ബ്രേക്ക്ഫാസ്റ്റിനൊപ്പം തേങ്ങാവെള്ളം..!! ഒരിക്കലെങ്കിലും ട്രൈ ചെയ്ത് നോക്കൂ, മാറ്റം തിരിച്ചറിയൂ

By Desk

Updated: Sunday, July 16, 2023, 9:14 [IST]

തേങ്ങ പൊട്ടിക്കുമ്പോള്‍ തന്നെ അതിന്റെ വെള്ളം മൊത്തി കുടിക്കാത്തവര്‍ ആരുമുണ്ടാകില്ല. പ്രായഭേദമന്യേ ആബാലവൃദ്ധം ജനങ്ങളും ഇങ്ങനെ ചെയ്യാറുണ്ട്. തേങ്ങാവെള്ളം ഉന്മേഷദായകവും പോഷകസമൃദ്ധവുമായ ഒരു പാനീയമാണ് എന്ന് എല്ലാവര്‍ക്കും അറിയാമല്ലോ. എന്നാല്‍ പ്രഭാത ഭക്ഷണത്തോടൊപ്പം തേങ്ങാവെള്ളം ചേര്‍ക്കുന്നത് കൊണ്ടുള്ള ആരോഗ്യ ഗുണങ്ങള്‍ എന്തൊക്കെയാണ് എന്ന് അറിയാമോ?.

രോഗപ്രതിരോധ ശേഷി വര്‍ദ്ധിപ്പിക്കാനും സമ്മര്‍ദ്ദം കുറയ്ക്കാനും സഹായിക്കുന്ന ഉത്തമപാനീയമാണ് തേങ്ങാവെള്ളം എന്നാണ് പറയുന്നത്. ഇത് രാവിലെ തന്നെ കഴിക്കുന്നത് കൊണ്ട് നിരവധിയായ ഗുണങ്ങളാണ് ഉള്ളത്. ദിവസം മുഴുവന്‍ ഉന്മേഷം പ്രദാനം ചെയ്യാന്‍ തേങ്ങാവെള്ളം കൊണ്ട് സാധിക്കുമത്രേ. രാവിലെ ഭക്ഷണത്തില്‍ തേങ്ങാവെള്ളം ചേര്‍ക്കുന്നത് കൊണ്ടുള്ള ചില ആരോഗ്യ ഗുണങ്ങള്‍ നമുക്ക് നോക്കാം.

ശരീരത്തില്‍ ഇലക്ട്രോലൈറ്റുകള്‍ നിറയ്ക്കാനും ജലാംശം നിലനിര്‍ത്താനും സഹായിക്കുന്ന പ്രകൃതിദത്ത ഐസോടോണിക് പാനീയമാണ് തേങ്ങാവെള്ളം. ഇതില്‍ ഉയര്‍ന്ന അളവില്‍ പൊട്ടാസ്യം അടങ്ങിയിട്ടുള്ളതിനാല്‍ തന്നെ ജലാംശത്തിന്റെ സന്തുലിതാവസ്ഥ നിലനിര്‍ത്തുന്നതിനും പേശികളുടെ ശരിയായ പ്രവര്‍ത്തനത്തെ സഹായിക്കുന്നതിനും അത്യാവശ്യമാണ് എന്നാണ് പറയപ്പെടുന്നത്.

തേങ്ങാവെള്ളത്തില്‍ ഡയറ്ററി ഫൈബര്‍ അടങ്ങിയിട്ടുണ്ട്. ഇത് മലബന്ധം തടയുകയും സ്ഥിരമായ മലവിസര്‍ജ്ജനത്തെ പിന്തുണയ്ക്കുകയും ചെയ്യും. അതുവഴി നിങ്ങളുടെ ആരോഗ്യകരമായ ദഹനവ്യവസ്ഥയെ പ്രോത്സാഹിപ്പിക്കും. ദഹനപ്രശ്‌നങ്ങള്‍ തടയുന്നതിനോ ലഘൂകരിക്കുന്നതിനോ സഹായിക്കുന്ന പോഷകഗുണം തേങ്ങാവെള്ളത്തില്‍ ആവോളം ഉണ്ടത്രേ.

ഓക്‌സിഡേറ്റീവ് സമ്മര്‍ദ്ദത്തില്‍ നിന്ന് ശരീരത്തെ സംരക്ഷിക്കാന്‍ സഹായിക്കുന്ന വിറ്റാമിന്‍ സി, വിവിധ ഫൈറ്റോകെമിക്കലുകള്‍ തുടങ്ങിയ ആന്റിഓക്സിഡന്റുകള്‍ തേങ്ങാവെള്ളത്തില്‍ അടങ്ങിയിട്ടുണ്ട് എന്നാണ് പറയുന്നത്. വീക്കം കുറയ്ക്കുന്നതിലും വിട്ടുമാറാത്ത രോഗങ്ങളുടെ സാധ്യത കുറയ്ക്കുന്നതിലും ആന്റിഓക്സിഡന്റുകള്‍ ഒരു പങ്ക് വഹിക്കുന്നു എന്ന് അറിയാമല്ലോ?

തേങ്ങാവെള്ളത്തില്‍ കലോറിയും കൊഴുപ്പും കുറവാണ്. അതിനാല്‍ തന്നെ ഭാരം കുറക്കാന്‍ ആഗ്രഹിക്കുന്നവര്‍ക്ക് പരീക്ഷിക്കാവുന്ന പാനീയമാണ് തേങ്ങാ വെള്ളം. പഞ്ചസാരയും കൃത്രിമ അഡിറ്റീവുകളും ചേര്‍ക്കാതെ തന്നെ പ്രകൃതിദത്തമായ മധുരം പ്രദാനം ചെയ്യുന്നതിനാല്‍ മധുര പാനീയങ്ങള്‍ക്ക് ബദലായും ഇത് ഉപയോഗിക്കാം.

വിറ്റാമിന്‍ സി, മഗ്‌നീഷ്യം, കാത്സ്യം, ഫോസ്ഫറസ് എന്നിവയുള്‍പ്പെടെ നിരവധി അവശ്യ പോഷകങ്ങളുടെ നല്ല ഉറവിടമാണ് തേങ്ങാവെള്ളം. ഈ പോഷകങ്ങള്‍ മൊത്തത്തിലുള്ള ആരോഗ്യത്തിനും വളരെ പ്രയോജനപ്രദമാണ്. ഒപ്പം നിങ്ങളുടെ വിവിധ ശാരീരിക പ്രവര്‍ത്തനങ്ങളെ പിന്തുണയ്ക്കുകയും ചെയ്യുന്നു. തേങ്ങാവെള്ളം നേരിട്ട് കുടിക്കാതെ തേങ്ങാവെള്ളം ഒഴിച്ചുള്ള പലഹാരങ്ങള്‍ ഉണ്ടാക്കി കഴിക്കുന്നത് നല്ല ആരോഗ്യശീലങ്ങളില്‍ ഒന്നാണ്.