ടെന്‍ഷന്‍ കുറയ്ക്കുന്ന ഫുഡോ? സമ്മര്‍ദം കുറയ്ക്കാന്‍ ഈ സൂപ്പര്‍ ഫുഡുകള്‍ ഡയറ്റില്‍ ഉള്‍പ്പെടുത്തൂ

Updated: Sunday, January 18, 2026, 13:50 [IST]

വലിയ മാനസിക സമ്മര്‍ദമാണ് ഇന്ന് കുടുംബങ്ങളിലും ഓഫീസുകളിലും ഇന്ത്യന്‍ യുവത്വം നേരിടുന്നത്. അമിത ജോലി ഭാരം, സാമ്പത്തിക പ്രശ്നങ്ങള്‍, നഗരത്തിലെ തിരക്കുകള്‍, കുടുംബ പ്രശ്‌നങ്ങള്‍ എന്നിവയെല്ലാം ആരോഗ്യത്തെയും ഗുരുതരമായി ബാധിക്കാറുണ്ട്. എന്നാല്‍, ഭക്ഷണരീതിയില്‍ വരുത്തുന്ന ചില ലളിതമായ മാറ്റങ്ങള്‍ മാനസിക സമ്മര്‍ദത്തിന് ഒരളവു വരെ പരിഹാരമേകും.

നമ്മുടെ അടുക്കളകളില്‍ സ്വാഭാവികമായിത്തന്നെ സമ്മര്‍ദവും ഉത്കണ്ഠയും കുറയ്ക്കാന്‍ സഹായിക്കുന്ന പല വിഭവങ്ങളുമുണ്ട്. മാനസികാരോഗ്യത്തിന് ഗുണകരമായ, എളുപ്പത്തില്‍ ഭക്ഷണത്തില്‍ ഉള്‍പ്പെടുത്താന്‍ കഴിയുന്ന പത്ത് ഇന്ത്യന്‍ ഭക്ഷണങ്ങളെക്കുറിച്ചാണ് ഇവിടെ പറയുന്നത്.

അശ്വഗന്ധ എന്ന ഔഷധ സസ്യം സമ്മര്‍ദം കുറയ്ക്കുന്ന ഹോര്‍മോണുകളെ നിയന്ത്രിക്കുന്നതായി ആയുര്‍വേദത്തില്‍ പറയുന്നുണ്ട്. സാധാരണയായി അശ്വഗന്ധ പൊടി ചൂടുപാലില്‍ കലര്‍ത്തിയോ ഗുളിക രൂപത്തിലോ കഴിക്കാറുണ്ട്. ഗര്‍ഭിണികള്‍ ഇത് ഒഴിവാക്കണം. സ്ഥിരമായി ഉപയോഗിക്കുന്നതിന് മുമ്പ് ഒരു ഡോക്ടറെ സമീപിക്കുന്നത് ഉചിതമാണ്.

എല്ലാ വീടുകളിലും കാണുന്ന ഒന്നാണ് തുളസി. തുളസിയിലകള്‍ മാനസികാവസ്ഥ മെച്ചപ്പെടുത്താനും ഏകാഗ്രത വര്‍ദ്ധിപ്പിക്കാനും സഹായിക്കുമെന്നാണ് വിശ്വാസം. ഇത് ഹെര്‍ബല്‍ ചായയായി കുടിക്കുകയോ രാവിലെ പച്ചയില ചവച്ചരച്ച് കഴിക്കുകയോ ചെയ്യാം. ചില മരുന്നുകളുമായി തുളസിക്ക് പ്രതിപ്രവര്‍ത്തനങ്ങളുണ്ടാകാന്‍ സാധ്യതയുള്ളതിനാല്‍, വൈദ്യോപദേശം തേടുന്നത് നന്നായിരിക്കും.

മഞ്ഞളില്‍ അടങ്ങിയിരിക്കുന്ന കുര്‍ക്കുമിന്‍ എന്ന ഘടകത്തിന് വീക്കം തടയാനുള്ള കഴിവുണ്ട്. ശരീരത്തിലെ വീക്കവും മാനസിക പ്രശ്‌നങ്ങളും തമ്മില്‍ ബന്ധമുണ്ടെന്ന് പഠനങ്ങള്‍ സൂചിപ്പിക്കുന്നു. കറികള്‍, പാല്‍ എന്നിവയില്‍ മഞ്ഞള്‍ ചേര്‍ക്കാം. കുരുമുളകിനൊപ്പം ഉപയോഗിക്കുമ്പോള്‍ കുര്‍ക്കുമിന്റെ ആഗിരണം മെച്ചപ്പെടും.

കുടലിന്റെ ആരോഗ്യവും മാനസികാരോഗ്യവും തമ്മില്‍ അഭേദ്യമായ ബന്ധമുണ്ടെന്നാണ് പുതിയ പഠനങ്ങള്‍ വ്യക്തമാക്കുന്നത്. തൈര് കുടിക്കുന്നത് ശരീരത്തിന് പ്രോട്ടീനും കുടലിന്റെ ആരോഗ്യത്തിന് നല്ല ബാക്ടീരിയകളും നല്‍കുന്നു. ഉച്ചഭക്ഷണത്തോടൊപ്പം ഒരു പാത്രം തൈര് കഴിക്കുന്നത് ദഹനത്തിന് സഹായിക്കും. വീട്ടിലുണ്ടാക്കുന്ന തൈര് വളരെ ചെലവ് കുറഞ്ഞ ഒരു ഓപ്ഷനാണ്.

ബദാമില്‍ മഗ്‌നീഷ്യവും ആരോഗ്യകരമായ കൊഴുപ്പുകളും ധാരാളമായി അടങ്ങിയിട്ടുണ്ട്. മഗ്‌നീഷ്യം മികച്ച ഉറക്കത്തിനും ഉത്കണ്ഠ കുറയ്ക്കാനും സഹായിച്ചേക്കാം. കുതിര്‍ത്ത ബദാം കഴിക്കുന്നതാണ് ഏറ്റവും നല്ലത്. ഇത് ഓഫീസില്‍ ലഘുഭക്ഷണമായും ഉപയോഗിക്കാം. നട്സ് അലര്‍ജിയുള്ളവര്‍ ഇത് ഒഴിവാക്കണം.

വാള്‍നട്ടില്‍ തലച്ചോറിന്റെ ആരോഗ്യവുമായി ബന്ധപ്പെട്ട ഒമേഗ-3 ഫാറ്റുകള്‍ അടങ്ങിയിട്ടുണ്ട്. ഇത് വൈകുന്നേരങ്ങളിലെ ലഘുഭക്ഷണമായോ പ്രഭാത ഭക്ഷണത്തോടൊപ്പമോ കഴിക്കാം. ഒരു ചെറിയ പിടി വാള്‍നട്ട് മതിയാകും. വില അല്‍പം കൂടുതലാണ്.

മുരിങ്ങയിലയില്‍ ഇരുമ്പും വിറ്റാമിനുകളും ധാരാളമായുണ്ട്. ഇത് മാനസികാവസ്ഥയെ സ്ഥിരപ്പെടുത്താന്‍ സഹായിക്കും. മുരിങ്ങയില ദാലും തോരനും ഉണ്ടാക്കാന്‍ ഉപയോഗിക്കാം. തിരക്കുള്ളവര്‍ക്ക് മുരിങ്ങയിലപ്പൊടി ചപ്പാത്തിയിലോ സ്മൂത്തികളിലോ കലര്‍ത്തി കഴിക്കാവുന്നതാണ്.

എള്ളുണ്ടയില്‍ ഉപയോഗിക്കുന്ന എള്ള് കാല്‍സ്യത്തിന്റെ മികച്ച ഉറവിടമാണ്. ശരീരത്തിലെ കാല്‍സ്യത്തിന്റെ അളവ് നാഡീവ്യൂഹത്തിന്റെ ശരിയായ പ്രവര്‍ത്തനത്തിന് സഹായിക്കുന്നു. ഒരു സ്പൂണ്‍ വറുത്ത എള്ള് സാലഡിലോ ചോറിലോ ചേര്‍ത്ത് കഴിക്കുന്നത് നല്ലതാണ്.

പല ഇന്ത്യന്‍ വീടുകളിലും നെയ്യ് ഒരു പ്രധാന ഭക്ഷ്യവസ്തുവാണ്. വിറ്റാമിന്‍ എ, ഡി, ഇ, കെ തുടങ്ങിയ കൊഴുപ്പില്‍ ലയിക്കുന്ന വിറ്റാമിനുകള്‍ നെയ്യില്‍ അടങ്ങിയിരിക്കുന്നു. ഈ വിറ്റാമിനുകള്‍ തലച്ചോറിന്റെയും നാഡികളുടെയും ആരോഗ്യത്തിന് വളരെ പ്രധാനമാണ്. ദാല്‍, കിഴങ്ങ് കറി, ചപ്പാത്തി എന്നിവയോടൊപ്പം ചെറിയ അളവില്‍ നെയ്യ് ചേര്‍ക്കുന്നത് ആരോഗ്യകരമാണ്.

എന്നാല്‍ ഈ ഭക്ഷണങ്ങള്‍ക്കൊന്നും വൈദ്യസഹായത്തിനോ മരുന്നുകള്‍ക്കോ പകരമാകാന്‍ കഴിയില്ല. എന്നിരുന്നാലും, ആവശ്യത്തിന് ഉറക്കം, വ്യായാമം എന്നിവയോടൊപ്പം സമ്മര്‍ദ്ദം നിയന്ത്രിക്കാന്‍ ഇവ സഹായിച്ചേക്കും. ആരോഗ്യ പ്രശ്നങ്ങളുള്ളവര്‍ ഭക്ഷണത്തില്‍ മാറ്റങ്ങള്‍ വരുത്തുന്നതിന് മുമ്പ് ഡോക്ടറുടെയോ ഡയറ്റീഷ്യന്റെയോ വിദഗ്‌ദ്ധോപദേശം തേടേണ്ടത് അത്യാവശ്യമാണ്.