പാചകം അലുമിനിയം പാത്രത്തിലെങ്കിൽ ആരോഗ്യം അപകടത്തിലെന്ന് മുന്നറിയിപ്പ്

അടുക്കളയിൽ ദൈനംദിന പാചകത്തിനും ഭക്ഷണ ആവശ്യത്തിനും അലുമിനിയം പാത്രങ്ങൾ നമ്മൾ സ്ഥിരമായി ഉപയോഗിക്കാറുണ്ട്. ഭാരം കുറഞ്ഞതും ചൂട് നന്നായി കടത്തിവിടുന്നതുമായത് കൊണ്ട് ഉപയോഗത്തിനും എളുപ്പമാണ്. പക്ഷെ സ്ഥിരമായി അലുമിനിയം പാത്രങ്ങളിലെ പാചകം ആരോഗ്യത്തിന് ഹാനികരമാണെന്ന് വിദ​ഗ്ധർ മുന്നറിയിപ്പ് നൽകുന്നു. കാരണം അലുമിനിയം പാത്രങ്ങളിൽ ഭക്ഷണം പാകം ചെയ്യുമ്പോൾ ഭക്ഷണത്തിലെ പോഷകഗുണങ്ങൾ വൻതോതിൽ നഷ്ടപ്പെടുന്നു. ഇത്തരം പാത്രങ്ങളിൽ പാകം ചെയ്യുന്ന ഭക്ഷണത്തിൽ വെറും 20 ശതമാനത്തിൽ താഴെ പോഷകങ്ങൾ മാത്രമേ അവശേഷിക്കുന്നുള്ളൂ എന്ന് അവർ ചൂണ്ടിക്കാട്ടുന്നു.

അലുമിനിയം ആരോഗ്യത്തിനും ജീവനും ഒരുപോലെ ഭീഷണിയാണെന്നും ഇത് ശരീരത്തിന് വിഷതുല്യമാണെന്നുമാണ് ഡോക്ടർമാരും മുന്നറിയിപ്പ് തരുന്നു. നിരവധി മെഡിക്കൽ പഠനങ്ങൾ ഇത് ശരിവയ്ക്കുന്നുണ്ട്. അലുമിനിയം പാത്രങ്ങളുടെ ദീർഘകാല ഉപയോഗം അൽഷിമേഴ്‌സ് പോലുള്ള ഗുരുതരമായ നാഡീരോഗങ്ങൾക്ക് കാരണമായേക്കാം. അലുമിനിയം അംശങ്ങൾ ശരീരത്തിൽ കലരുന്നത് തലച്ചോറിന്റെ ആരോഗ്യത്തെ ദോഷകരമായി ബാധിക്കും. അലുമിനിയം പാത്രങ്ങളിലെ പാചകം രക്തത്തിലെ അലുമിനിയത്തിന്റെ അളവ് വർദ്ധിപ്പിക്കാനും ക്രമേണ ഓർമ്മശക്തി കുറയാനും കാരണമാകുന്നു.

പുളിയുള്ളതോ (തക്കാളി, വിനാഗിരി) ഉപ്പുള്ളതോ ആയ ഭക്ഷണങ്ങൾ അലുമിനിയം പാത്രങ്ങളിൽ പാകം ചെയ്യുന്നത് അലുമിനിയം വേഗത്തിൽ കലരാൻ കാരണമാകും. അതിനാൽ അത്തരം ഭക്ഷണങ്ങൾ പാചകം ചെയ്യാൻ അലുമിനിയം പാത്രങ്ങൾ ഒഴിവാക്കുന്നതാണ് നല്ലത്. അലുമിനിയം പാത്രങ്ങൾ ഉപയോഗിക്കുമ്പോൾ അനോഡൈസ്ഡ് (anodized) ചെയ്തവ തിരഞ്ഞെടുക്കാൻ ശ്രമിക്കുക. ഇത് അലുമിനിയം ഭക്ഷണത്തിലേക്ക് കലരുന്നത് തടയാൻ സഹായിക്കും.

മിതമായ രീതിയിൽ ഉപയോഗിക്കുകയാണെങ്കിൽ അലുമിനിയം പാത്രങ്ങൾ വലിയ ആരോഗ്യപ്രശ്നങ്ങൾ ഉണ്ടാക്കില്ലെന്നാണ് പൊതുവായ നിഗമനം. എങ്കിലും, പൂർണ്ണമായും സുരക്ഷിതമായ മറ്റ് മാർഗ്ഗങ്ങൾ തിരഞ്ഞെടുക്കുന്നതാണ് ഉചിതം. ഭക്ഷണത്തിലെ പോഷകങ്ങൾ നിലനിർത്താനും ദീർഘകാല ആരോഗ്യപ്രശ്നങ്ങൾ ഒഴിവാക്കാനും സ്റ്റീൽ, മൺപാത്രങ്ങൾ തുടങ്ങിയ സുരക്ഷിതമായ ബദൽ മാർഗ്ഗങ്ങൾ തിരഞ്ഞെടുക്കാവുന്നതാണ്.