തലയിണയ്ക്കടിയിലെ 'ബോംബ്': ഉറങ്ങുമ്പോൾ ഈ ശീലം ഒഴിവാക്കുക

ഇന്നത്തെ കാലത്ത് സ്മാർട്ട്ഫോണുകൾ ഇല്ലാതെ ഒരു നിമിഷം പോലും നമുക്ക് ജീവിക്കാനാവാത്ത അവസ്ഥയാണ്. ഉറങ്ങാൻ കിടക്കുമ്പോഴും തലയിണയ്ക്കരികിലോ കിടക്കയിലോ ഫോൺ വെക്കുന്ന ശീലം ഭൂരിഭാഗം ആളുകൾക്കുമുണ്ട്. എന്നാൽ, കാലിഫോർണിയയിലെ ആരോഗ്യ വകുപ്പ് പുറത്തുവിട്ട പുതിയ പഠനറിപ്പോർട്ടുകൾ പ്രകാരം, ഈ ശീലം ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാം.

മൊബൈൽ ഫോണുകൾ സിഗ്നലുകൾ സ്വീകരിക്കുന്നതിനും അയക്കുന്നതിനുമായി റേഡിയോ ഫ്രീക്വൻസി ഉപയോഗിക്കുന്നു. ഇതൊരു തരം നോൺ-അയോണൈസിംഗ് റേഡിയേഷനാണ്. എക്സ്-റേ പോലെ ഡി.എൻ.എ നേരിട്ട് നശിപ്പിക്കാൻ ഇതിന് ശേഷിയില്ലെങ്കിലും, ദീർഘനേരം ശരീരത്തോട് ചേർന്ന് ഇരിക്കുന്നത് ടിഷ്യൂകളെ ചൂടാക്കാനും കോശങ്ങളുടെ സ്വാഭാവിക പ്രവർത്തനത്തെ തടസ്സപ്പെടുത്താനും കാരണമായേക്കാം.

സാധ്യതയുള്ള പ്രധാന ആരോഗ്യപ്രശ്നങ്ങൾ:
മസ്തിഷ്ക അർബുദം: ഫോൺ തലയ്ക്ക് അരികിൽ വെച്ച് ഉറങ്ങുന്നത് മസ്തിഷ്കത്തിലെ കോശങ്ങളെ ബാധിക്കുമെന്നും ഇത് ഭാവിയിൽ ട്യൂമറുകൾക്കും അർബുദത്തിനും കാരണമായേക്കാമെന്നും വിദഗ്ധർ മുന്നറിയിപ്പ് നൽകുന്നു.

പ്രത്യുൽപ്പാദന ശേഷിയെ ബാധിക്കുന്നു: ഫോണുകൾ ശരീരത്തോട് ചേർത്ത് വെക്കുന്നത്, പ്രത്യേകിച്ച് പുരുഷന്മാരിൽ പ്രത്യുൽപ്പാദന ശേഷി കുറയാനും ബീജങ്ങളുടെ ഗുണനിലവാരം താഴാനും കാരണമാകുമെന്ന് പഠനങ്ങൾ സൂചിപ്പിക്കുന്നു.

ഉറക്കമില്ലായ്മ (Insomnia): ഫോണിൽ നിന്നുള്ള നീല വെളിച്ചം (Blue light) ഉറക്കത്തിന് സഹായിക്കുന്ന മെലാടോണിൻ ഹോർമോണിന്റെ ഉൽപാദനത്തെ തടയുന്നു. ഇത് ഉറക്കമില്ലായ്മയിലേക്കും മാനസിക സമ്മർദ്ദത്തിലേക്കും നയിക്കുന്നു.

മുതിർന്നവരേക്കാൾ വേഗത്തിൽ റേഡിയേഷൻ ആഗിരണം ചെയ്യാൻ കുട്ടികളുടെ മസ്തിഷ്കത്തിന് സാധിക്കും. അതിനാൽ കുട്ടികൾ ഫോൺ ഉപയോഗിക്കുന്നത് നിയന്ത്രിക്കണമെന്നും രാത്രികാലങ്ങളിൽ ഫോൺ അവരുടെ അരികിൽ വെക്കുന്നില്ലെന്ന് മാതാപിതാക്കൾ ഉറപ്പുവരുത്തണമെന്നും ആരോഗ്യവകുപ്പ് നിർദ്ദേശിക്കുന്നു.

സുരക്ഷിതമായിരിക്കാൻ ശ്രദ്ധിക്കേണ്ട കാര്യങ്ങൾ
ഉറങ്ങുമ്പോൾ ഫോൺ കുറഞ്ഞത് മൂന്ന് അടി ദൂരെയെങ്കിലും മാറ്റി വെക്കുക. ബെഡ്‌റൂമിന് പുറത്ത് വെക്കുന്നതാണ് ഏറ്റവും ഉചിതം. സിഗ്നൽ കുറവുള്ള സമയങ്ങളിൽ ഫോൺ കൂടുതൽ റേഡിയേഷൻ പുറത്തുവിടുന്നു. അത്തരം സമയങ്ങളിൽ ഫോൺ ഉപയോഗം കുറയ്ക്കുക. ഫോൺ എപ്പോഴും പോക്കറ്റിൽ സൂക്ഷിക്കാതെ ബാഗിലോ മറ്റോ വെക്കാൻ ശ്രമിക്കുക. വലിയ ഫയലുകൾ ഡൗൺലോഡ് ചെയ്യുമ്പോഴും വീഡിയോകൾ സ്ട്രീം ചെയ്യുമ്പോഴും റേഡിയേഷൻ കൂടുതലായിരിക്കും. അത്തരം സമയങ്ങളിൽ ഫോൺ ശരീരത്തിൽ നിന്ന് അകറ്റി വെക്കുക.

മൊബൈൽ ഫോണുകൾ നമ്മുടെ ജീവിതത്തിന്റെ ഭാഗമാണെങ്കിലും, വിവേകപൂർണ്ണമായ ഉപയോഗത്തിലൂടെ നമുക്ക് ആരോഗ്യപ്രശ്നങ്ങൾ ഒരു പരിധിവരെ തടയാൻ സാധിക്കും. ലളിതമായ ഇത്തരം മുൻകരുതലുകൾ ഭാവിയിലെ വലിയ വിപത്തുകളിൽ നിന്ന് നമ്മെ സംരക്ഷിക്കും