മുടി കൊഴിച്ചിൽ തടയാൻ റോസ്മേരി എണ്ണയോ വെള്ളമോ നല്ലത്; ഇതാ ഉത്തരം, പണി കിട്ടുമോ?

മുടിയുടെ ആരോഗ്യത്തിന് ഉത്തമമാണ് റോസ്മേരി. ആന്റി ബാക്ടീരിയൽ, ആന്റി ഇൻഫ്ലമേറ്ററി, ആന്റി മൈക്രോബയൽ ഗുണങ്ങൾക്ക് പേരുകേട്ടവയാണ് ഇവ. രോമകൂപങ്ങളിലേക്കെത്തിച്ചെന്ന് മുടി വളർച്ച വേഗത്തിലാക്കാൻ ഇവ സഹായിക്കും. മാത്രമല്ല രക്തചംക്രമണം വേഗത്തിലാക്കുകയും ചെയ്യുന്നു. മുടി വളർച്ച വേഗത്തിലാക്കുന്നതിനോടൊപ്പം തന്നെ മുടിയുടെ ഘടന മെച്ചപ്പെടുത്താനും മുടിയുടെ കട്ടി കൂട്ടാനും ഇത് സഹായിക്കുമത്രേ.

റോസ്മേരി എണ്ണയാണോ റോസ്മേരി വെള്ളമാണോ നല്ലത്

റോസ്മേരി എണ്ണയായും വെള്ളമായുമൊക്കെ ഉപയോഗിക്കുന്നവരുണ്ട്. എന്നാൽ ഇവയിലേതാണ് നല്ലത്? നിങ്ങളുടെ തലയോട്ടി വളരെ വരണ്ടതാണെങ്കിൽ റോസ്മേരി എണ്ണ ഉപയോഗിക്കുന്നതാണ് ഏറ്റവും ഉത്തമം. അതല്ല എണ്ണമയം ഉള്ള തലയോട്ടിയുള്ളവർക്ക് ഉചിതം റോസ്മേരി വെള്ളമാണ്. വെള്ളം വളരെ പെട്ടെന്നും എപ്പോഴും ഉപയോഗിക്കാൻ സാധിക്കുമെങ്കിലും എണ്ണ ഉപയോഗിക്കുന്നതാണ് കൂടുതൽ ഫലം നൽകുകയെന്നാണ് ഡെർമറ്റോളജിസ്റ്റുകൾ പറയുന്നത്.

ബാഹ്യപരിചരണം മാത്രം മതിയോ?

മുടിയെ പുറത്ത് നിന്ന് എത്രയൊക്കെ സംരക്ഷിച്ചാലും അകത്ത് സംരക്ഷണം ഉറപ്പാക്കിയില്ലെങ്കിൽ യാതൊരു മെച്ചവും ഉണ്ടാകില്ല. അതായത് മുടിക്ക് ആവശ്യമായ പോഷകങ്ങളും വിറ്റാമിനുകളും ധാതുക്കളുമെല്ലാം ശരീരത്തിൽ എത്തുന്നുണ്ടെന്ന് ഉറപ്പാക്കണം. സമ്മർദ്ദമില്ലാതെ മതിയായ ഉറക്കവും ഉറപ്പാക്കേണ്ടതുണ്ട് കേട്ടോ. ഇതിനെല്ലാം ഒരു ആരോഗ്യ വിദഗ്ധന്റെ നിർദ്ദേശം കൂടി സ്വീകരിക്കാവുന്നതാണ്.

റോസ്മേരി എണ്ണ തേച്ചത് കൊണ്ട് മാത്രം മുടി വളരുമോ?

യഥാർത്ഥ ഫലം ലഭിക്കണമെങ്കിൽ എണ്ണ എല്ലാ ദിവസവും ഉപയോഗിക്കേണ്ടതുണ്ട്. അതായത് കുറഞ്ഞ് 4-5 മണിക്കൂറെങ്കിലും തലയോട്ടിയിലും മുടിയിലും നന്നായി തേച്ച് പിടിപ്പിക്കണം. ഇത്തരത്തിൽ മൂന്നോ നാലോ മാസം ഉപയോഗിച്ച് കഴിഞ്ഞാൽ മാത്രമേ ഇത് ഉപയോഗിച്ചത് കൊണ്ടുള്ള ഫലം മുടിയിൽ പ്രകടമാകു.

എന്തെങ്കിലും പാർശ്വഫലങ്ങൾ ഉണ്ടോ?

ഉണ്ട്. റോസ്മേരി എണ്ണയുടെ ഉപയോഗം താരന് കാരണമാകുമെന്ന മുന്നറിയിപ്പാണ് ചിലർ നൽകുന്നത്. ചിലർക്കാകട്ടെ ചൊറിച്ചിൽ പോലുള്ള അലർജികളും ഉണ്ടാകാനുള്ള സാധ്യത ഉണ്ട്. അതിനാൽ അലർജിയില്ലെന്ന് ഉറപ്പാക്കിയതിന് ശേഷം മാത്രമേ റോസ്മേരി ഉപയോഗിക്കാൻ പാടുള്ളൂ.

എല്ലാതരം മുടികൾക്കും റോസ്മേരി ഗുണപ്രദമോ

ഭാരം കുറയുമ്പോൾ, അല്ലെങ്കിൽ സമ്മർദ്ദം മൂലം കൊവിഡ് മൂലമുള്ള ആരോഗ്യപ്രശ്നങ്ങൾ ഇങ്ങനെയുള്ള സാഹചര്യങ്ങളിൽ നമ്മുക്ക് മുടി കൊഴിച്ചിൽ ഉണ്ടായേക്കാം. ഈ സാഹചര്യങ്ങളിൾ റോസ്മേരി എണ്ണ ഉപയോഗിക്കുന്നത് ഫലപ്രദമാണ്. അതേസമയം അലോപേഷ്യ പോലുള്ള അവസ്ഥ ഉണ്ടെങ്കിൽ റോസ്മേരി എണ്ണയെ ആശ്രയിച്ച് സമയം കളയരുത്. ഉടൻ തന്നെ ഒരു ഡർമറ്റോളജിസ്റ്റിനെ ആശ്രയിച്ച് പരിഹാരം കണ്ടെത്തേണ്ടതാണ്.

English summary

Hair Fall; Is rosemary oil or rosemary water effective for preventing hair loss,here is the answer