ഭക്ഷണത്തിനും മുമ്പും ശേഷവും ചായയും കാപ്പിയും കുടിക്കല്ലേ..! ഐസിഎംആര് പറയുന്നത് കേള്ക്കൂ
ചായയും കാപ്പിയും ഏതൊരാളുടേയും പ്രിയപ്പെട്ട പാനീയമാണ്. ഭൂരിഭാഗം പേരും തങ്ങളുടെ ഒരു ദിവസം ആരംഭിക്കുന്നത് തന്നെ ഒരു കപ്പ് കാപ്പിയില് നിന്നോ ചായയില് നിന്നോ ആയിരിക്കും. ഉന്മേഷത്തോടെയിരിക്കാന് ഇവ രണ്ടും സഹായിക്കും എന്നതാണ് അതിന് പലരും പറയുന്ന കാരണം. നിരവധി ആരോഗ്യഗുണങ്ങളും ചായയും കാപ്പിയും പ്രദാനം ചെയ്യുന്നുണ്ട്. എന്നാല് ഇപ്പോഴിതാ ഐസിഎംആര് ചായയുടെയും കാപ്പിയുടെയും കാര്യത്തില് വിലപ്പെട്ട ഒരു നിര്ദേശവുമായി രംഗത്തെത്തിയിരിക്കുകയാണ്.
ചായയുടെയും കാപ്പിയുടെയും ഉപഭോഗത്തില് മിതത്വം പാലിക്കണം എന്നാണ് ഐസിഎംആര് പറയുന്നത്. ഇന്ത്യയിലുടനീളമുള്ള ആരോഗ്യകരമായ ഭക്ഷണശീലങ്ങള് പ്രോത്സാഹിപ്പിക്കുകയെന്ന ലക്ഷ്യത്തോടെ നാഷണല് ഇന്സ്റ്റിറ്റ്യൂട്ട് ഓഫ് ന്യൂട്രീഷന്റെ പങ്കാളിത്തത്തോടെ ഐസിഎംആര് അടുത്തിടെ 17 പുതിയ ഭക്ഷണ മാര്ഗനിര്ദ്ദേശങ്ങള് അവതരിപ്പിച്ചിരുന്നു.
ഈ മാര്ഗനിര്ദ്ദേശങ്ങള് വൈവിധ്യമാര്ന്ന ഭക്ഷണക്രമത്തിന്റെയും സജീവമായ ജീവിതശൈലിയുടെയും പ്രാധാന്യം ഊന്നിപ്പറയുന്നു. സാംസ്കാരിക പ്രാധാന്യം തിരിച്ചറിഞ്ഞുകൊണ്ട് തന്നെ ആരോഗ്യപ്രശ്നങ്ങള് കാരണം ചായയും കാപ്പിയും അമിതമായി കഴിക്കുന്നതിനെതിരെ ആരോഗ്യ വിദഗ്ധര് ഇതില് മുന്നറിയിപ്പ് നല്കുന്നു. ചായയിലും കാപ്പിയിലും കഫീന് അടങ്ങിയിട്ടുണ്ട്.
ഇത് കേന്ദ്ര നാഡീവ്യൂഹത്തെ ഉത്തേജിപ്പിക്കുകയും ശാരീരിക ആശ്രിതത്വത്തെ പ്രേരിപ്പിക്കുകയും ചെയ്യുന്നു എന്ന് ഐസിഎംആര് ഗവേഷകര് വിശദീകരിച്ചു. 150 മില്ലി കപ്പ് ബ്രൂഡ് കോഫിയില് 80 - 120 മില്ലിഗ്രാം കഫീന്, ലൈവ് കോഫിയില് 50 - 65 മില്ലിഗ്രാം, ചായയില് 30 - 65 മില്ലിഗ്രാം എന്നിവ അടങ്ങിയിട്ടുണ്ടെന്ന് പഠനം ചൂണ്ടിക്കാട്ടുന്നു. പ്രതിദിനം വെറും 300 മില്ലിഗ്രാം കഫീന് കഴിക്കണമെന്നാണ് ഐസിഎംആര് നിര്ദേശിക്കുന്നത്.
ഭക്ഷണത്തിന് മുമ്പും ശേഷവും കുറഞ്ഞത് ഒരു മണിക്കൂറെങ്കിലും ചായയോ കാപ്പിയോ ഒഴിവാക്കണമെന്ന് ഐസിഎംആര് നിര്ദേശിക്കുന്നു, കാരണം അവയില് ടാന്നിന് അടങ്ങിയിട്ടുണ്ട്. ഇത് ശരീരത്തിലെ ഇരുമ്പിന്റെ ആഗിരണം കുറയ്ക്കും. ആമാശയത്തിലെ ഇരുമ്പുമായി ടാനിനുകള് ബന്ധിപ്പിക്കുന്നു. ഇത് ഇരുമ്പ് ശരിയായി ആഗിരണം ചെയ്യുന്നത് ശരീരത്തിന് ബുദ്ധിമുട്ടാക്കുന്നു.
ഇത് ഇരുമ്പിന്റെ അപര്യാപ്തതയ്ക്കും അനീമിയ പോലുള്ള ആരോഗ്യപ്രശ്നങ്ങള്ക്കും ഇടയാക്കും. അമിതമായ കാപ്പി ഉപഭോഗം ഉയര്ന്ന രക്തസമ്മര്ദ്ദത്തിനും ഹൃദയ സംബന്ധമായ ക്രമക്കേടുകള്ക്കും കാരണമാകുമെന്ന് റിപ്പോര്ട്ടില് പറയുന്നു. എന്നിരുന്നാലും കട്ടന് ചായ കുടിക്കുന്നത് മെച്ചപ്പെട്ട രക്തചംക്രമണം, കൊറോണറി ആര്ട്ടറി രോഗങ്ങള്, വയറ്റിലെ ക്യാന്സര് തുടങ്ങിയ അവസ്ഥകളുടെ അപകടസാധ്യത കുറയ്ക്കുമെന്നും മാര്ഗ്ഗനിര്ദ്ദേശങ്ങള് പറയുന്നു.
കൂടാതെ എണ്ണ, പഞ്ചസാര, ഉപ്പ് എന്നിവയുടെ ഉപയോഗം പരിമിതപ്പെടുത്തിക്കൊണ്ട് പഴങ്ങള്, പച്ചക്കറികള്, ധാന്യങ്ങള്, മെലിഞ്ഞ മാംസം, സമുദ്രവിഭവങ്ങള് എന്നിവ അടങ്ങിയ ഭക്ഷണക്രമവും ഐസിഎംആര് ശുപാര്ശ ചെയ്യുന്നു.
Click it and Unblock the Notifications
Sign in with Google