ഫ്രിഡ്ജിലെ വെള്ളം എന്നും കുടിക്കുന്നത് ദഹനത്തിന് പ്രശ്‌നമുണ്ടാക്കുമോ? ഡോക്ടര്‍മാര്‍ പറയുന്നത്

Updated: Saturday, January 17, 2026, 16:10 [IST]

അടുക്കളയിലെ ഫ്രിഡ്ജിന്റെ ഡോര്‍ തുറന്ന് തണുത്ത വെള്ളം അതേപടി എടുത്ത് കുടിക്കുന്നവരുണ്ട്. ഫ്രിഡ്ജിലെ വെള്ളം കുടിക്കരുതെന്നും അത് മെറ്റബോളിസത്തെ മന്ദഗതിയിലാക്കുമെന്നും പഴയ തലമുറ മുന്നറിയിപ്പു നല്‍കാറുണ്ട്. ആയുര്‍വേദവും ആധുനിക വൈദ്യ ശാസ്ത്രവും തമ്മില്‍ പലപ്പോഴും ചൂടേറിയ ഒരു ചര്‍ച്ചാവിഷയം കൂടിയാണിത്. ഡോക്ടര്‍മാര്‍ പറയുന്നത് ഇത് സാഹചര്യത്തെയും ശീലങ്ങളെയും വ്യക്തിയുടെ ആരോഗ്യത്തെയും ആശ്രയിച്ചിരിക്കും എന്നാണ്.

വെള്ളത്തിന്റെ താപനില ദഹനത്തെയും ഊര്‍ജ്ജത്തെയും സ്വാധീനിക്കുമെന്ന് ആയുര്‍വേദം പറയുന്നു. തണുത്ത വെള്ളം എന്നും കുടിക്കുന്നത് ശരീരഭാരം കൂടുന്നതിനും ഗ്യാസ് പ്രശ്‌നങ്ങള്‍ക്കും ദഹനത്തിന്റെ വേഗത കുറയുന്നതിനും കാരണമാകാമെന്ന് ആയുര്‍വേദ ഡോക്ടര്‍മാര്‍ ചൂണ്ടിക്കാണിക്കുന്നു. ഭക്ഷണം കഴിച്ച ശേഷവും രാത്രിയിലും ദഹനശേഷി കുറഞ്ഞവരിലും ഇത് കൂടുതല്‍ പ്രകടമാകാറുണ്ട്.

ചൂടുള്ളതോ സാധാരണ താപനിലയിലുള്ളതോ ആയ വെള്ളം കുടിക്കുന്നത് ഭക്ഷണം എളുപ്പത്തില്‍ ദഹിക്കാന്‍ സഹായിക്കും. സന്ധി വേദനയോ സൈനസ് പ്രശ്‌നങ്ങളോ ഉള്ള ആളുകള്‍ ദിവസവും തണുത്ത വെള്ളം കുടിക്കുന്നത് ഒഴിവാക്കണം.

അതേസമയം, ആധുനിക വൈദ്യശാസ്ത്രം ശരീരത്തെ വ്യത്യസ്തമായാണ് കാണുന്നത്. തണുത്ത വെള്ളം മെറ്റബോളിസത്തെ തടസപ്പെടുത്തില്ലെന്ന് മിക്ക ഡോക്ടര്‍മാരും പറയുന്നു. പ്രായം, ജനിതക ഘടകങ്ങള്‍, ഹോര്‍മോണുകള്‍, പേശികളുടെ അളവ്, ശാരീരിക പ്രവര്‍ത്തനങ്ങള്‍ എന്നിവയെല്ലാം മെറ്റബോളിസത്തെ നിയന്ത്രിക്കുന്നു. വെള്ളത്തിന്റെ താപനിലയ്ക്ക് ഹ്രസ്വകാല സ്വാധീനം മാത്രമേയുള്ളൂ, അല്ലാതെ മെറ്റബോളിസത്തില്‍ ദീര്‍ഘകാല മാറ്റങ്ങള്‍ വരുത്താന്‍ കഴിയില്ലെന്നും അവര്‍ വ്യക്തമാക്കുന്നു.

ചില പഠനങ്ങള്‍ പറയുന്നത്, തണുത്ത വെള്ളം കുടിക്കുന്നത് ശരീരത്തിലെ കലോറി എരിച്ചുകളയുന്നത് നേരിയ തോതില്‍ വര്‍ദ്ധിപ്പിക്കുമെന്നാണ്. ശരീരത്തിന്റെ താപനിലയിലേക്ക് വെള്ളത്തിന്റെ താപനിലയെ എത്തിക്കാന്‍ ശരീരം ഊര്‍ജ്ജം ഉപയോഗിക്കുന്നതുകൊണ്ടാണിത്. എന്നിരുന്നാലും, ഇത് ശരീരഭാരത്തില്‍ വലിയ മാറ്റങ്ങളൊന്നും ഉണ്ടാക്കുന്നില്ല. ശരീരഭാരം കുറയ്ക്കുന്നതിന് ഭക്ഷണക്രമത്തിനും ശാരീരിക പ്രവര്‍ത്തനങ്ങള്‍ക്കുമാണ് കൂടുതല്‍ പ്രാധാന്യം നല്‍കേണ്ടത്.

തണുത്ത വെള്ളം എന്നും കുടിക്കുന്നത് ചില ആളുകള്‍ക്ക് ബുദ്ധിമുട്ടുണ്ടാക്കാറുണ്ട്. ഇത് ചില രോഗികളില്‍ മൈഗ്രേന്‍ വഷളാക്കാമെന്ന് ഡോക്ടര്‍മാര്‍ പറയുന്നു. പല്ലുകള്‍ക്ക് സെന്‍സിറ്റിവിറ്റി ഉള്ളവര്‍ക്കും, തൊണ്ടയില്‍ പ്രശ്‌നങ്ങള്‍, ഇടയ്ക്കിടെ ചുമ എന്നിവയുള്ളവര്‍ക്കും അസ്വസ്ഥതകള്‍ ഉണ്ടാകാം. ഇത്തരം സാഹചര്യങ്ങളില്‍, ഫ്രിഡ്ജിലെ തണുത്ത പാനീയങ്ങള്‍ ഒഴിവാക്കാന്‍ വിദഗ്ധര്‍ നിര്‍ദേശിക്കുന്നു.

ദഹനത്തെക്കുറിച്ചുള്ള ഗവേഷണ ഫലങ്ങള്‍ പലപ്പോഴും സമ്മിശ്രമാണ്. ചില പഠനങ്ങള്‍ സൂചിപ്പിക്കുന്നത്, തണുത്ത വെള്ളം വയറ്റില്‍ നിന്ന് ആഹാരം പുറത്തേക്ക് പോകുന്നത് മന്ദഗതിയിലാക്കാമെന്നാണ്. ദഹന സംബന്ധമായ പ്രശ്‌നങ്ങളുള്ളവര്‍ക്ക് തണുത്ത വെള്ളം നെഞ്ചില്‍ അസ്വസ്ഥതയുണ്ടാക്കാം. ഇത്തരം സാഹചര്യങ്ങളില്‍ ഇളം ചൂടുവെള്ളം കുടിക്കാന്‍ ഗ്യാസ്‌ട്രോഎന്ററോളജിസ്റ്റുകള്‍ പലപ്പോഴും നിര്‍ദേശിക്കാറുണ്ട്.

രണ്ട് ചികിത്സാ സമ്പ്രദായങ്ങളും ഒരു അടിസ്ഥാന കാര്യത്തില്‍ യോജിക്കുന്നുണ്ട്. താപനിലയേക്കാള്‍ പ്രധാനം ആവശ്യത്തിന് വെള്ളം കുടിക്കുക എന്നതാണ്. ശരീരത്തിലെ ജലാംശം കുറയുന്നത് ദഹനത്തെ മന്ദഗതിയിലാക്കാനും ക്ഷീണം വര്‍ദ്ധിപ്പിക്കാനും മാനസികാവസ്ഥയെ ബാധിക്കാനും സാധ്യതയുണ്ട്. ചൂടേറിയ ഇന്ത്യന്‍ കാലാവസ്ഥയില്‍, സുരക്ഷിതമായ കുടിവെള്ളം ഏത് താപനിലയില്‍ കുടിച്ചാലും വലിയ പ്രശ്‌നം ഉണ്ടാകാറില്ല.

ദൈനംദിന ജീവിതത്തില്‍ ലളിതമായ ഒരു സമീപനം സ്വീകരിക്കാനാണ് വിദഗ്ദ്ധര്‍ നിര്‍ദ്ദേശിക്കുന്നത്. ഭക്ഷണത്തോടൊപ്പവും ശേഷവും സാധാരണ താപനിലയിലുള്ളതോ ഇളം ചൂടുള്ളതോ ആയ വെള്ളം കുടിക്കുക. കഠിനമായ വ്യായാമത്തിനു ശേഷം ശരീരത്തിന് സുഖകരമെങ്കില്‍ തണുത്ത വെള്ളം തിരഞ്ഞെടുക്കാം. പ്രത്യേക ആരോഗ്യ പ്രശ്‌നങ്ങളുള്ള ആളുകള്‍ ഡോക്ടറുടെ നിര്‍ദ്ദേശങ്ങള്‍ പാലിക്കണം.

ഫ്രിഡ്ജിലെ വെള്ളം എന്നത് ഒരു പ്രശ്‌നമല്ല. കുടിവെള്ളം സുരക്ഷിതമായിരിക്കണം. ആരോഗ്യമുള്ളവര്‍ക്ക് മിതമായ അളവില്‍ തണുത്ത വെള്ളം കുടിക്കാം. അസ്വസ്ഥതകള്‍ അനുഭവപ്പെടുന്നവര്‍ക്ക് ആയുര്‍വേദ നിര്‍ദ്ദേശങ്ങള്‍ പാലിച്ച് ഇളം ചൂടുവെള്ളം തിരഞ്ഞെടുക്കാം.