വര്‍ക്ക്ഔട്ട് ബോഡിക്കു മാത്രം മതിയോ, തലച്ചോറിനും വേണ്ടേ? തലച്ചോറിനുള്ള വര്‍ക്ക്ഔട്ടുകള്‍ ഇതാ

ശരീര സംരക്ഷണത്തിനായി മണിക്കൂറുകളോളം ജിമ്മില്‍ ചിലവഴിക്കുന്നവരുണ്ട്. കൈയ്ക്കും കാലിനും വയറിനും നടുവിനുമെല്ലാമുള്ള വ്യായാമങ്ങള്‍ ജിമ്മിലുണ്ട്. ജിമ്മില്‍ പോകാന്‍ കഴിയാത്തവര്‍ രാവിലെയും വൈകിട്ടും ദീര്‍ഘദൂരം നടന്നും ശരീരത്തിന് ആവശ്യമായ വ്യായാമം കൊടുക്കാറുണ്ട്. എന്നാല്‍ ശാരീരിക ആരോഗ്യം നിലനിര്‍ത്താന്‍ വ്യായാമം ചെയ്യുന്നത് പോലെ തന്നെ തലച്ചോറിനും വ്യായാമം വേണമെന്ന് ആരോഗ്യ വിദഗ്ധര്‍ പറയുന്നു. എങ്ങനെയാണ് തലച്ചോറിന് വ്യായാമം നല്‍കുന്നതെന്ന് പലര്‍ക്കും സംശയം തോന്നാം.

മറ്റേതൊരു അവയവവും പോലെ തന്നെയാണ് മസ്തിഷ്‌കം. അത് കൃത്യമായി ഉപയോഗിക്കുന്നില്ലെങ്കില്‍, പ്രവര്‍ത്തനം മന്ദഗതിയിലാകും. ഭാഷ പഠിക്കുക, ചെസ് പോലെയുള്ള കളികള്‍ കളിക്കുക, ഹോബികള്‍ വളര്‍ത്തിയെടുക്കുക, ആഴത്തില്‍ വായിക്കുക, അര്‍ത്ഥവത്തായ സംഭാഷണങ്ങള്‍ നടത്തുക തുടങ്ങിയ കാര്യങ്ങളിലൂടെ തലച്ചോറിന്റെ ഊര്‍ജസ്വലത നിലനിര്‍ത്താം.

പുതിയ കാര്യങ്ങള്‍ പഠിക്കാന്‍ ശ്രമിക്കുന്നതിലൂടെ തലച്ചോറില്‍ പുതിയ കണക്ഷനുകള്‍ രൂപപ്പെടാന്‍ സഹായിക്കും. ഇത് ചിന്താശേഷിയും ഓര്‍മ്മശക്തിയും വര്‍ധിപ്പിക്കാന്‍ സഹായിക്കുന്ന ഒന്നാണ്. സുഡോകു പോലുള്ള പസിലുകള്‍ പരിഹരിക്കുന്നതും പുതിയ ഭാഷകളോ സംഗീത ഉപകരണങ്ങളോ പഠിക്കുന്നതും തലച്ചോറിനെ ഉന്മേഷത്തോടെ നിലനിര്‍ത്താന്‍ സഹായിക്കും.

പലപ്പോഴും നമ്മള്‍ ഒരേസമയം ഒന്നിലധികം ജോലികള്‍ ചെയ്യാന്‍ ശ്രമിക്കാറുണ്ട്. എന്നാല്‍ ഇത്തരം മള്‍ട്ടിടാസ്‌കിങ് രീതി തലച്ചോറിന്റെ പ്രവര്‍ത്തനക്ഷമത കുറയ്ക്കുമെന്നും ശ്രദ്ധ കേന്ദ്രീകരിക്കുന്നത് ബുദ്ധിമുട്ടിലാക്കുമെന്നും ഡോക്ടര്‍ പറയുന്നു. അതുപോലെ തന്നെ ഡിജിറ്റല്‍ ഉപകരണങ്ങളെ അമിതമായി ആശ്രയിക്കുന്നതും ജിപിഎസ് പോലുള്ള സൗകര്യങ്ങള്‍ എപ്പോഴും ഉപയോഗിക്കുന്നതും തലച്ചോറിന്റെ സ്വയം ചിന്തിക്കാനുള്ള ശേഷിയെ ബാധിച്ചേക്കാം.

ദൈനംദിന ജീവിതത്തില്‍ എല്ലാ സംശയങ്ങള്‍ക്കും ആര്‍ട്ടിഫിഷ്യസ് ഇന്റലിജന്റസിനെ ആശ്രയിക്കുന്നത് പ്രശ്‌നങ്ങള്‍ പരിഹരിക്കാനുള്ള നിങ്ങളുടെ ചിന്താശേഷിയെ ബാധിക്കുമെന്നും വിദഗ്ധര്‍ മുന്നറിയിപ്പു നല്‍കുന്നു.

മനസിനെ ശാന്തമാക്കുന്ന ധ്യാനം ശീലിക്കുന്നത് മാനസിക സമ്മര്‍ദം കുറയ്ക്കാനും ശ്രദ്ധ വര്‍ധിപ്പിക്കാനും സഹായിക്കും. മറ്റുള്ളവരുമായി ഇടപഴകുന്നതും നല്ല സാമൂഹിക ബന്ധങ്ങള്‍ സൂക്ഷിക്കുന്നതും തലച്ചോറിന്റെ ആരോഗ്യം വര്‍ധിപ്പിക്കുന്ന ലളിതമായ വഴികളാണ്. നിത്യജീവിതത്തിലെ കാര്യങ്ങള്‍ മറന്നുപോവുക, തീരുമാനങ്ങള്‍ എടുക്കാന്‍ ബുദ്ധിമുട്ട് അനുഭവപ്പെടുക, ദൈനംദിന ജോലികള്‍ പൂര്‍ത്തിയാക്കാന്‍ കൂടുതല്‍ സമയമെടുക്കുക, തീയതികള്‍ ഓര്‍ക്കാന്‍ ബുദ്ധിമുട്ടുക, ഒരേ കാര്യങ്ങള്‍ ആവര്‍ത്തിച്ചു ചോദിക്കുക എന്നിവ തലച്ചോറിന്റെ ആരോഗ്യത്തില്‍ ശ്രദ്ധ നല്‍കേണ്ടതിന്റെ മുന്നറിയിപ്പുകളായി കാണണം. ദിവസവും ലളിതമായ ഇത്തരം ശീലങ്ങള്‍ പിന്തുടരുന്നത് തലച്ചോറിനെ കൂടുതല്‍ വേഗതയുള്ളതും ആരോഗ്യവുമുള്ളതാക്കി മാറ്റാന്‍ സഹായിക്കും.