നിങ്ങളുടെ പറമ്പിൽ പാമ്പ് ശല്യമുണ്ടോ? ഈ ചെടികൾ വളർത്തിയാൽ മതി, പാമ്പ് പമ്പ കടക്കും

Updated: Wednesday, January 21, 2026, 19:02 [IST]

പൂന്തോട്ടങ്ങളിലെ പാമ്പ് ശല്യം പലർക്കും വലിയൊരു പ്രശ്നമാണ്. വിഷമുള്ള പാമ്പുകൾ മനുഷ്യന് ഭീഷണിയുയർത്തുന്നു. ഒരു പാമ്പ് ഇഴഞ്ഞെത്തുന്നത് പരിചയസമ്പന്നരായ തോട്ടക്കാരനെ പോലും മുൾമുനയിലാക്കും. കീടങ്ങളെ നിയന്ത്രിക്കുന്നതിൽ പാമ്പുകൾക്ക് പ്രാധാന്യമുണ്ടെങ്കിലും, വീട്ടുമുറ്റത്ത് അവയെ വളർത്താനാവില്ലല്ലോ.

പാമ്പുകളെ ഉപദ്രവിക്കാതെയും സ്വയം അപകടപ്പെടുത്താതെയും പൂന്തോട്ടത്തിൽനിന്ന് എങ്ങനെ അകറ്റിനിർത്താം? പാമ്പുകൾക്ക് ഇഷ്ടമില്ലാത്ത സസ്യങ്ങൾ നട്ടുപിടിപ്പിക്കുകയെന്നതാണ് പ്രകൃതി സൗഹൃദപരമായ ഒരു വഴി. ശക്തമായ ഗന്ധമോ രൂക്ഷമായ ഘടനയോ ഉള്ള ചില ചെടികൾക്ക് പാമ്പുകളെ അകറ്റാനുള്ള കഴിവുണ്ടെന്ന് പഠനങ്ങൾ പറയുന്നു.

നിങ്ങളുടെ പൂന്തോട്ടത്തിൽ ചേർക്കാൻ കഴിയുന്നതും പാമ്പുകൾക്ക് വെറുപ്പുള്ളതുമായ ആറ് സസ്യങ്ങളെ പരിചയപ്പെടാം. ചെണ്ടുമല്ലിയാണ് ഇതിലൊന്ന്. ഈ വാർഷിക പുഷ്പത്തിന്റെ ഗന്ധം പാമ്പുകൾക്ക് അരോചകമാണ്. വിഷപ്പാമ്പുകളുടെ ശല്യമുണ്ടെങ്കിൽ, ചെണ്ടുമല്ലി തന്ത്രപരമായി നട്ടാൽ അവ വേഗത്തിൽ അകന്നുപോകും. വേരുകളിലെയും ഇലകളിലെയും 'ആൽഫാ-ടെർട്ടീനിയൽ' പോലുള്ള സംയുക്തങ്ങളാണ് ഈ ഫലത്തിന് പിന്നിൽ.

നാരങ്ങപ്പുല്ലാണ് പാമ്പുകൾക്ക് ഇഷ്ടമല്ലാത്ത മറ്റൊരു സസ്യം. മനുഷ്യർക്ക് പ്രിയപ്പെട്ട സിട്രസ് മണമുള്ള ഈ പുല്ല് പാമ്പുകൾ വെറുക്കുന്നു. നാരങ്ങപ്പുല്ലിൽ അടങ്ങിയിരിക്കുന്ന സിട്രോണെല്ല കൊതുകുകളെയും പ്രാണികളെയും അകറ്റാൻ ഉപയോഗിക്കാറുണ്ട്. ഇത് പൂന്തോട്ടത്തിന് ചുറ്റും അതിരുകളായി നടുന്നത് വളരെ ഫലപ്രദമാകും.

അടുക്കളയിൽ ഉപയോഗിക്കുന്ന വെളുത്തുള്ളിയുടെ ശക്തമായ സൾഫർ ഗന്ധവും പാമ്പുകളെ അകറ്റാൻ സഹായിക്കും. വെളുത്തുള്ളി, സവാള, ചൈവ്സ് തുടങ്ങിയ 'അല്ലിയം' കുടുംബ സസ്യങ്ങളിലെ സംയുക്തങ്ങൾ പാമ്പുകളുടെ സംവേദനശേഷിയെ ബാധിക്കും. പൂന്തോട്ടത്തിന്റെ അരികുകളിൽ വെളുത്തുള്ളി നടുന്നത് ഉചിതമാണ്.

ഇന്ത്യൻ സ്നേക്ക്റൂട്ട് അഥവാ സർപ്പഗന്ധിക്ക് അതിരൂക്ഷമായ ഗന്ധം കാരണം പാമ്പുകളെ അകറ്റാനുള്ള കഴിവുണ്ട്. ഈ സസ്യം പരമ്പരാഗത ആയുർവേദ മരുന്നുകളിലും ഉപയോഗിക്കുന്നു. പാമ്പുകളെ അകറ്റുന്ന ഈ സസ്യം പൂന്തോട്ടങ്ങളിൽ വ്യാപകമായി ശുപാർശ ചെയ്യപ്പെടുന്നുണ്ട്. വാതിലുകൾക്കരികിലും പൂന്തോട്ട അതിരുകളിലും ഇത് നടാം.

വേംവുഡിന്റെ രൂക്ഷവും കയ്പേറിയതുമായ മണം പാമ്പുകൾക്ക് ഇഷ്ടമല്ല. പാമ്പുകൾക്ക് മാത്രമല്ല, മറ്റ് പല മൃഗങ്ങൾക്കും വേംവുഡ് ആകർഷകമല്ല. ഈ സസ്യത്തിന്റെ സുഗന്ധമുള്ള ഇലകളിലെ സംയുക്തങ്ങൾ പാമ്പുകളെ പൂന്തോട്ടത്തിൽ പ്രവേശിക്കുന്നത് തടയും.

തുളസി അഥവാ ബേസിൽ, പ്രത്യേകിച്ച് ഗ്രാമ്പൂ തുളസി എന്നിവയുടെ ശക്തമായ ഗന്ധവും പാമ്പുകൾക്ക് അരോചകമാണ്. പുതിന കുടുംബത്തിൽപ്പെട്ട ഈ സസ്യങ്ങളിലെ എണ്ണകൾ പാമ്പുകൾക്ക് ഇഷ്ടമല്ലാത്തതിനാൽ ഇവയും ഫലപ്രദമാണ്. പുല്ല് വെട്ടിയൊതുക്കി സൂക്ഷിക്കുന്നതും പാമ്പുകളെ അകറ്റാൻ സഹായകമാകും.

ഈ സസ്യങ്ങൾ പൂന്തോട്ടത്തെ പാമ്പുകൾക്ക് അത്ര ആകർഷകമല്ലാതാക്കാൻ സഹായിക്കുമെങ്കിലും, പൂർണ്ണമായ സംരക്ഷണം ഉറപ്പുനൽകില്ല. പാമ്പുകൾക്കെതിരെ ഒരു പ്രതിരോധം തീർക്കുക എന്നതാണ് ഈ പ്രകൃതിദത്ത മാർഗ്ഗങ്ങളുടെ പ്രധാന ലക്ഷ്യം. അവയെ അകറ്റിനിർത്തി നിങ്ങളുടെ പൂന്തോട്ടത്തെ ഈ ഇഴജന്തുക്കളിൽ നിന്ന് ഫലപ്രദമായി സംരക്ഷിക്കാം. ഈ ചെടികൾ പൂന്തോട്ടത്തിലോ പുൽത്തകിടിയിലോ നട്ടുപിടിപ്പിച്ച് പാമ്പുകൾ അപ്രത്യക്ഷമാകുന്നത് നേരിട്ട് കാണുക.