കറിവേപ്പില എറിഞ്ഞ് കളയാൻ വരട്ടെ, കാര്യമുണ്ട്.. മുടി കൊഴിച്ചിൽ മുതൽ പ്രമേഹത്തിനും വണ്ണം കുറയ്ക്കാനും വരെ..

Updated: Friday, June 6, 2025, 23:22 [IST]

ഭക്ഷണത്തിന് രുചി കൂട്ടാൻ അവിഭാജ്യമാണ് ഈ വിരുതൻ, എന്നാൽ കഴിക്കാൻ നമുക്ക് ആർക്കും അത്ര താൽപര്യം പോര താനും. അതേ ഈ പറയുന്നത് കറിവേപ്പിലയെ കുറിച്ച് തന്നെയാണ്. ആവശ്യം കഴിഞ്ഞാൽ കറികളിൽ നിന്നും നമ്മളെടുത്ത് പുറത്തേക്ക് കളയുന്ന കറിവേപ്പില പക്ഷേ ചില്ലറക്കാരനല്ല. രുചി മാത്രമല്ല കറി വേപ്പില നൽകുന്നത്.

നമുക്ക് വീട്ടുമുറ്റത്ത് തന്നെ കിട്ടുന്ന കറിവേപ്പില നിരവധി ആരോഗ്യ ഗുണങ്ങൾ നൽകുന്ന പോഷകങ്ങളാൽ നിറഞ്ഞിരിക്കുന്നതാണ്. കാഴ്ചശക്തി മെച്ചപ്പെടുത്താനും പ്രതിരോധശേഷി വർദ്ധിപ്പിക്കാനും സഹായിക്കുന്ന വിറ്റാമിൻ എ, ബി, സി, ഇ എന്നിവ ഇതിൽ അടങ്ങിയിട്ടുണ്ട്. അസ്ഥികളുടെ ആരോഗ്യത്തിന് അത്യാവശ്യമായ കാൽസ്യം, ഇരുമ്പ് എന്നിവയും കറിവേപ്പിലയിൽ അടങ്ങിയിട്ടുണ്ട്.

കറിവേപ്പിലയുടെ ആരോഗ്യ ഗുണങ്ങൾ എന്തൊക്കെ ആണെന്ന് നോക്കാം.

ദഹനത്തിന് സഹായിക്കും

കറിവേപ്പില ആന്റിഓക്‌സിഡന്റ് ഗുണങ്ങൾക്ക് പേരുകേട്ടതാണ്. ശരീരത്തിലെ ഓക്‌സിഡേറ്റീവ് സമ്മർദ്ദം കുറയ്ക്കാൻ അവ സഹായിക്കുന്നു. ദഹനത്തെ സഹായിക്കാൻ കറിവേപ്പിലയ്ക്ക് കഴിയും. പതിവായി കറിവേപ്പില കഴിക്കുന്നത് മലബന്ധം, വയറിളക്കം തുടങ്ങിയ ദഹന പ്രശ്നങ്ങൾ ഇല്ലാതാക്കാൻ സഹായിക്കും.

പ്രമേഹ നിയന്ത്രണം

പ്രമേഹമുള്ളവർക്ക് കറിവേപ്പില ഗുണം ചെയ്യും. രക്തത്തിലെ പഞ്ചസാരയുടെ അളവ് നിയന്ത്രിക്കാൻ ഇവ സഹായിക്കുന്നു. ഭക്ഷണത്തിൽ കറിവേപ്പില സ്ഥിരമായി ഉൾപ്പെടുത്തുന്നത് പ്രമേഹരോഗികൾക്ക് ഗുണകരമായിരിക്കും.

മുടിയുടെ ആരോഗ്യ സംരക്ഷണം

മുടി വളരാനും കൊഴിച്ചൽ കുറയ്ക്കാനും കറിവേപ്പില പലപ്പോഴും ഉപയോഗിക്കാറുണ്ട്. കറിവേപ്പില ചേർത്ത എണ്ണകളും ഹെയർ മാസ്കുകളും മുടിയുടെ വേരുകളെ ശക്തിപ്പെടുത്തുകയും മുടി കൊഴിച്ചിൽ തടയുകയും ചെയ്യുന്നു. ഇതിലെ പോഷകങ്ങൾ ആരോഗ്യകരമായ മുടി വളർച്ചയ്ക്ക് സഹായിക്കുകയും അകാല നരയ തടയുകയും ചെയ്യുന്നു.

ശരീരഭാര നിയന്ത്രണം

ശരീരത്തിലെ കൊഴുപ്പ് കുറയ്ക്കുന്നതിലൂടെ ശരീരഭാരം നിയന്ത്രിക്കാൻ കറിവേപ്പില സഹായിച്ചേക്കാം. കൊളസ്ട്രോൾ അളവ് നിലനിർത്താൻ സഹായിക്കുന്ന ആൽക്കലോയിഡുകൾ ഇവയിൽ അടങ്ങിയിട്ടുണ്ട്. കറിവേപ്പില ഹൃദയാരോഗ്യത്തിനും നല്ലതാണ്.

പ്രതിരോധശേഷി വർദ്ധിപ്പിക്കുന്നു

കറിവേപ്പിലയിലെ വിറ്റാമിനുകളും ധാതുക്കളും രോഗപ്രതിരോധ ശേഷി വർദ്ധിപ്പിക്കുന്നു. അവ ശരീരത്തെ അണുബാധകളെ കൂടുതൽ ഫലപ്രദമായി ചെറുക്കാൻ സഹായിക്കുന്നു. പതിവായി കഴിക്കുന്നത് സാധാരണ രോഗങ്ങളെ അകറ്റി നിർത്തുകയും മൊത്തത്തിലുള്ള ആരോഗ്യം ഉറപ്പാക്കുകയും ചെയ്യും.