തണുപ്പുകാലത്ത് മുടി പൊട്ടിപ്പോകാതെ നോക്കാം, അതിന് നെല്ലിക്കയും കറിവേപ്പിലയും മാത്രം മതി

ശൈത്യകാലം സുഖകരമാണെങ്കിലും മുടിയുടെ ആരോഗ്യത്തിന് പ്രതികൂലമാകാറുണ്ട്. ഈ സമയത്ത് മുടിക്ക് ജീവനില്ലാതാവുകയും മങ്ങുകയും പൊട്ടിപ്പോവുകയും ചെയ്യുന്നത് പതിവാണ്. വിലകൂടിയ സെറമുകളെയും സലൂൺ പരിചരണങ്ങളെയും ആശ്രയിക്കും മുൻപ് പ്രകൃതിദത്തമായ ചില പരിഹാരങ്ങൾ തേടാം. തലയോട്ടിയുടെ ആരോഗ്യം സംരക്ഷിച്ച്, മുടികൊഴിച്ചിൽ കുറച്ച്, കരുത്തുള്ള മുടിക്ക് ഇവ സഹായിക്കും.

മുടികൊഴിച്ചിൽ തടയാൻ അടുക്കളയിലുള്ള നെല്ലിക്ക, കറിവേപ്പില, ഇഞ്ചി എന്നീ മൂന്ന് ചേരുവകൾ മതി. ഈ മിശ്രിതം മുടിവേരുകൾക്ക് ആവശ്യമായ ആന്റിഓക്‌സിഡന്റുകൾ, വിറ്റാമിനുകൾ, ധാതുക്കൾ എന്നിവ നൽകുന്നു. ശൈത്യകാലത്ത് മുടി വളർച്ചയെ പിന്തുണച്ച് കൊഴിച്ചിൽ നിയന്ത്രിക്കാൻ ഇത് ഫലപ്രദമാണ്.

ഇത് തയ്യാറാക്കാൻ 6-8 ഫ്രഷ് കറിവേപ്പില, 1 ടേബിൾസ്പൂൺ ചിരകിയ ഇഞ്ചി, 2 ടേബിൾസ്പൂൺ ശുദ്ധമായ നെല്ലിക്ക നീര്, അര കപ്പ് ഇളം ചൂടുവെള്ളം എന്നിവ എടുക്കുക. കഴുകിയെടുത്ത കറിവേപ്പിലയും ഇഞ്ചിയും ചൂടുവെള്ളത്തിൽ ചേർത്ത് 10 മിനിറ്റ് തിളപ്പിക്കുക. ശേഷം ഈ മിശ്രിതം ബ്ലെൻഡറിലേക്ക് അരിച്ച് മാറ്റുക.

അരിച്ചെടുത്ത ചാറിലേക്ക് നെല്ലിക്ക നീര് ചേർത്ത് 30 സെക്കൻഡ് നേരം അരച്ചെടുക്കുക. രുചിക്കായി അല്പം കുരുമുളക് കൂടി ചേർത്ത് ഇത് രാവിലെ ഒഴിഞ്ഞ വയറ്റിൽ കുടിക്കുക. ആദ്യ മാസം ആഴ്ചയിൽ 4 തവണ കുടിച്ച് ഫലം നിരീക്ഷിക്കുക. പുരോഗതിയെങ്കിൽ, ഒന്നിടവിട്ട ദിവസങ്ങളിൽ രാവിലെ കഴിക്കാം.

രാവിലെ ഇത് കഴിക്കുമ്പോൾ രക്തയോട്ടവും പോഷകങ്ങളുടെ ആഗിരണവും മെച്ചപ്പെടും. ഇഞ്ചി ചൂടുണ്ടാക്കുന്നതിനാൽ ഉറങ്ങുന്നതിന് തൊട്ടുമുമ്പ് കഴിക്കുന്നത് ഒഴിവാക്കണം; ഇത് ഉറക്കത്തെ തടസ്സപ്പെടുത്തിയേക്കാം. ചില തെറ്റുകൾ ഒഴിവാക്കുന്നത് ഈ രീതിയുടെ ഗുണഫലം വർദ്ധിപ്പിക്കും.

പഞ്ചസാര ചേർത്ത നെല്ലിക്ക ജ്യൂസുകൾ ഉപയോഗിക്കരുത്, ഇത് പോഷകമൂല്യം കുറയ്ക്കും. നാരുകൾ തൊണ്ടയ്ക്ക് അസ്വസ്ഥതയുണ്ടാക്കാതിരിക്കാൻ ജ്യൂസ് എപ്പോഴും അരിച്ചെടുക്കണം. തണുപ്പിച്ച് ഉപയോഗിക്കരുത്; ഇളം ചൂടോ സാധാരണ താപനിലയോ ആണ് പോഷകങ്ങൾ നന്നായി ആഗിരണം ചെയ്യാൻ ഉത്തമം.

അമിതമായി ഉപയോഗിക്കരുത്; ഒരു ദിവസം 30-50 മില്ലിലിറ്റർ മാത്രം മതിയാകും, കൂടുതൽ അളവ് അസിഡിറ്റിക്ക് കാരണമാകും. പുതിയതായി തയ്യാറാക്കുകയോ ഫ്രിഡ്ജിൽ 24 മണിക്കൂർ വരെ സൂക്ഷിക്കുകയോ ചെയ്യുക. അതിനുശേഷം പുതിയ ബാച്ച് ഉണ്ടാക്കേണ്ടത് അത്യാവശ്യമാണ്.

ശൈത്യകാലത്ത് മുടിയുടെ വളർച്ച നിലനിർത്താൻ ഉള്ളിൽ നിന്നും പുറമെ നിന്നും പരിപാലിക്കേണ്ടത് പ്രധാനമാണ്. ഈ പ്രകൃതിദത്ത ഹെയർ ഗ്രോത്ത് ഷോട്ട് മുടിവേരുകൾക്ക് കരുത്ത് നൽകാനും മുടികൊഴിച്ചിൽ കുറയ്ക്കാനും ആരോഗ്യവും തിളക്കവുമുള്ള മുടിയിഴകൾ നൽകാനും സഹായിക്കും.