വൃക്ക മാറ്റി വെയ്ക്കൽ അവസാന മാർഗമല്ല, മിഥ്യാധാരണകൾ മാറ്റാം

ഗുരുതരമായ വൃക്കരോഗം ബാധിച്ചവർക്ക് ഒരു പുതിയ ജീവിതം തന്നെ നൽകുന്ന ചികിത്സാ രീതിയാണ് വൃക്ക മാറ്റിവെക്കൽ ശസ്ത്രക്രിയ. എന്നിരുന്നാലും, ഈ ചികിത്സയെക്കുറിച്ച് പല തെറ്റിദ്ധാരണകളും നിലനിൽക്കുന്നുണ്ട്. ഈ മിഥ്യാധാരണകൾ പലപ്പോഴും ആളുകളെ സമയബന്ധിതമായ വൈദ്യസഹായം തേടുന്നതിൽ നിന്ന് പിന്തിരിപ്പിക്കുന്നു. അവയവദാനത്തെക്കുറിച്ചുള്ള അവബോധം ഇപ്പോഴും പൂർണമായി വന്നിട്ടില്ലാത്ത നമ്മുടെ നാട്ടിൽ ഈ തെറ്റിദ്ധാരണകൾ നീക്കേണ്ടത് അത്യാവശ്യമാണ്. എങ്കിൽ മാത്രമേ ചികിത്സ സംബന്ധിച്ച് ശരിയായ തീരുമാനം എടുക്കാൻ രോഗികൾക്കും അവരുടെ കുടുംബാംഗങ്ങൾക്കും സാധിക്കുകയുളളൂ.

മറ്റ് എല്ലാ മാർഗ്ഗങ്ങളും പരാജയപ്പെടുമ്പോൾ മാത്രം പരിഗണിക്കേണ്ടതാണ് വൃക്ക മാറ്റി വെക്കൽ എന്നതാണ് ഏറ്റവും വലിയ തെറ്റിദ്ധാരണകളിലൊന്ന്. എന്നാൽ വാസ്തവത്തിൽ, അർഹരായ പല രോഗികൾക്കും ഇത് ലഭ്യമായതിൽ ഏറ്റവും മികച്ച ഓപ്ഷനാണ്. വിജയകരമായ വൃക്ക മാറ്റിവെക്കൽ ശസ്ത്രക്രിയ ജീവിതകാലം മുഴുവൻ ഡയാലിസിസ് ചെയ്യുന്നതിനെക്കാളും കൂടുതൽ ആയുസ്സും മികച്ച ആരോഗ്യനിലവാരവും നൽകുന്നു. ഇത് രോഗികളെ അവരുടെ ദൈനംദിന ജീവിതത്തിലേക്ക് കൂടുതൽ എളുപ്പത്തിലും ഊർജ്ജസ്വലതയോടെയും മടങ്ങാൻ സഹായിക്കുന്നു.

ഒറ്റ വൃക്കയുമായി ഒരു വ്യക്തിക്ക് ജീവിക്കാൻ കഴിയില്ലെന്നുള്ളത് മറ്റൊരു തെറ്റിദ്ധാരണയാണ്. ഇതിനും സത്യവുമായി യാതൊരു ബന്ധവും ഇല്ല. ആരോഗ്യമുള്ള ഒരു വ്യക്തിക്ക് ഒറ്റ വൃക്കയുമായി സാധാരണ ജീവിതം നയിക്കാൻ സാധിക്കും. അതുകൊണ്ടാണ് ജീവിച്ചിരിക്കുന്നവരിൽ നിന്നുള്ള വൃക്കദാനം സാധ്യവും സുരക്ഷിതവുമാകുന്നത്. ദാതാക്കൾ ഈ പ്രക്രിയക്ക് യോഗ്യരാണെന്ന് ഉറപ്പാക്കാനും ഏതെങ്കിലും അപകടസാധ്യതകൾ കുറയ്ക്കാനും കർശനമായ വൈദ്യപരിശോധനകൾ നടത്തുന്നുണ്ട്.

ഒരു കുടുംബാംഗത്തിന് മാത്രമേ വൃക്കദാതാവാകാൻ കഴിയൂ എന്നൊരു തെറ്റിദ്ധാരണയുമുണ്ട്. അടുത്ത ബന്ധുക്കൾക്ക് പലപ്പോഴും അനുയോജ്യമായ വൃക്ക നൽകാൻ കഴിയുമെങ്കിലും, സുഹൃത്തുക്കൾക്കും പങ്കാളികൾക്കും അല്ലെങ്കിൽ അപരിചിതർക്ക് പോലും ദാനം ചെയ്യാം. ഒരു ദാതാവിന്റെ വൃക്ക അനുയോജ്യമാണോ എന്ന് നിർണ്ണയിക്കുന്നത് രക്തഗ്രൂപ്പിനെയും ടിഷ്യു യോജിപ്പുകളെയും ആശ്രയിച്ചാണ്, അല്ലാതെ കുടുംബബന്ധം മാത്രമല്ല.

വൃക്ക മാറ്റിവെക്കൽ ശസ്ത്രക്രിയയിലെ അപകടസാധ്യതകളെക്കുറിച്ചും പലർക്കും ആശങ്കകളുണ്ട്. ഏതൊരു വലിയ ശസ്ത്രക്രിയയെയും പോലെ ഇതിനും ചില അപകടസാധ്യതകളുണ്ട്. എന്നാൽ വൈദ്യശാസ്ത്രപരമായ മുന്നേറ്റങ്ങൾ ഈ ശസ്ത്രക്രിയയെ ഇന്ന് കൂടുതൽ സുരക്ഷിതമാക്കിയിട്ടുണ്ട്. വൃക്ക മാറ്റിവെക്കലിന്റെ വിജയസാധ്യത വളരെ ഉയർന്നതാണ്. അനുയോജ്യമായ വൃക്കയ്ക്ക് വേണ്ടിയുളള ദീർഘമായ കാത്തിരിപ്പ് കാലയളവാണ് മറ്റൊരു ആശങ്ക. മരിച്ച ദാതാക്കൾക്കായി ഒരു കാത്തിരിപ്പ് പട്ടികയുണ്ടെങ്കിലും, ജീവിച്ചിരിക്കുന്ന ദാതാക്കൾക്ക് രോഗികൾക്ക് വേഗത്തിൽ വൃക്ക ദാനം ചെയ്യാനാകും. ദാതാവ്-സ്വീകർത്താവ് ജോഡികളെ മറ്റുള്ളവരുമായി ഒത്തുചേർക്കുന്ന പെയർഡ് കിഡ്നി എക്സ്ചേഞ്ച് പോലുള്ള പുതിയ സംവിധാനങ്ങൾ ഈ കാത്തിരിപ്പ് സമയം കുറയ്ക്കാൻ സഹായിക്കുന്നു.

അവയവദാനത്തെക്കുറിച്ച് മതപരമായ ആശങ്കകളും നിലവിലുണ്ട്. എന്നാൽ മിക്ക പ്രധാന മതങ്ങളും ഇതിനെ ജീവൻ രക്ഷിക്കുന്ന ഒരു ഉദാത്തമായ പ്രവൃത്തിയായിട്ടാണ് കാണുന്നത്. സന്തോഷകരമെന്നു പറയട്ടെ, ഇതിനെക്കുറിച്ചുള്ള അവബോധം വളർന്നുകൊണ്ടിരിക്കുകയാണ്. എല്ലാ മതവിഭാഗങ്ങളിൽ നിന്നുമുള്ള ആളുകളും ഇപ്പോൾ അവയവദാനത്തിന് മുന്നോട്ട് വരുന്നുണ്ട്. വൃക്ക മാറ്റിവെക്കലിന് ശേഷം രോഗികൾ ചിട്ടയായ ജീവിതശൈലി പിന്തുടരേണ്ടതുണ്ട്. ശസ്ത്രക്രിയ ആരോഗ്യത്തിൽ വലിയ പുരോഗതി നൽകുന്നുണ്ടെങ്കിലും, പുതിയ വൃക്കയെ സംരക്ഷിക്കാൻ പതിവായ മരുന്നുകളും തുടർപരിശോധനകളും ആരോഗ്യകരമായ ജീവിതവും അത്യാവശ്യമാണ്.

ചെലവ് ഒരു പ്രധാനപ്പെട്ട വിഷയമാണ്. വൃക്ക മാറ്റിവെക്കൽ ശസ്ത്രക്രിയക്ക് തുടക്കത്തിൽ വലിയ ചെലവ് തോന്നാമെങ്കിലും, പതിവായ ഡയാലിസിസിനെ അപേക്ഷിച്ച് ദീർഘകാലാടിസ്ഥാനത്തിൽ ഇത് പലപ്പോഴും കൂടുതൽ ലാഭകരമാണെന്ന് തെളിയിക്കപ്പെട്ടിട്ടുണ്ട്. ഇന്ന്, നിരവധി സർക്കാർ പദ്ധതികളും സാമ്പത്തിക സഹായ പരിപാടികളും രാജ്യത്തുടനീളമുള്ള കൂടുതൽ രോഗികൾക്ക് വൃക്ക മാറ്റിവെക്കലിന് സഹായകരമായിട്ടുണ്ട്.

വൃക്ക മാറ്റിവെക്കൽ എന്നത് അവസാനത്തെ പ്രതീക്ഷയല്ല, മറിച്ച് മെച്ചപ്പെട്ട ജീവിതത്തിലേക്കുള്ള ഒരു പാതയാണ്. ഈ തെറ്റിദ്ധാരണകൾ നീക്കുന്നത് രോഗികളെയും കുടുംബങ്ങളെയും വിവരങ്ങളറിഞ്ഞ് തീരുമാനമെടുക്കാൻ പ്രാപ്തരാക്കുന്നതിനുള്ള ആദ്യപടിയാണ്. ശരിയായ പരിചരണത്തിലൂടെയും മാർഗ്ഗനിർദ്ദേശങ്ങളിലൂടെയും അവബോധത്തിലൂടെയും വൃക്ക മാറ്റിവെക്കൽ ശസ്ത്രക്രിയ ഒരാൾക്ക് ജീവിതത്തിൽ ഒരു രണ്ടാം അവസരം നൽകും.

തയ്യാറാക്കിയത്- ഡോ. റോയ് പി ജോൺ, സീനിയർ കൺസൾട്ടന്റ് ആൻഡ് ഹെഡ് ഓഫ് ദ ഡിപ്പാർട്ട്മെന്റ് ഓഫ് യൂറോളജി & റെനൽ ട്രാൻസ്പ്ലാന്റേഷൻ, അപ്പോളോ അഡ്ലക്സ് ആശുപത്രി, അങ്കമാലി.