കറ്റാർവാഴ മുഖത്തിനും മുടിക്കും എല്ലാവർക്കും ഉപയോഗിക്കാമോ? പാർശ്വഫലങ്ങൾ എന്തൊക്കെ?

മുഖത്തും മുടിയിലുമൊക്കെ നമ്മൾ സ്ഥിരമായി ഉപയോഗിക്കുന്ന ഒന്നാണ് കറ്റാർവാഴ. ഒരു പ്രകൃതിദത്ത സൗന്ദര്യവർധക ഉൽപ്പന്നമെന്ന നിലയിൽ കറ്റാർവാഴ ഏറെ ഉപയോഗിക്കപ്പെടുന്നുണ്ടെങ്കിലും ഇത് എല്ലാവർക്കും ഒരുപോലെ പ്രയോജനകരമാകണമെന്നില്ല.

ചിലപ്പോൾ പ്രതികൂല ഫലങ്ങൾക്കും ഇത് കാരണമായേക്കാം. അലർജി, ചർമ്മം വരളുക, കോൺടാക്റ്റ് ഡെർമറ്റൈറ്റിസ്, മുറിവുകൾ ഉണങ്ങാൻ താമസം നേരിടുക എന്നിവ പാർശ്വഫലങ്ങളിൽ ഉൾപ്പെടുന്നു. പ്രത്യേകിച്ച് സെൻസിറ്റീവായ ചർമ്മമുള്ളവർക്കും പ്രത്യേക അലർജിയുള്ളവർക്കും ഇത് ദോഷകരമായേക്കാം.

നമ്മുടെയെല്ലാം വീടുകളിലെ പൂന്തോട്ടങ്ങളിലും ബാൽക്കണികളിലുമെല്ലാം കറ്റാർവാഴ ഒരു സാധാരണ കാഴ്ചയാണ്. വെയിൽ തട്ടി ചർമ്മം കറുക്കുമ്പോഴും ചെറിയ തടിപ്പുകളുണ്ടാകുമ്പോഴും അമ്മമാരും മുത്തശ്ശിമാരുമെല്ലാം കറ്റാർവാഴയുടെ നീര് നേരിട്ട് എടുത്ത് പുരട്ടിയിരുന്നത് പലർക്കും ഓർമ്മയുണ്ടാകും. ചർമ്മ സംബന്ധമായ എല്ലാ പ്രശ്നങ്ങൾക്കുമുള്ള ഒരു ഉത്തമ പ്രതിവിധിയായിട്ടാണ് ഇത് കണക്കാക്കപ്പെട്ടിരുന്നത്.

എന്നാൽ, കറ്റാർവാഴയെക്കുറിച്ച് ആരും പറയാത്ത ഒരു കാര്യമുണ്ട്. എത്ര "സുരക്ഷിതവും" സ്വാഭാവികവുമാണെന്ന് തോന്നിയാലും ഇത് എല്ലാവർക്കും ഗുണകരമാകണമെന്നില്ല. വാസ്തവത്തിൽ, ചില ആളുകൾക്ക് ഇത് ഗുണത്തേക്കാളേറെ ദോഷം ചെയ്തേക്കാം. കറ്റാർവാഴ ചർമ്മത്തിലുണ്ടാക്കുന്ന പാർശ്വഫലങ്ങളെക്കുറിച്ചും ഇത് ഉപയോഗിക്കുമ്പോൾ ആരാണ് കൂടുതൽ ശ്രദ്ധിക്കേണ്ടതെന്നതിനെക്കുറിച്ചും നമുക്ക് വിശദമായി പരിശോധിക്കാം.

ചർമ്മത്തെ മൃദുവാക്കുന്നതിനും, മുഖക്കുരുവിനെ ശമിപ്പിക്കുന്നതിനും, വരണ്ട ചർമ്മത്തിന് ജലാംശം നൽകുന്നതിനുമെല്ലാം കറ്റാർവാഴ ഒരു ഉത്തമ പരിഹാരമായിട്ടാണ് വിപണനം ചെയ്യപ്പെടുന്നത്. മോയ്‌സ്ചറൈസറുകൾ, ഫേസ് ജെല്ലുകൾ, സൺസ്‌ക്രീനുകൾ, ഷീറ്റ് മാസ്‌ക്കുകൾ തുടങ്ങി ഒട്ടുമിക്ക സൗന്ദര്യവർധക ഉൽപ്പന്നങ്ങളിലും ഇത് ഇന്ന് ഒരു പ്രധാന ഘടകമാണ്. ഇതിന്റെ തണുപ്പും മൃദലമായ സ്വഭാവവും പെട്ടെന്ന് ആശ്വാസം നൽകുന്നതിനാൽ എല്ലാത്തരം ചർമ്മക്കാർക്കും ഇത് നല്ലതാണെന്ന് പൊതുവെ വിശ്വസിക്കപ്പെടുന്നു.

എന്നാൽ സത്യമെന്തെന്നാൽ, എല്ലാ "സ്വാഭാവിക" ചേരുവകളും എല്ലാവർക്കും സുരക്ഷിതമായിരിക്കണമെന്നില്ല. നിലക്കടലയോ പൂമ്പൊടിയോ ചിലർക്ക് അലർജിയുണ്ടാക്കുന്നതുപോലെ, കറ്റാർവാഴയും അപ്രതീക്ഷിത പ്രതികരണങ്ങൾക്ക് കാരണമായേക്കാം.

കറ്റാർവാഴ ഉപയോഗിക്കുമ്പോൾ എന്തെല്ലാം പ്രശ്നങ്ങളാണ് ഉണ്ടാകാൻ സാധ്യതയുള്ളതെന്ന് നോക്കാം: ചിലരിൽ ചുവപ്പ്, ചൊറിച്ചിൽ, അല്ലെങ്കിൽ പുകച്ചിൽ പോലുള്ള അലർജി പ്രശ്നങ്ങൾക്ക് ഇത് കാരണമാകാറുണ്ട്. സെൻസിറ്റീവ് ചർമ്മമുള്ളവരിൽ ഇത് പ്രത്യേകിച്ച് ശ്രദ്ധിക്കണം. ചർമ്മത്തെ ശാന്തമാക്കുന്നതിന് പകരം ഇത് പ്രശ്നങ്ങളെ വർദ്ധിപ്പിച്ചേക്കാം.

ചർമ്മത്തിന് ജലാംശം നൽകാൻ കറ്റാർവാഴ നല്ലതാണെന്ന് അറിയാമെങ്കിലും, ഇതിന്റെ സ്വാഭാവികമായ സങ്കോചന ഗുണങ്ങൾ അമിതമായി ഉപയോഗിക്കുമ്പോൾ ചർമ്മം വരണ്ടതാക്കാൻ സാധ്യതയുണ്ട്. വരണ്ട ചർമ്മമുള്ളവർക്ക് ഇത് വലിയ പ്രശ്നമായി മാറിയേക്കാം.

ചില ആളുകളിൽ, അസംസ്കൃത കറ്റാർവാഴ ജെൽ പുരട്ടുമ്പോൾ ചെറിയ തടിപ്പുകൾ, ചുവന്ന പാടുകൾ അല്ലെങ്കിൽ എക്സിമ പോലുള്ള അവസ്ഥകൾ കണ്ടുവരാറുണ്ട്. ഇത് ചർമ്മം ഈ ഉൽപ്പന്നത്തോട് യോജിക്കുന്നില്ല എന്നതിന്റെ സൂചനയാണ്.

ചെറിയ പൊള്ളലുകൾ ഭേദമാക്കാൻ കറ്റാർവാഴ സഹായിക്കുമെന്ന് പൊതുവെ പറയാറുണ്ടെങ്കിലും, ചില പഠനങ്ങൾ സൂചിപ്പിക്കുന്നത് ചില ആളുകളിൽ ഇത് മുറിവ് ഉണങ്ങുന്നതിനെ വൈകിപ്പിച്ചേക്കാം എന്നാണ്. നമ്മൾ സാധാരണയായി വിശ്വസിക്കുന്നതിന് വിപരീതമാണിത്.

അതിനാൽ, കറ്റാർവാഴ ആരെല്ലാം ഒഴിവാക്കണം എന്നത് പ്രധാനമാണ്. എത്ര സ്വാഭാവികവും "നിരുപദ്രവകരവുമാണെന്ന്" തോന്നിയാലും കറ്റാർവാഴ എല്ലാവർക്കും ഉചിതമല്ല. താഴെ പറയുന്ന സാഹചര്യങ്ങളിൽ കറ്റാർവാഴ ഉപയോഗിക്കുന്നതിന് മുമ്പ് നിങ്ങൾ രണ്ടുതവണ ചിന്തിക്കണം:

അമിതമായി സെൻസിറ്റീവായ ചർമ്മമുള്ളവർ: നേരിയ ഉൽപ്പന്നങ്ങൾ പോലും നിങ്ങളെ അസ്വസ്ഥമാക്കുന്നുണ്ടെങ്കിൽ കറ്റാർവാഴ ഒഴിവാക്കുന്നതാണ് നല്ലത്. ഉപയോഗിക്കുന്നതിന് മുൻപ് ഒരു ചെറിയ ഭാഗത്ത് പുരട്ടി പരീക്ഷിക്കുന്നത് നിർബന്ധമാണ്. എക്സിമയോ സോറിയാസിസോ ഉള്ളവർ: ഇത് രോഗാവസ്ഥയെ കൂടുതൽ വഷളാക്കാൻ സാധ്യതയുണ്ട്.

ലിലിയേസി കുടുംബത്തിൽപ്പെട്ട സസ്യങ്ങളോട് അലർജിയുള്ളവർ: വെളുത്തുള്ളി, സവാള, ട്യൂലിപ്സ് എന്നിവ ഈ കുടുംബത്തിൽ ഉൾപ്പെടുന്നു. ഇവ നിങ്ങൾക്ക് അസ്വസ്ഥതകളുണ്ടാക്കുന്നുണ്ടെങ്കിൽ കറ്റാർവാഴയും അങ്ങനെയൊരു പ്രശ്നമുണ്ടാക്കാൻ സാധ്യതയുണ്ട്. മരുന്നുകൾ ഉപയോഗിക്കുന്നവർ: കറ്റാർവാഴ ചില ലേപനങ്ങളുമായി പ്രതിപ്രവർത്തിച്ച് അസ്വസ്ഥതകൾ ഉണ്ടാക്കിയേക്കാം.

കറ്റാർവാഴ ഉപയോഗിച്ച് ചർമ്മത്തിൽ അസ്വസ്ഥതകൾ ഉണ്ടായാൽ എന്തുചെയ്യണം? അബദ്ധത്തിൽ കറ്റാർവാഴ പുരട്ടി ചൊറിച്ചിൽ അല്ലെങ്കിൽ തടിപ്പുകൾ ഉണ്ടായാൽ പരിഭ്രാന്തരാകേണ്ട. തണുത്ത വെള്ളത്തിൽ കഴുകി കളയുക, കഠിനമായ ക്ലെൻസറുകൾ ഉപയോഗിക്കുന്നത് ഒഴിവാക്കുക. സുഗന്ധമില്ലാത്ത ഒരു മോയ്‌സ്ചറൈസർ പുരട്ടുക, അടുത്ത ഏതാനും ദിവസത്തേക്ക് കൂടുതൽ ഉൽപ്പന്നങ്ങൾ ഉപയോഗിക്കുന്നത് ഒഴിവാക്കുക. അസ്വസ്ഥതകൾ കുറയുന്നില്ലെങ്കിൽ സ്വയം ചികിത്സിക്കാതെ ഒരു ഡെർമറ്റോളജിസ്റ്റിനെ സമീപിക്കുക. അതുകൊണ്ട്, അടുത്ത തവണ ഒരാൾ നിങ്ങൾക്ക് കറ്റാർവാഴ ജെൽ തന്ന് "ഇത് എല്ലാത്തിനും പരിഹാരമാണ്" എന്ന് പറയുമ്പോൾ നിങ്ങളുടെ ചർമ്മത്തിന് ഏതാണ് നല്ലതെന്ന് സ്വയം പരിശോധിച്ച് തിരിച്ചറിയുക.