മഴക്കാലത്ത് സണ്‍സ്‌ക്രീന്‍ വേണോ? വേണമെന്ന് സൗന്ദര്യ വിദഗ്ധര്‍: കാരണം ഇതാണ്

ചുട്ടുപൊള്ളുന്ന വേനലില്‍ നിന്ന് മഴക്കാലത്തിലേക്കു മാറുമ്പോള്‍ വലിയ ആശ്വാസമാണ് ശരീരത്തിന് ലഭിക്കുന്നത്. മഴക്കാലത്ത് അധിക സൗന്ദര്യ സംരക്ഷണത്തിന് ആരും മിനക്കടാറില്ല. കാരണം ശരീരത്തില്‍ ഏല്‍ക്കുന്ന സൂര്യ രശ്മികളുടെ തീവ്രത കുറവായതിനാല്‍ തന്നെ ചര്‍മ്മത്തിന് വലിയ ക്ഷീണം അനുഭവപ്പെടാറില്ല.

വെയിലില്ലാത്തതിനാല്‍ പുറത്തു പോകുമ്പോള്‍ പലരും സണ്‍സ്‌ക്രീന്‍ ഉപയോഗിക്കാറില്ല. എന്നാല്‍ ഇത് ശരിയല്ലെന്നാണ് സൗന്ദര്യ വിദഗ്ധര്‍ പറയുന്നത്. ആകാശം മൂടിക്കെട്ടിയിരുന്നാല്‍ പോലും പോലും സൂര്യനില്‍ നിന്നുള്ള അള്‍ട്രാ വയലറ്റ് രശ്മികള്‍ ചര്‍മ്മത്തിലെത്തുന്നു. ചര്‍മ്മത്തിന് കേടുപാടുകള്‍ ഉണ്ടാക്കാന്‍ സൂര്യരശ്മികള്‍ക്ക് സാധിക്കും. മേഘങ്ങള്‍ക്ക് 50% അള്‍ട്രാവയലറ്റ് രശ്മികള്‍ തടയാന്‍ മാത്രമേ ശേഷിയുള്ളൂ. ബാക്കി 50 ശതമാനം നേരിട്ട് ചര്‍മ്മത്തിലേക്ക് എത്തും.

ചര്‍മ്മത്തിലേക്ക് ആഴ്ന്നിറങ്ങുന്ന അള്‍ട്രാ വയലറ്റ് രശ്മികള്‍ അകാല വാര്‍ധക്യം, ചര്‍മ്മ കാന്‍സറുകള്‍ എന്നിവയ്ക്ക് പോലും കാരണമാകും. ഈര്‍പ്പമുള്ള അന്തരീക്ഷവും വിയര്‍പ്പും കൂടിച്ചേരുമ്പോള്‍ അത് മുഖക്കുരു അടക്കമുള്ള ചര്‍മ്മ പ്രശ്‌നങ്ങള്‍ക്ക് കാരണമാകുന്നു.

സണ്‍സ്‌ക്രീന്‍ പതിവായി ഉപയോഗിക്കുന്നത് ചര്‍മ്മത്തെ സംരക്ഷിക്കുകയും ആരോഗ്യത്തോടെ നിലനിര്‍ത്തുകയും ചെയ്യും. ഈര്‍പ്പമുള്ള കാലാവസ്ഥയ്ക്ക് അനുയോജ്യമായ, ഒട്ടാത്ത തരത്തിലുള്ള സണ്‍സ്‌ക്രീന്‍ തിരഞ്ഞെടുക്കുക. സൂര്യപ്രകാശം ഏല്‍ക്കുന്നതിന് 15, 20 മിനിറ്റ് മുമ്പ് എങ്കിലും സണ്‍സ്‌ക്രീന്‍ മുഖത്ത് പുരട്ടുക.

മഴക്കാലത്ത് ചര്‍മ്മത്തിന് ഉണ്ടാകുന്ന ഈര്‍പ്പത്തില്‍ അഴുക്കും ബാക്ടീരിയയും അടിഞ്ഞു കൂടാന്‍ സാധ്യതയുണ്ട്. ഇത് മുഖക്കുരുവിലേക്ക് നയിക്കുന്നു. സണ്‍സ്‌ക്രീന്‍ ഉപയോഗിക്കുന്നത് ഇത്തരം പ്രശ്‌നങ്ങള്‍ ഉണ്ടാകാതിരിക്കാനുള്ള മുന്‍കരുതല്‍ കൂടിയാണ്. എസ്പിഎഫ് 50+ അടങ്ങിയിട്ടുള്ള സണ്‍സ്‌ക്രീന്‍ ഉപയോഗിക്കുന്നതാണ് നല്ലതെന്ന് സൗന്ദര്യ സംരക്ഷണ രംഗത്തെ പ്രമുഖരും പറയുന്നു

സൂര്യനില്‍ നിന്നുള്ള സംരക്ഷണത്തിനൊപ്പം ജലാംശം നിയന്ത്രിക്കാനും സണ്‍സ്‌ക്രീന്‍ പുരട്ടുന്നത് നല്ലതാണ്. സീസണ്‍ പരിഗണിക്കാതെ, പല്ല് തേയ്ക്കുന്നത് പോലെ സണ്‍സ്‌ക്രീനെ ദിനചര്യയുടെ ഭാഗമാക്കണം. അധിക സംരക്ഷണത്തിനായി വിറ്റാമിന്‍ സി അടങ്ങിയിട്ടുള്ള സണ്‍സ്‌ക്രീനുകള്‍ തിരഞ്ഞെടുക്കുക. ഇത് അള്‍ട്രാ വയലറ്റ് രശ്മികള്‍ മൂലമുണ്ടാകുന്ന കേടുപാടുകള്‍ പരിഹരിക്കാന്‍ സഹായിക്കുന്നതിനൊപ്പം എണ്ണമയവും നിയന്ത്രിക്കുന്നു.

രണ്ട് മണിക്കൂര്‍ കൂടുമ്പോള്‍ സണ്‍സ്‌ക്രീന്‍ വീണ്ടും പുരട്ടുക, പ്രത്യേകിച്ച് പുറത്തു പോകുമ്പോള്‍.സമയക്കുറവുണ്ടെങ്കില്‍ സണ്‍സ്‌ക്രീന്‍ സ്റ്റിക്കുകള്‍ അല്ലെങ്കില്‍ സ്‌പ്രേകള്‍ ഉപയോഗിക്കുക. ഇത് മേക്കപ്പ് നശിപ്പിക്കാതെ തന്നെ എളുപ്പത്തില്‍ ടച്ച്-അപ്പുകള്‍ ചെയ്യാന്‍ സഹായിക്കുന്നു.

ഡിസ്‌ക്ലെയിമര്‍: ഗൂഗിളില്‍ നിന്നും ലഭിച്ച വിവരങ്ങളുടെ അടിസ്ഥാനത്തില്‍ തയ്യാറാക്കിയതാണ് ഈ ലേഖനം. വണ്‍ഇന്ത്യ മലയാളത്തിന് ഇത് സംബന്ധിച്ച് ശാസ്ത്രീയ അറിവുകള്‍ ഇല്ല. അതിനാല്‍ ഇവ പിന്തുടരുന്നതിന് മുന്‍പ് ആരോഗ്യവിദഗ്ധരുടെ ഉപദേശം സ്വീകരിക്കണം.