ക്ഷമ വേണം, സമയമെടുക്കും, പക്ഷേ മുടി വളരുമെന്നുറപ്പ്, ഉണക്കമുന്തിരിയുടെ മാജിക് ഇങ്ങനെ

ഓർമ്മശക്തിക്ക് ബദാമും ശരീരഭാരം കുറയ്ക്കാൻ ചിയ സീഡുകളും നമ്മൾ ഉപയോഗിക്കാറുണ്ട്. എന്നാൽ സൗന്ദര്യസംരക്ഷണ ലോകത്ത് ഇപ്പോൾ ശ്രദ്ധ നേടുന്നത് വളരെ ലളിതമായൊരു പരിഹാരമാണ്: ഉണക്കമുന്തിരി വെള്ളം. ഇത് അത്ര ഫലപ്രദമാണെന്ന് തോന്നുന്നില്ലെങ്കിലും, ട്രൈക്കോളജിസ്റ്റുകളും ഹോളിസ്റ്റിക് വിദഗ്ദ്ധരും കറുത്ത ഉണക്കമുന്തിരി പ്രതിരോധശേഷിക്കും മുടിയുടെ ആരോഗ്യത്തിനും മികച്ചതാണെന്ന് ചൂണ്ടിക്കാണിക്കുന്നു.

ശൈത്യകാലത്ത് മുടിയുടെ സംരക്ഷണം ഒരു വെല്ലുവിളിയാകുമ്പോൾ, ഷാമ്പൂവിനെക്കാളും സെറത്തിനേക്കാളുമേറെ സഹായകമായേക്കാവുന്നത് ദിവസവും രാവിലെ കുടിക്കുന്ന ഉണക്കമുന്തിരി വെള്ളമാണ്. എന്തുകൊണ്ടാണ് ഈ ഉണങ്ങിയ പഴം മുടിയുടെ വേരുകൾക്ക് പുത്തൻ ഉണർവ്വേകാൻ പ്രാധാന്യത്തോടെ പരിഗണിക്കപ്പെടുന്നതെന്ന് നോക്കാം.

ഇതൊരു മാന്ത്രികവിദ്യയല്ല, പോഷകങ്ങളുടെ ശക്തിയാണ്. ഉണക്കമുന്തിരി വെള്ളം ഫലപ്രദമാകുന്നതിൻ്റെ പിന്നിൽ വളരെ ലളിതമായൊരു ശാസ്ത്രമുണ്ട്: ഇരുമ്പ്. മുടി കൊഴിയുന്നതിനും വളർച്ച മുരടിക്കുന്നതിനും പ്രധാന കാരണം തലയോട്ടിയിൽ ഓക്സിജൻ എത്താത്തതാണ്. പലപ്പോഴും ശരീരത്തിലെ ഇരുമ്പിന്റെ അളവ് കുറയുന്നതാണ് ഇതിന് കാരണം.

കറുത്ത ഉണക്കമുന്തിരിയിൽ ഇരുമ്പിന്റെ അംശം വളരെ കൂടുതലാണ്. ഇവ വെള്ളത്തിൽ കുതിർത്തു കഴിക്കുമ്പോൾ, ശരീരത്തിന് എളുപ്പത്തിൽ ആഗിരണം ചെയ്യാവുന്ന ഒരു ദ്രാവകം രൂപപ്പെടുന്നു. ഇത് ഹീമോഗ്ലോബിൻ അളവ് വർദ്ധിപ്പിക്കുകയും തലയോട്ടിയിലേക്കുള്ള രക്തയോട്ടം മെച്ചപ്പെടുത്തുകയും ചെയ്യുന്നു.

മെച്ചപ്പെട്ട രക്തയോട്ടത്തിൽ മാത്രം ഉണക്കമുന്തിരിയുടെ ഗുണങ്ങൾ ഒതുങ്ങുന്നില്ല. കെരാറ്റിൻ ഉത്പാദിപ്പിക്കാൻ ആവശ്യമായ അമിനോ ആസിഡുകളും, കൊളാജൻ ഉത്പാദനത്തിന് അത്യാവശ്യമായ വിറ്റാമിൻ സിയും ഇതിൽ ധാരാളമുണ്ട്. ഉള്ളിൽ നിന്ന് മുടിയിഴകളെ ബലപ്പെടുത്താൻ ഈ പാനീയം സഹായിക്കും.

ഇവിടെ ഒരു സുപ്രധാന കാര്യം ശ്രദ്ധിക്കേണ്ടതുണ്ട്: കറുത്ത ഉണക്കമുന്തിരി മാത്രമാണ് ഈ ആവശ്യത്തിനായി ഉപയോഗിക്കേണ്ടത്. പായസങ്ങളിലും മറ്റും ഉപയോഗിക്കുന്ന ഗോൾഡൻ നിറത്തിലുള്ള ഉണക്കമുന്തിരിക്ക് സമാനമായ ഫലങ്ങൾ നൽകാൻ കഴിയില്ല.

കറുത്ത ഉണക്കമുന്തിരി സാധാരണയായി വെയിലത്ത് ഉണക്കിയെടുക്കുന്നത് അവയുടെ ആന്റിഓക്‌സിഡന്റുകളും (ആന്തോസയാനിനുകൾ) ഇരുമ്പിന്റെ അംശവും നിലനിർത്തുന്നു. ഗോൾഡൻ ഉണക്കമുന്തിരിക്ക് തിളക്കമുള്ള നിറത്തിനായി സൾഫർ ഡയോക്സൈഡ് ചേർക്കുന്നത് പോഷകഗുണം കുറയ്ക്കുന്നു. അതിനാൽ, കുരുവില്ലാത്ത ഓർഗാനിക് കറുത്ത ഉണക്കമുന്തിരി തിരഞ്ഞെടുക്കുക.

ഇത് തയ്യാറാക്കാൻ എളുപ്പമാണ്. 15-20 കറുത്ത ഉണക്കമുന്തിരി നന്നായി കഴുകി ഒരു ഗ്ലാസ് പാത്രത്തിലിടുക (പ്ലാസ്റ്റിക് ഒഴിവാക്കുക). ഏകദേശം 1.5 കപ്പ് വെള്ളം ചേർത്ത് കുറഞ്ഞത് 8 മണിക്കൂർ കുതിർക്കാൻ വെക്കുക. പോഷകങ്ങൾ പൂർണ്ണമായി അലിയുമ്പോൾ രാവിലെ വെള്ളത്തിന് കലങ്ങിയ നിറമുണ്ടാകും.

രാവിലെ ഉറക്കമുണർന്നയുടൻ, ഒഴിഞ്ഞ വയറ്റിൽ, ഈ വെള്ളം അരിച്ചെടുത്ത് കുടിക്കുന്നതാണ് ഏറ്റവും ഫലപ്രദം. ഈ സമയത്താണ് ശരീരത്തിലെ ആഗിരണ ശേഷി ഏറ്റവും ഉയർന്നത്. കുതിർത്ത ഉണക്കമുന്തിരി കളയാതെ, ഉടൻ തന്നെ കഴിക്കുക. നാരുകളാൽ സമ്പന്നമായ ഇവ ദഹനത്തിനും സഹായകമാണ്.

ഉള്ളിൽ നിന്നുള്ള പരിചരണത്തിനൊപ്പം, ഉണക്കമുന്തിരി വെള്ളം പുറമെ നിന്നുള്ള സൗന്ദര്യവർദ്ധകമായും ഉപയോഗിക്കാം. ഷാമ്പൂ ചെയ്ത ശേഷം ഈ വെള്ളം തലയിൽ ഒഴിച്ച് മുടിയിഴകളുടെ വേരുകളിൽ രണ്ട് മിനിറ്റ് നേരം മസാജ് ചെയ്യുക. ഇത് ചർമ്മത്തിലെ വീക്കം കുറയ്ക്കാനും ശൈത്യകാലത്തെ താരൻ മൂലമുള്ള ചൊറിച്ചിൽ ശമിപ്പിക്കാനും ഉത്തമമാണ്.

മാസ്കായി ഉപയോഗിക്കാൻ: മുടിയുടെ അറ്റം പൊട്ടുന്നത് പോലുള്ള പ്രശ്നങ്ങളുണ്ടെങ്കിൽ, അല്പം ഉണക്കമുന്തിരി വെള്ളം കറ്റാർവാഴ ജെല്ലുമായി യോജിപ്പിക്കുക. ഇത് മുടിയിൽ പുരട്ടി 20 മിനിറ്റിന് ശേഷം കഴുകി കളയാം. എണ്ണയുടെ ഭാരം തോന്നിപ്പിക്കാതെ മുടിക്ക് ഈർപ്പം നൽകാൻ ഈ മാസ്ക് സഹായിക്കും. മുടി കൊഴിച്ചിലിലും ഘടനയിലും മാറ്റങ്ങൾ കാണണമെങ്കിൽ ഏകദേശം 4 മുതൽ 6 ആഴ്ച വരെ സ്ഥിരമായ ഉപയോഗം ആവശ്യമാണ്.

കൂടാതെ, ഇതൊരു സ്വാഭാവിക പഞ്ചസാര അടങ്ങിയ പാനീയമായതിനാൽ, ഗ്ലൂക്കോസ് നില നിരീക്ഷിക്കുന്നവരോ പ്രമേഹമുള്ളവരോ ആണെങ്കിൽ ഡോക്ടറുമായി കൂടിയാലോചിക്കുന്നത് പ്രധാനമാണ്.