കൊളസ്ട്രോൾ ഉള്ളവർ മുട്ടയുടെ മഞ്ഞക്കരു കഴിക്കാൻ പാടില്ലേ? വിദഗ്ദ്ധർ പറയുന്നത് ഇതാണ്

കൊളസ്ട്രോൾ ഉളളവർ മുട്ട കഴിക്കണമോ അതോ ഒഴിവാക്കണമോ എന്നതിൽ പലരും ഇപ്പോഴും കൺഫ്യൂഷനിലാണ്. വർഷങ്ങളായി, രക്തത്തിലെ കൊളസ്ട്രോൾ കൂട്ടുന്നതിനും ഹൃദ്രോഗസാധ്യത വർദ്ധിപ്പിക്കുന്നതിനും പ്രതിസ്ഥാനത്ത് നിർത്തിയിരുന്നത് മുട്ടയുടെ മഞ്ഞക്കരുവിനെയായിരുന്നു.

എന്നാൽ പോഷകാഹാര ശാസ്ത്രം ഏറെ മുന്നോട്ടുപോയിക്കഴിഞ്ഞു, അതോടൊപ്പം ശരീരത്തിൽ കൊളസ്ട്രോൾ എങ്ങനെ പ്രവർത്തിക്കുന്നു എന്നതിനെക്കുറിച്ചുള്ള നമ്മുടെ ധാരണയും മാറി. മുട്ടയിൽ എത്ര കൊളസ്ട്രോൾ അടങ്ങിയിരിക്കുന്നു എന്നതിലുപരി, അത് നമ്മുടെ ആരോഗ്യത്തെ എങ്ങനെ ബാധിക്കുന്നു എന്നതാണ് ഇപ്പോൾ പ്രധാനം.

ഒരു മുട്ടയുടെ മഞ്ഞക്കരുവിൽ എത്ര കൊളസ്ട്രോൾ ഉണ്ട്?

മുട്ടയുടെ മഞ്ഞക്കരുവിൽ കൊളസ്ട്രോൾ കൂടുതലായുണ്ട് എന്നത് ശരിയാണ്. ഒരു മുട്ടയുടെ മഞ്ഞക്കരുവിൽ ഏകദേശം 200 മില്ലിഗ്രാം കൊളസ്ട്രോൾ അടങ്ങിയിരിക്കുന്നു. അമേരിക്കൻ ഹാർട്ട് അസോസിയേഷന്റെ അഭിപ്രായത്തിൽ, ആരോഗ്യവാനായ ഒരു വ്യക്തിക്ക് ദിവസം 300 മില്ലിഗ്രാം വരെ കൊളസ്ട്രോൾ ഭക്ഷണത്തിലൂടെ കഴിക്കാം. ഇതുകൊണ്ടുതന്നെ, മുട്ടയുടെ മഞ്ഞക്കരു കഴിച്ചാൽ സുരക്ഷിതമായ അളവ് പെട്ടെന്ന് കവിയും എന്ന് പലരും കരുതുന്നു. എന്നാൽ, നമ്മൾ ഭക്ഷണത്തിലൂടെ കഴിക്കുന്ന കൊളസ്ട്രോൾ മാത്രമല്ല രക്തത്തിലെ കൊളസ്ട്രോളിന്റെ അളവ് നിർണ്ണയിക്കുന്നത്.

മുട്ടയുടെ മഞ്ഞക്കരു കഴിക്കുന്നത് രക്തത്തിലെ കൊളസ്ട്രോൾ കൂട്ടുമോ?

ഇവിടെയാണ് ശാസ്ത്രം കൗതുകകരമാകുന്നത്. പോഷകാഹാര വിദഗ്ദ്ധയായശാലിനി സുധാകർ പറയുന്നതനുസരിച്ച്, മുട്ട പോലുള്ള ഭക്ഷണങ്ങളിലുള്ള കൊളസ്ട്രോൾ ഭൂരിഭാഗം ആളുകളിലും രക്തത്തിലെ കൊളസ്ട്രോളിന്റെ അളവ് കൂട്ടാറില്ല. ശരീരത്തിലെ കൊളസ്ട്രോൾ കൂട്ടുന്നതിൽ ഭക്ഷണത്തിലെ കൊളസ്ട്രോളിനേക്കാൾ കൂടുതൽ പങ്ക് വഹിക്കുന്നത് പൂരിത കൊഴുപ്പുകൾ ആണെന്ന് പഠനങ്ങൾ വ്യക്തമാക്കുന്നു.

ലളിതമായി പറഞ്ഞാൽ, മുട്ട പോലുള്ള പ്രകൃതിദത്ത കൊളസ്ട്രോൾ അടങ്ങിയ ഭക്ഷണങ്ങൾ കഴിക്കുന്നതിനേക്കാൾ ഹാനികരമാകുന്നത് പൂരിത കൊഴുപ്പ് അടങ്ങിയ ഭക്ഷണങ്ങൾ കഴിക്കുന്നതാണ്. അതുകൊണ്ട് മുട്ടയുടെ മഞ്ഞക്കരു മാത്രം ഒഴിവാക്കുന്നത് കൊളസ്ട്രോൾ നിയന്ത്രിക്കാനുള്ള ഏറ്റവും നല്ല മാർഗ്ഗമല്ല.

മുട്ട വെറുമൊരു കൊളസ്ട്രോൾ മാത്രമല്ല

പലരും മുട്ടയെ വെറുമൊരു കൊളസ്ട്രോൾ അടങ്ങിയ ഭക്ഷണമായിട്ടാണ് കാണുന്നത്, എന്നാൽ ശരീരത്തിന് ആവശ്യമായ നിരവധി പോഷകങ്ങൾ ഇതിലുണ്ട്. ശാലിനി സുധാകർ പറയുന്നതനുസരിച്ച്, മുട്ട വിറ്റാമിനുകളുടെയും ധാതുക്കളുടെയും ഒരു കലവറയാണ്. ഇതിൽ വിറ്റാമിൻ എ, ബി വിറ്റാമിനുകൾ, ബി2,ഫോളേറ്റ്, സെലിനിയം എന്നിവ അടങ്ങിയിരിക്കുന്നു. മൊത്തത്തിലുള്ള ആരോഗ്യം നിലനിർത്താനും, രോഗപ്രതിരോധ ശേഷി കൂട്ടാനും, തലച്ചോറിന്റെ പ്രവർത്തനങ്ങൾ മെച്ചപ്പെടുത്താനും ഈ പോഷകങ്ങൾ സഹായിക്കുന്നു. മഞ്ഞക്കരു പൂർണ്ണമായി ഒഴിവാക്കുന്നതിലൂടെ, നിങ്ങളുടെ ശരീരത്തിന് ദിവസവും ആവശ്യമുള്ള ഈ പ്രധാന പോഷകങ്ങളാണ് നിങ്ങൾക്ക് നഷ്ടപ്പെടുന്നത്.

ഒരു ദിവസം എത്ര മുട്ട സുരക്ഷിതമായി കഴിക്കാം?

മിതത്വമാണ് ഇതിന്റെ പ്രധാന രഹസ്യം. വിദഗ്ദ്ധരുടെ നിർദ്ദേശപ്രകാരം
ആരോഗ്യവാനായ ഒരു വ്യക്തിക്ക് ഒരു ദിവസം 4 മുട്ടയുടെ വെള്ളയും 2 മഞ്ഞക്കരുവും സുരക്ഷിതമായി കഴിക്കാം. ഉയർന്ന കൊളസ്ട്രോൾ ഉള്ളവർക്ക് ഒരു ദിവസം 4 മുട്ടയുടെ വെള്ളയും 1 മഞ്ഞക്കരുവും തങ്ങളുടെ ഭക്ഷണക്രമത്തിൽ ഉൾപ്പെടുത്താം. ശാലിനി സുധാകറുടെ അഭിപ്രായത്തിൽ, ഈ രീതിയിലൂടെ കൊളസ്ട്രോൾ അമിതമാകാതെ തന്നെ മുട്ടയുടെ മുഴുവൻ പോഷകഗുണങ്ങളും നിങ്ങൾക്ക് നേടിയെടുക്കാം.

മുട്ടയുടെ മഞ്ഞക്കരു പൂർണ്ണമായും ഒഴിവാക്കണമോ?

പൂർണ്ണമായും ഒഴിവാക്കേണ്ടതില്ല എന്നതാണ് ലളിതമായ ഉത്തരം. കൊളസ്ട്രോൾ ഉള്ളവർ പോലും മുട്ടയുടെ മഞ്ഞക്കരു പൂർണ്ണമായി ഒഴിവാക്കേണ്ട കാര്യമില്ല. നിങ്ങളുടെ മൊത്തത്തിലുള്ള ഭക്ഷണരീതിയും ജീവിതശൈലിയുമാണ് ഇവിടെ പ്രധാനം. പൂരിത കൊഴുപ്പുകൾ സംസ്കരിച്ച ഭക്ഷണങ്ങൾ എന്നിവ കുറയ്ക്കുന്നതും കൃത്യമായി വ്യായാമം ചെയ്യുന്നതുമാണ് കൊളസ്ട്രോൾ നിയന്ത്രിക്കാൻ ഏറ്റവും പ്രധാനം. കൃത്യമായ അളവിൽ കഴിച്ചാൽ മുട്ട ഒരു സമീകൃതാഹാരത്തിന്റെനല്ലൊരു ഭാഗമാണ്.