വളർത്തു നായ നക്കിയാൽ ശ്രദ്ധിക്കണം; ജീവൻ പോലും നഷ്ടപ്പെട്ടേക്കാം

വളർത്തുമൃഗങ്ങളെ സ്നേഹിക്കുന്നവർക്ക് എന്നും ഒരു പ്രിയപ്പെട്ട കാര്യമാണ് അവയുടെ സ്നേഹപ്രകടനങ്ങൾ. എന്നാൽ, ഇത്തരം സ്നേഹപ്രകടനങ്ങൾ ചിലപ്പോൾ ജീവൻ പോലും അപകടത്തിലാക്കുന്ന സാഹചര്യങ്ങളിലേക്ക് നയിച്ചേക്കാം എന്ന് വ്യക്തമാക്കുന്ന ഞെട്ടിക്കുന്ന ഒരു വാർത്തയാണ് യുകെയിൽ നിന്ന് പുറത്തുവരുന്നത്. വളർത്തുമൃഗത്തിന്റെ ഉമിനീരിൽ നിന്നുണ്ടായ അണുബാധയെത്തുടർന്ന് 56 വയസ്സുള്ള മൻജിത് സാംഘ എന്ന സ്ത്രീക്ക് തന്റെ കൈകാലുകൾ നഷ്ടപ്പെട്ട ദൗർഭാഗ്യകരമായ സംഭവമാണ് ഇപ്പോൾ ചർച്ചയാകുന്നത്.

സംഭവം ഇങ്ങനെ

2025 ജൂലൈയിൽ തന്റെ ജോലി കഴിഞ്ഞ് വീട്ടിലെത്തിയ മൻജിത്തിന് നേരിയ ശാരീരിക അസ്വസ്ഥതകൾ അനുഭവപ്പെട്ടു. എന്നാൽ, പിറ്റേദിവസം രാവിലെ ആയപ്പോഴേക്കും അവരുടെ ആരോഗ്യസ്ഥിതി അതിവേഗം വഷളായി. ശരീരം തണുത്തു വിറയ്ക്കുകയും, ചുണ്ടുകൾ നീലനിറത്തിലാവുകയും ശ്വസിക്കാൻ വലിയ ബുദ്ധിമുട്ട് നേരിടുകയും ചെയ്തു. അടിയന്തരമായി തീവ്രപരിചരണ വിഭാഗത്തിൽ പ്രവേശിപ്പിച്ചെങ്കിലും ചികിത്സയ്ക്കിടെ പലതവണ ഹൃദയാഘാതം സംഭവിക്കുകയും ചെയ്തു. എന്നാൽ, അത്ഭുതകരമായ വിധത്തിൽ അവർ മരണമുഖത്തുനിന്ന് ജീവിതത്തിലേക്ക് തിരിച്ചെത്തുകയായിരുന്നു.

വില്ലനായത് ഒരു ബാക്ടീരിയ

തുടർന്ന് നടത്തിയ വിശദമായ പരിശോധനയിലാണ്, മൻജിത്തിന്റെ ശരീരത്തിലുണ്ടായിരുന്ന ഒരു ചെറിയ മുറിവിൽ വളർത്തുനായ നക്കിയതാണ് അണുബാധയ്ക്ക് കാരണമെന്ന് ഡോക്ടർമാർ കണ്ടെത്തിയത്. നായയുടെ ഉമിനീരിലുള്ള 'കാപ്നോസൈറ്റോഫാഗ കാനിമോർസസ്' (Capnocytophaga canimorsus) എന്ന ബാക്ടീരിയയാണ് ഇതിന് പിന്നിൽ. ഈ ബാക്ടീരിയ യുവതിയുടെ രക്തത്തിൽ കലരുകയും അത് സെപ്സിസ് എന്ന രൂക്ഷമായ അണുബാധയിലേക്ക് നയിക്കുകയുമായിരുന്നു. അണുബാധ ശരീരത്തിലുടനീളം പടർന്നുപിടിച്ചതോടെ ജീവൻ രക്ഷിക്കാൻ ഡോക്ടർമാർക്ക് അവരുടെ രണ്ട് കാലുകളും മുട്ടിന് താഴെയായും പിന്നാലെ കൈകളും ശസ്ത്രക്രിയയിലൂടെ മുറിച്ചുമാറ്റേണ്ടി വന്നു.

നായ്ക്കളുടെയും പൂച്ചകളുടെയും ഉമിനീരിൽ സാധാരണയായി കണ്ടുവരുന്ന ഒരു ബാക്ടീരിയയാണ് കാപ്നോസൈറ്റോഫാഗ കാനിമോർസസ്. മൃഗങ്ങളെ സംബന്ധിച്ചിടത്തോളം ഇത് അത്ര ദോഷകരമല്ലെങ്കിലും, മനുഷ്യരുടെ ശരീരത്തിലേക്ക് മുറിവുകളിലൂടെയോ മറ്റോ പ്രവേശിച്ചാൽ അത് അതീവ അപകടകരമാണ്. ശരീരത്തിലെ അവയവങ്ങളുടെ പ്രവർത്തനം നിലയ്ക്കുന്നതിനും അണുബാധ രൂക്ഷമായാൽ മരണം സംഭവിക്കുന്നതിനും വരെ ഇത് കാരണമാകാം.

വളർത്തുമൃഗങ്ങളെ പരിപാലിക്കുന്നവർ അറിഞ്ഞിരിക്കേണ്ട പ്രധാന പാഠമാണിത്. മൃഗങ്ങളുമായി ഇടപഴകുമ്പോൾ അതീവ ശ്രദ്ധ പുലർത്തുകയും, ശരീരത്തിൽ ചെറിയ മുറിവുകളോ പോറലുകളോ ഉണ്ടെങ്കിൽ അവ നായ നക്കുന്നതിൽ നിന്ന് തടയുകയും വേണം. വളർത്തുമൃഗങ്ങളുടെ ആരോഗ്യപരിപാലനത്തിനൊപ്പം ഉടമകളുടെ സുരക്ഷയും ഉറപ്പാക്കേണ്ടത് അത്യാവശ്യമാണ്. ഈ സംഭവം മൃഗങ്ങളുമായുള്ള ഇടപഴകലിൽ കൂടുതൽ ജാഗ്രത പുലർത്തേണ്ടതിന്റെ ആവശ്യകതയിലേക്കാണ് വിരൽ ചൂണ്ടുന്നത്.