അടുക്കളയിലെ മാജിക്, മുഖം തിളങ്ങാൻ ഈ പാക്കുകൾ പരീക്ഷിച്ച് നോക്കൂ, 15 മിനുറ്റ് കൊണ്ട് ഫലം

മൃദുലവും തിളക്കമുള്ളതുമായ ചർമ്മം ലഭിക്കാൻ നിങ്ങൾ ആഗ്രഹിക്കുന്നുണ്ടോ, എന്നാൽ സങ്കീർണ്ണമായ ചർമ്മ സംരക്ഷണ ദിനചര്യകൾക്ക് സമയമില്ലേ? എങ്കിൽ ഇതാ ഒരു സന്തോഷവാർത്ത. നിങ്ങളുടെ അടുക്കളയിൽ ഇതിനാവശ്യമായ എല്ലാ സാധനങ്ങളും ഉണ്ട്.

നമ്മുടെ വീടുകൾ പണ്ടുമുതലേ സൗന്ദര്യവർദ്ധക വസ്തുക്കളുടെ ഒരു ചെറിയ കലവറയാണ്. മഞ്ഞൾപ്പൊടി, പാൽപ്പാട, അല്ലെങ്കിൽ എപ്പോഴും വിശ്വസിക്കാവുന്ന കടലമാവ് തുടങ്ങി നമ്മുടെ മുത്തശ്ശിമാരുടെ അറിവുകൾ പല ആധുനിക സെറമുകളെയും പിന്നിലാക്കുന്നതാണ്. വളരെ ചുരുങ്ങിയ സമയം കൊണ്ട്, അതായത് 15 മിനിറ്റിനുള്ളിൽ തയ്യാറാക്കാവുന്ന ഈ ഡിഐവൈ മാസ്കുകൾ മികച്ച ഫലം നൽകും.

1. പാല്‍പ്പാടയും തേനും ചേര്‍ന്ന മാസ്ക്

ചർമ്മത്തിന് പെട്ടെന്ന് മൃദുത്വം നൽകുന്ന കാര്യത്തിൽ പാല്‍പ്പാടയെ വെല്ലാൻ മറ്റൊന്നുമില്ല. തലമുറകളായി ഉപയോഗിച്ചുവരുന്ന ഈ രഹസ്യം ചർമ്മത്തിന് തിളക്കവും ഈർപ്പവും നൽകുന്നു. തേൻ ഇതിന് കൂടുതൽ മിനുസം നൽകുന്നു.

ആവശ്യമുള്ളവ: ഒരു ടേബിൾസ്പൂൺ പാല്‍പ്പാട, ഒരു ടീസ്പൂൺ തേൻ.

ഉപയോഗിക്കേണ്ട വിധം: ഈ രണ്ട് ചേരുവകളും ചേർത്ത് ഒരു ക്രീം രൂപത്തിലാക്കുക. ഇത് മുഖത്ത് നന്നായി തേച്ചുപിടിപ്പിക്കുക. 10 മിനിറ്റിനു ശേഷം ഇളം ചൂടുവെള്ളത്തിൽ കഴുകി കളയുക.

പാല്‍പ്പാടയിൽ ധാരാളം പ്രകൃതിദത്ത കൊഴുപ്പുകൾ അടങ്ങിയിട്ടുള്ളതിനാൽ ചർമ്മത്തിലെ വരണ്ട ഭാഗങ്ങളെ തൽക്ഷണം മൃദുവാക്കുന്നു. തേൻ ഒരു ഹ്യൂമെക്ടന്റായി പ്രവർത്തിച്ച് ചർമ്മത്തിലേക്ക് ഈർപ്പം ആകർഷിക്കുന്നു. വരണ്ടതും മങ്ങിയതുമായ, തണുപ്പുകാലത്ത് ക്ഷീണിച്ച ചർമ്മത്തിന് ഇത് ഏറ്റവും ഉത്തമമാണ്.

2. കടലമാവ്, മഞ്ഞൾ, തൈര് മാസ്ക്

DIY ചർമ്മ സംരക്ഷണത്തിലെ ഒരു 'സൂപ്പർഹീറോ' കൂട്ടുകെട്ടാണ് ഈ മാസ്ക്. ചർമ്മം മിനുസമല്ലാത്തതും എണ്ണമയമുള്ളതുമാണെങ്കിൽ ഈ കൂട്ട് ഉത്തമമാണ്.

ആവശ്യമുള്ളവ: ഒരു ടേബിൾസ്പൂൺ കടലമാവ്, ഒരു നുള്ള് മഞ്ഞൾ, 1-2 ടീസ്പൂൺ തൈര്.

ഉപയോഗിക്കേണ്ട വിധം: ഇവയെല്ലാം ചേർത്ത് മൃദലമായ ഒരു പേസ്റ്റ് രൂപത്തിലാക്കുക. മുഖത്തു തേച്ച് 12-15 മിനിറ്റ് കാത്തിരിക്കുക. മാസ്ക് ഉണങ്ങി മുറുക്കം തോന്നിത്തുടങ്ങുമ്പോൾ കഴുകിക്കളയാം.

കടലമാവ് നിർജ്ജീവ ചർമ്മത്തെ നീക്കം ചെയ്യുമ്പോൾ, മഞ്ഞൾ വീക്കം ശമിപ്പിക്കുന്നു. തൈരിലെ ലാക്ടിക് ആസിഡ് ചർമ്മത്തെ മിനുസപ്പെടുത്തുന്നു. ഇവയെല്ലാം ചേർന്ന് ചർമ്മത്തിന് പെട്ടെന്ന് തിളക്കം നൽകുന്നു. കരിവാളിപ്പ് മാറാനും, മിനുസമില്ലാത്ത ചർമ്മത്തിനും, മധ്യവാരത്തിലെ തിളക്കത്തിനും ഇത് മികച്ചതാണ്.

3. വാഴപ്പഴവും പാലും ചേര്‍ന്ന മാസ്ക്

നിങ്ങളുടെ ഫ്രൂട്ട് ബാസ്കറ്റിൽ ഒരുപാട് പഴുത്ത വാഴപ്പഴം ഉണ്ടെങ്കിൽ അത് വലിച്ചെറിയേണ്ട, നിങ്ങളുടെ ചർമ്മത്തിന് അത് ഉപകാരപ്പെട്ടേക്കും.

ആവശ്യമുള്ളവ: പകുതി പഴുത്ത വാഴപ്പഴം, ഒരു ടേബിൾസ്പൂൺ പാൽ .

ഉപയോഗിക്കേണ്ട വിധം: വാഴപ്പഴം നല്ലതുപോലെ ഉടച്ചെടുത്ത് പാൽ ചേർക്കുക, ശേഷം മുഖത്ത് പുരട്ടുക. 10 മിനിറ്റിൽ കൂടുതൽ വെക്കേണ്ടതില്ല, അധികനേരം വച്ചാൽ വൃത്തിയാക്കാൻ പ്രയാസമായിരിക്കും.

വാഴപ്പഴത്തിൽ പൊട്ടാസ്യവും ആന്റിഓക്സിഡന്റുകളും ധാരാളം അടങ്ങിയിട്ടുള്ളതിനാൽ ചർമ്മത്തെ മൃദുവാക്കുകയും ശാന്തമാക്കുകയും ചെയ്യുന്നു. പാൽ മിതമായ രീതിയിൽ നിർജ്ജീവ ചർമ്മം നീക്കം ചെയ്യാനും തിളക്കം നൽകാനും സഹായിക്കുന്നു.

4. കറ്റാർവാഴയും പനിനീരും ചേർന്ന ജെൽ മാസ്ക്

സെൻസിറ്റീവ് അല്ലെങ്കിൽ മുഖക്കുരു സാധ്യതയുള്ള ചർമ്മക്കാർക്ക് ഈ മാസ്ക് ഒരു അനുഗ്രഹമാണ്. ഇത് വളരെ ലളിതവും, ഒട്ടിപ്പിടിക്കാത്തതുമാണ്. ഒരു സ്പാ ചികിത്സ പോലെ സുഖകരമായ അനുഭവമാണ് ഇത് നൽകുന്നത്.

ആവശ്യമുള്ളവ: 2 ടേബിൾസ്പൂൺ ശുദ്ധമായ കറ്റാർവാഴ ജെൽ , 1 ടീസ്പൂൺ പനിനീർ.

ഉപയോഗിക്കേണ്ട വിധം: ഇവ രണ്ടും ചേർത്ത് നേർത്ത പാളിയായി മുഖത്ത് പുരട്ടുക. 12-15 മിനിറ്റ് വിശ്രമിച്ച ശേഷം കഴുകി കളയുക.

കറ്റാർവാഴ ചർമ്മത്തെ നന്നാക്കുകയും സുഷിരങ്ങൾ അടയാതെ ഈർപ്പം നിലനിർത്തുകയും ചെയ്യുന്നു. പനിനീർ ചർമ്മത്തിന് ടോണിംഗ് നൽകി പുതുമയും മൃദുലതയും നൽകുന്നു. സൂര്യപ്രകാശമേറ്റ ചർമ്മത്തിനും, ചുവന്ന പാടുകൾക്കും, ക്ഷീണിച്ച ചർമ്മത്തിനും ഇത് മികച്ചതാണ്.

5. ഓട്‌സും വെളിച്ചെണ്ണയും ചേര്‍ന്ന സ്ക്രബ്-മാസ്ക്

ഈ മിശ്രിതം ഒരു ഫെയ്സ് സ്ക്രബ് ആയും മാസ്ക് ആയും ഉപയോഗിക്കാം. നിങ്ങളുടെ ചർമ്മത്തിന് ചെറിയ മിനുക്കുപണികൾ ആവശ്യമാണെന്ന് തോന്നുന്നുവെങ്കിൽ ഈ മൃദലമായ കൂട്ട് ഫലപ്രദമാണ്.

ആവശ്യമുള്ളവ: ഒരു ടേബിൾസ്പൂൺ പൊടിച്ച ഓട്‌സ്, ഒരു ടീസ്പൂൺ വെളിച്ചെണ്ണ, ഒരു ടീസ്പൂൺ ചെറുചൂടുവെള്ളം (ആവശ്യമെങ്കിൽ).

ഉപയോഗിക്കേണ്ട വിധം: ഇവയെല്ലാം ചേർത്ത് ഒരു പേസ്റ്റ് രൂപത്തിലാക്കുക. ഒരു മിനിറ്റ് സമയം വളരെ മൃദുവായി മസാജ് ചെയ്യുക. ശേഷം 10 മിനിറ്റ് മുഖത്ത് വച്ച ശേഷം കഴുകിക്കളയുക.

ഓട്‌സ് ചർമ്മത്തെ ശാന്തമാക്കുകയും നിർജ്ജീവ ചർമ്മം നീക്കം ചെയ്യുകയും ചെയ്യുമ്പോൾ, വെളിച്ചെണ്ണ ചർമ്മത്തിന് മികച്ച മൃദുത്വം നൽകുന്നു. ചർമ്മം മിനുസമുള്ളതും നിറഞ്ഞതും സ്പർശനയോഗ്യവുമാകുന്നു. വരണ്ടതും, പരുക്കനുമായ അല്ലെങ്കിൽ തണുപ്പുകാലത്ത് പൊട്ടുന്ന ചർമ്മത്തിന് ഇത് ഏറ്റവും ഉത്തമമാണ്.

മാസ്കുകൾ ഉപയോഗിക്കുന്നതിന് മുമ്പ് ശ്രദ്ധിക്കേണ്ട കാര്യങ്ങൾ നോക്കാം. എപ്പോഴും പാച്ച് ടെസ്റ്റ് ചെയ്യുക എന്നത് പ്രധാനമാണ്. പ്രകൃതിദത്ത ചേരുവകൾ പോലും ചിലപ്പോൾ ചർമ്മത്തിൽ അസ്വസ്ഥതകളുണ്ടാക്കാം. കൂടുതൽ ചേരുവകൾ ഒരുമിച്ച് കലർത്താതിരിക്കുക. ചർമ്മ സംരക്ഷണത്തിൽ കുറഞ്ഞത് എപ്പോഴും നല്ലതാണ്.

മുഖം കഴുകാൻ തണുത്തതോ ഇളം ചൂടുവെള്ളമോ ഉപയോഗിക്കുക. ചൂടുവെള്ളം ചർമ്മത്തിലെ സ്വാഭാവിക ഈർപ്പം ഇല്ലാതാക്കും. മാസ്കിന് ശേഷം ഒരു ലൈറ്റ് മോയ്‌സ്ചറൈസർ ഉപയോഗിക്കാൻ ശ്രമിക്കുക. ഇത് ചർമ്മത്തിന്റെ മൃദുത്വം നിലനിർത്താൻ സഹായിക്കുന്ന പ്രധാന ഘടകമാണ്. തുടർച്ചയായ ഉപയോഗത്തിലൂടെ മികച്ച ഫലങ്ങൾ നേടാൻ സാധിക്കും. അതിനാൽ ആഴ്ചയിൽ ഒന്നോ രണ്ടോ തവണ ഈ മാസ്കുകൾ ഉപയോഗിക്കുക. ചർമ്മത്തിന് വേണ്ടത് പരിചരണമാണ്, വിലകൂടിയ ഉൽപ്പന്നങ്ങളല്ല