ഉറക്കക്കുറവുണ്ടോ, ഒരേയിരുപ്പിലുള്ള ജോലിയാണോ നിങ്ങളുടേത്? അകാലനര ഉറപ്പാണ്..!!
മുടി സംരക്ഷണത്തിനായി നിരവധി പരീക്ഷണങ്ങള് നടത്തിയിട്ടുള്ളവരായിരിക്കും പലരും. ഇന്നത്തെ കാലത്ത് സോഷ്യല് മീഡിയയില് നല്ലതും ചീത്തയുമായ ഒരുപാട് കേശസംരക്ഷണ മാര്ഗങ്ങളും ഉണ്ട്. എന്നാല് പലപ്പോഴും മുടി സംരക്ഷണത്തെ കുറിച്ച് പല ടിപ്സുകളിലും താരന്, മുടികൊഴിച്ചില് എന്നിവയെ കുറിച്ചായിരിക്കും പറയാറുള്ളത്. ഇത് പോലെ തന്നെ ശ്രദ്ധ വേണ്ടുന്ന ഒന്നാണ് അകാല നര എന്നത് പലരും മറന്ന് പോകുന്നു.
ജീവിതശൈലി, കാലാവസ്ഥാ മാറ്റം, പാരമ്പര്യം എന്നിവയുള്പ്പെടെയുള്ള വിവിധ ഘടകങ്ങള് മുടിയുടെ അകാല നരയെ സ്വാധീനിക്കും. എന്നാല് പലപ്പോഴും പലരും അകാലനരയെ ലാഘവത്തോടെയാണ് നോക്കി കാണുന്നത്. നമ്മളുടെ അശ്രദ്ധ തന്നെയാണ് പലപ്പോഴും അകാലനരയ്ക്ക് കാരണമാകുന്നത്. മുടിയുടെ അകാല നരയ്ക്ക് കാരണമാകുന്ന ജീവിതശൈലി ഘടകങ്ങള് ഏതൊക്കെയാണ് എന്ന് നോക്കാം.
വിട്ടുമാറാത്ത സമ്മര്ദ്ദവും ഉത്കണ്ഠയും മുടി അകാല നരയ്ക്ക് കാരണമാകും. ഉയര്ന്ന സ്ട്രെസ് ലെവലുകള് മെലനോസൈറ്റുകളെ (പിഗ്മെന്റ് ഉല്പ്പാദിപ്പിക്കുന്നതിന് കാരണക്കാരായ കോശങ്ങള്) മുടിയുടെ നിറം നഷ്ടപ്പെടുന്നതിലേക്ക് നയിക്കുന്നു. ഭക്ഷണത്തിലെ തിരഞ്ഞെടുപ്പുകളും അകാല നരയെ സ്വാധീനിക്കും. അവശ്യ പോഷകങ്ങളുടെ അഭാവം അകാലനരയിലേക്ക് വഴിയൊരുക്കും.
വിറ്റാമിന് ബി 12, ഫോളിക് ആസിഡ്, ഇരുമ്പ്, ചെമ്പ്, സിങ്ക് തുടങ്ങിയ ധാതുക്കള് എന്നിവ അകാല നരയ്ക്ക് കാരണമാകും. നിങ്ങളൊരു സ്ഥിരം പുകവലിക്കാരനാണെങ്കിലും മുടിയുടെ സ്വാഭാവിക നിറം നഷ്ടപ്പെടും. പുകയിലയിലെ ദോഷകരമായ രാസവസ്തുക്കള് രോമകൂപങ്ങളെ നശിപ്പിക്കുകയും മെലാനിന് ഉല്പാദനത്തെ തടസപ്പെടുത്തുകയും ചെയ്യും. പുകവലി പോലെ തന്നെ മദ്യപാനവും മുടിയ്ക്ക് ദോഷം ചെയ്യും.
ആല്ക്കഹോള് ശരീരത്തിലെ സുപ്രധാന പോഷകങ്ങളെ ഇല്ലാതാക്കുകയും അവശ്യ വിറ്റാമിനുകളുടെയും ധാതുക്കളുടെയും ആഗിരണത്തെ തടസപ്പെടുത്തുകയും മൊത്തത്തിലുള്ള ആരോഗ്യത്തെ തകരാറിലാക്കുകയും ചെയ്യും. ഇതെല്ലാം അകാല നരയിലേക്ക് കൂടി നയിക്കും. അപര്യാപ്തമോ ഗുണനിലവാരമില്ലാത്തതോ ആയ ഉറക്കവും അകാല നരയ്ക്ക് കാരണമായി പറയപ്പെടുന്നു.
ഉറക്കക്കുറവ് മുടിയുടെ ആരോഗ്യവുമായി ബന്ധപ്പെട്ട വിവിധ ശാരീരിക പ്രവര്ത്തനങ്ങളെ തടസപ്പെടുത്തുമത്രേ. പരിസ്ഥിതി മലിനീകരണം, മുടിയില് തേക്കുന്ന ഉല്പന്നങ്ങളിലെ രാസവസ്തുക്കള് തുടങ്ങിയ വിഷവസ്തുക്കളുമായി സമ്പര്ക്കം പുലര്ത്തുന്നതും ചിലരില് അകാല നരയ്ക്ക് കാരണമാകും. ഇവ രോമകൂപങ്ങളെ നശിപ്പിക്കുകയും മെലാനിന് ഉല്പാദനത്തെ തടസപ്പെടുത്തുകയും ചെയ്യും.
ഉദാസീനമായ ജീവിതശൈലി പിന്തുടരുന്നവരിലും അകാല നര കണ്ടുവരുന്നു. പതിവ് വ്യായാമം മെച്ചപ്പെട്ട രക്തചംക്രമണം പ്രോത്സാഹിപ്പിക്കുന്നു. ഇത് അവശ്യ പോഷകങ്ങള് രോമകൂപങ്ങളില് എത്തുന്നുവെന്ന് ഉറപ്പാക്കും. ജീവിതശൈലി ഘടകങ്ങള്ക്കൊപ്പം തന്നെ ജനിതകപരമായ സവിശേഷതകളും അകാല നരയില് ഒരു പ്രധാന പങ്ക് വഹിക്കുന്നു.
Click it and Unblock the Notifications
Sign in with Google