികമായ ഭാരങ്ങൾ ഇറക്കിവെക്കാനും, പുതിയൊരു തുടക്കത്തിന് മുൻപായി പഴയ കാര്യങ്ങൾക്ക് വ്യക്തമായ ഒരു അവസാനം കുറിക്കാനും ഉള്ള സമയമാണ്.

ആരോഗ്യവും സമ്പത്തും: വ്യത്യസ്തമായ ലക്ഷ്യങ്ങൾ

ആരോഗ്യത്തിനും സമ്പത്തിനും വേണ്ടി ഒരേസമയം ഒരൊറ്റ വാചകത്തിൽ ആഗ്രഹങ്ങൾ ദൃഢീകരിക്കുന്നതിന് പകരം രണ്ടിനും പ്രത്യേകമായി ലക്ഷ്യങ്ങൾ നിശ്ചയിക്കാനാണ് ആത്മീയ കോച്ചുകൾ നിർദ്ദേശിക്കുന്നത്. ആരോഗ്യത്തിനായി ഊർജ്ജം, ശാരീരിക ശക്തി, മാനസിക സൌഖ്യം എന്നിവയിലാണ് ശ്രദ്ധിക്കേണ്ടത്. എന്നാൽ സമ്പത്തിന്റെ കാര്യത്തിലേക്ക് വരുമ്പോൾ വെറും പണത്തിന് പിന്നാലെ പോകാതെ നല്ല അവസരങ്ങൾ, സാമ്പത്തിക അച്ചടക്കം, അർത്ഥവത്തായ ജോലി, സമൃദ്ധി എന്നിവയ്ക്കായിരിക്കണം മുൻഗണന നൽകേണ്ടത്.

മനശാസ്ത്രജ്ഞരുടെ അഭിപ്രായത്തിൽ ധ്യാനം, നന്ദി പ്രകടിപ്പിക്കൽ, പോസിറ്റീവ് വിഷ്വലൈസേഷൻ എന്നിവ മാനസിക സമ്മർദ്ദം കുറയ്ക്കാനും ഏകാഗ്രത കൂട്ടാനും ലക്ഷ്യബോധത്തോടെയുള്ള പെരുമാറ്റത്തെ പ്രോത്സാഹിപ്പിക്കാനും സഹായിക്കും. എന്നാൽ ഇവയൊന്നും ഒരിക്കലും കൃത്യമായ വൈദ്യചികിത്സയ്ക്കോ, പ്രൊഫഷണൽ സാമ്പത്തിക ആസൂത്രണങ്ങൾക്കോ അല്ലെങ്കിൽ പ്രായോഗികമായ പ്രവൃത്തികൾക്കോ പകരമാവില്ല. വിഷ്വലൈസേഷൻ എന്നത് ചിന്തകളെ ലക്ഷ്യത്തിലേക്ക് നയിക്കാനുള്ള ഒരു മാർഗ്ഗം മാത്രമാണ്. ആരോഗ്യപരമായ പ്രശ്നങ്ങൾക്ക് ഒരു ഡോക്ടറുടെ ഉപദേശവും, സാമ്പത്തിക തീരുമാനങ്ങൾക്ക് കൃത്യമായ വിദഗ്ദ്ധോപദേശവും തേടേണ്ടത് അനിവാര്യമാണ്.