തടി എങ്ങനെയെങ്കിലും കുറഞ്ഞ് കിട്ടിയാൽ പോരെ?; ഭക്ഷണം കഴിച്ച് തന്നെ ആകാം, ഈ മത്സ്യങ്ങൾ കഴിച്ച് നോക്കൂ

ശരീരഭാരം കുറക്കായ്ക്കാനുള്ള യാത്രയിൽ ചിക്കൻ വിഭവങ്ങളെ പോലെ തന്നെ മത്സ്യങ്ങളും ധാരാളമായി ഉൾപ്പെടുത്താം. എന്ന് വെച്ച് എല്ലാ മത്സ്യങ്ങളും വിചാരിച്ച ഫലം തരണമെന്നില്ല കേട്ടോ. ഏതൊക്കെ മത്സ്യങ്ങളാണ് തടി കുറക്കാനായി നിങ്ങളുടെ ഡയറ്റിൽ ഉൾപ്പെടുത്തേണ്ടതെന്ന് നോക്കാം

മത്തി

ആരോഗ്യകരമായ കൊഴുപ്പുകൾ ധാരാളമുള്ള മത്സ്യമാണ് മത്തി. ഇവയിൽ ഒമേഗ-3 ഫാറ്റി ആസിഡുകൾ അടങ്ങിയിട്ടുണ്ട്. മെറ്റബോളിസം വർധിപ്പിച്ച് ശരീരഭാരം കുറക്കാൻ സഹായിക്കുന്നവയാണ് ഒമേഗ-3 ഫാറ്റി ആസിഡുകൾ. മത്തി പ്രോട്ടീൻ്റെ നല്ല ഉറവിടം കൂടിയാണ്, ഇത് പേശികളുടെ പരിപാലനത്തിനും സംതൃപ്തിക്കും സഹായിക്കുന്നു.കൂടാതെ, മത്തിയിൽ വിറ്റാമിൻ ഡി അടങ്ങിയിട്ടുണ്ട്, ഇത് എല്ലുകളുടെ ആരോഗ്യത്തിനും രോഗപ്രതിരോധ പ്രവർത്തനത്തിനും ഉത്തമമാണ്.

അയല

അയല പ്രോട്ടീൻ്റെ മികച്ച ഉറവിടമാണ്. അതുകൊണ്ട് തന്നെ അയല കഴിക്കുന്നത് വയറിന് പൂർണത നൽകുന്നു. ഇടയ്ക്കിടക്ക് ഭക്ഷണം കഴിക്കണമെന്ന തോന്നൽ ഇല്ലാതാക്കുന്നു. ഇവയിൽ അടങ്ങിയിരിക്കുന്ന ഒമേഗ -3 ഫാറ്റി ആസിഡുകൾ ഉപാപചയ നിരക്ക് വർദ്ധിപ്പിക്കുകയും കൊഴുപ്പ് വളരെ വേഗത്തിൽ എരിച്ച് കളയാൻ സഹായിക്കുകയും ചെയ്യുന്നു. അയലയിൽ കലോറി താരതമ്യേന കുറവാണ്. 100 ഗ്രാമിൽ ഏകദേശം 205 കലോറിയാണ് അടങ്ങിയിട്ടുള്ളത്. അതായത് അവശ്യ പോഷകങ്ങൾ ലഭിക്കുമ്പോൾ തന്നെ കലോറി ഉപഭോഗം നിയന്ത്രിക്കാൻ ആഗ്രഹിക്കുന്നവർക്ക് ഇത് അനുയോജ്യമായ തിരഞ്ഞെടുപ്പാണെന്ന് സാരം. വിറ്റാമിൻ ഡി, ബി 12, സെലിനിയം തുടങ്ങിയ വിറ്റാമിനുകളും ധാതുക്കളും ഇവയിൽ ധാരാളമുണ്ട്. ഊർജ്ജ ഉൽപാദനത്തിന് പ്രധാനമാണ് ബി12.

പുഴ മത്സ്യം

പ്രോട്ടീനും ഒമേഗ-3 ഫാറ്റി ആസിഡുകളും കൊണ്ട് സമ്പുഷ്ടമായ പുഴ മത്സ്യങ്ങൾ കഴിക്കുന്നത് വയറിന് പൂർണത നൽകുന്നു. ഒമേഗ -3 ഫാറ്റി ആസിഡുകൾ വീക്കം കുറയ്ക്കുകയും ഹൃദയാരോഗ്യം മെച്ചപ്പെടുത്തുകയും ചെയ്യുന്നു. പുഴമത്സ്യത്തിൽ അടങ്ങിയിട്ടുള്ള ആരോഗ്യകരമായ കൊഴുപ്പുകൾ മെറ്റബോളിസം വർദ്ധിപ്പിച്ച് കൊഴുപ്പ് കത്തുന്നത് പ്രോത്സാഹിപ്പിക്കുന്നു, അതിലൂടെ ശരീരഭാരം കുറയ്ക്കാനും സഹായിക്കുന്നു. പ്രോട്ടീൻ, ഒമേഗ -3 എന്നിവയ്‌ക്ക് പുറമേ, വിറ്റാമിനുകളുടെയും ധാതുക്കളുടെയും ഉറവിടം കൂടിയാണ് പുഴമത്സ്യങ്ങൾ. ഇതിൽ വിറ്റാമിൻ ബി 12 ഉം അടങ്ങിയിട്ടുണ്ട്, ഇത് ഊർജ്ജ ഉൽപാദനത്തിനും തലച്ചോറിൻ്റെ പ്രവർത്തനത്തിനും പ്രധാനമാണ്. അതുപോലെ തന്നെ തൈറോയ്ഡ് ആരോഗ്യത്തെ പിന്തുണയ്ക്കുന്ന സെലിനിയവും പുഴമത്സ്യത്തിൽ ഉണ്ട്. 100 ഗ്രാം പുഴ മത്സ്യത്തിൽ വെറും 150 കലോറി മാത്രമാണ് അടങ്ങിയിട്ടുള്ളത്.

സാൽ‍മൺ

സാൽമണിൻ്റെ പ്രധാന ഗുണങ്ങളിൽ ഒന്ന് അതിൻ്റെ ഉയർന്ന പ്രോട്ടീൻ ഉള്ളടക്കമാണ്. ടിഷ്യൂകൾ നിർമ്മിക്കുന്നതിനും നന്നാക്കുന്നതിനും പ്രോട്ടീൻ അത്യന്താപേക്ഷിതമാണ്. ശരീരഭാരം കുറയ്ക്കുമ്പോൾ പേശികളുടെ അളവ് നിലനിർത്തുന്നതിലും ഇത് നിർണായക പങ്ക് വഹിക്കുന്നു. 100 ഗ്രാം സാൽമണിൽ ഏകദേശം 20 ഗ്രാം പ്രോട്ടീൻ അടങ്ങിയിട്ടുണ്ട്. ഇവയിൽ അടങ്ങിയിരിക്കുന്ന ഒമേഗ 3 ഫാറ്റി ആസിഡുകൾ വയറിന് പൂർണത നൽകുന്നു.

ട്യൂണ

അവശ്യപോഷകങ്ങളാൽ സമ്പുഷ്ടമായ മത്സ്യമാണ് ട്യൂണ. ഇതിൽ ഒമേഗ -3 ഫാറ്റി ആസിഡുകൾ അടങ്ങിയിട്ടുണ്ട്, ഇത് ഹൃദയാരോഗ്യത്തെ പിന്തുണയ്ക്കുന്നു. കൂടാതെ, ട്യൂണ ബി 12, ഡി തുടങ്ങിയ വിറ്റാമിനുകളും ഇരുമ്പ്, സെലിനിയം തുടങ്ങിയ ധാതുക്കളാലും സമ്പന്നമാണ്. ശരീരഭാരം കുറയ്ക്കാനുള്ള ശ്രമങ്ങളെ സഹായിക്കുന്നതിനോടൊപ്പം തന്നെ ഈ പോഷകങ്ങൾ മൊത്തത്തിലുള്ള ആരോഗ്യത്തിന് സഹായിക്കുന്നു.