പനങ്കുല തോൽക്കും മുടി, അതിന് ഒന്നും വാങ്ങി തേക്കേണ്ട; വാഴപ്പഴമുണ്ടോ? കറ്റാർവാഴയോ?; ഇങ്ങനെ ഉപയോഗിക്കൂ
കൃത്യമായ പരിചരണം നടത്തുന്നുണ്ടെങ്കിൽ മുടിയുടെ കാര്യത്തിൽ ഒരു ആശങ്കയും വേണ്ടിവരില്ല. പരിചരണം എന്നാൽ ഭക്ഷണത്തോടൊപ്പം തന്നെ ബാഹ്യമായും മുടിയെ സംരക്ഷിക്കണമെന്ന് സാരം. അതിന് വില കൂടിയ ഉത്പന്നങ്ങളൊന്നും വേണ്ട. വീട്ടിൽ തന്നെ തയ്യാറാക്കാവുന്ന ചില ഹെയർ മാസ്കുകൾ തന്നെ ധാരാളം. ഇന്ന് അത്തരത്തിലുള്ള ചില ഹെയർമാസ്കുകളും അവ എങ്ങനെ തയ്യാറാക്കണമെന്നും നോക്കാം
പഴം ഹെയർ മാസ്ക്
വിറ്റാമിനുകളാലും ധാതുക്കളാലും സമ്പന്നമായ വാഴപ്പഴം മുടിയുടെ ആരോഗ്യം മെച്ചപ്പെടുത്താനും വളർച്ചയെ പ്രോത്സാഹിപ്പിക്കാനും സഹായിക്കും. ഇവയിൽ പൊട്ടാസ്യം, പ്രകൃതിദത്ത എണ്ണകൾ, കാർബോഹൈഡ്രേറ്റ്, എന്നിവ അടങ്ങിയിട്ടുണ്ട്. ഈ പോഷകങ്ങൾ മുടിയെ മൃദുവാക്കാനും അതിൻ്റെ സ്വാഭാവിക ഇലാസ്തികത സംരക്ഷിക്കാനും സഹായിക്കുന്നു. അറ്റം പിളരുന്നതും പൊട്ടുന്നതും തടയാനും ഇവ ഉത്തമമാണ്. കൂടാതെ, വാഴപ്പഴം താരൻ നിയന്ത്രിക്കാനും തലയോട്ടിക്ക് ഈർപ്പം നൽകാനും സഹായിക്കും.
മാസ്ക് തയ്യാറാക്കുന്നതിനായി ഒന്നോ രണ്ടോ പഴുത്ത പഴം നന്നായി മാഷ് ചെയ്യുക. ഒരു ടേബിൾ സ്പൂൺ തേൻ ചേർത്ത് നന്നായി ഇളക്കുക.ഈ മിശ്രിതം നന്നായി മുടിയിൽ പുരട്ടുക. ചെറുചൂടുള്ള വെള്ളത്തിൽ കഴുകുന്നതിനുമുമ്പ് 20-30 മിനിറ്റ് തേച്ച് പിടിപ്പിക്കാം.
ഫ്ലക്സീഡ് മാസ്ക്
ഫ്ളാക്സ് സീഡുകളിൽ ഒമേഗ 3 ഫാറ്റി ആസിഡുകൾ അടങ്ങിയിട്ടുണ്ട്, ഇത് മുടിയുടെ ആരോഗ്യത്തിന് അത്യന്താപേക്ഷിതമാണ്. ഈ ഫാറ്റി ആസിഡുകൾ രോമകൂപങ്ങളെ പോഷിപ്പിക്കുകയും ശക്തവും ആരോഗ്യകരവുമായ മുടി വളർച്ചയെ പ്രോത്സാഹിപ്പിക്കുകയും ചെയ്യുന്നു. കൂടാതെ, ഫ്ളാക്സ് സീഡുകളിൽ ലിഗ്നാനുകളും ആൻ്റിഓക്സിഡൻ്റുകളും അടങ്ങിയിട്ടുണ്ട്, ഇത് തലയോട്ടിയെ കേടുപാടുകളിൽ നിന്ന് സംരക്ഷിക്കുന്നു.
രണ്ട് ടേബിൾസ്പൂൺ ഫ്ളാക്സ് സീഡും ഒരു കപ്പ് വെള്ളവുമാണ് മാസ്ക് തയ്യാറാക്കാൻ ആവശ്യം. ഫ്ളാക്സ് സീഡുകൾ ഒരു ജെൽ പോലെയുള്ള സ്ഥിരതയിൽ എത്തുന്നത് വരെ വെള്ളത്തിൽ നന്നായി തിളപ്പിക്കുക. അരിച്ചെടുത്ത് നന്നായി തലയിൽ തേച്ച് പിടിപ്പിച്ച് കഴുകികളയാം. മാസ്ക് ഏകദേശം 30 മിനിറ്റ് തലയിൽ തേച്ച് വെക്കാൻ പ്രത്യേകം ശ്രദ്ധിക്കണം. തുടർന്ന് ചെറുചൂട് വെള്ളത്തിൽ കഴുകാം. ആഴ്ചയിൽ ഒന്നോ രണ്ടോ തവണ മാസ്ക് ഉപയോഗിക്കാം.
കറ്റാർവാഴ മാസ്ക്
തലയോട്ടിയെയും രോമകൂപങ്ങളെയും പോഷിപ്പിക്കാനും ആരോഗ്യകരമായ മുടി വളർച്ചയെ പ്രോത്സാഹിപ്പിക്കാനും കറ്റാർവാഴ ഉത്തമമാണ്. കറ്റാർവാഴയുടെ ഉപയോഗം തലയോട്ടിയിലും മുടിയിലും ജലാംശം നിലനിർത്താൻ സഹായിക്കുന്നു. ഇത് മുടിയുടെ വളർച്ചയെ തടസ്സപ്പെടുത്തുന്ന വരൾച്ചയും പൊട്ടലും പോലുള്ള പ്രശ്നങ്ങൾ തടയും. കറ്റാർ വാഴ മാസ്കുകൾ പതിവായി ഉപയോഗിക്കുന്നത് മുടി മൃദുവും തിളക്കമുള്ളതുമാക്കാൻ സഹായിക്കും.
തലയോട്ടിയിലെ പിഎച്ച് നില സന്തുലിതമാക്കാനും കറ്റാർവാഴ സഹായിക്കും. ഇവയിൽ വിറ്റാമിൻ എ, സി, ഇ തുടങ്ങിയ അവശ്യ പോഷകങ്ങളും അടങ്ങിയിട്ടുണ്ട്. ഈ വിറ്റാമിനുകൾ തലയോട്ടിയിലെ നിർജീവ കോശങ്ങളെ തുരത്തുന്നു, പുതിയ മുടി വളർച്ചയ്ക്ക് അനുകൂലമായ അന്തരീക്ഷം ഉണ്ടാക്കുകയും ചെയ്യുന്നു.
മാസ്ക് തയ്യാറാക്കാനായി കറ്റാർവാഴയിൽ നിന്നും ജെൽ വേർതിരിച്ചെടുക്കാം. ഇതിനുശേഷം തലയോട്ടിയിൽ നന്നായി തേച്ച് പിടിപ്പിക്കാം.ഏകദേശം 30 മിനിറ്റ് നേരം വെച്ച് കഴുകിക്കളയാം. മികച്ച ഫലങ്ങൾക്കായി, ആഴ്ചയിൽ ഒന്നോ രണ്ടോ തവണ ഈ മാസ്ക് ഉപയോഗിക്കാം.
Click it and Unblock the Notifications
Sign in with Google