വീടിന്റെ ചുവരിൽ നിന്ന് പെയിന്റ് ഇളകി പോകുന്നുണ്ടോ? ആശങ്ക വേണ്ട, പ്രതിവിധിയുണ്ട്

By Desk

Updated: Friday, January 9, 2026, 23:41 [IST]

വീട്ടിലെല്ലാവർക്കും ആശങ്കയുളള കാര്യമാണ് ഭിത്തികളിൽ നിന്ന് പെയിന്റ് അടർന്നുപോകുന്നത്. ഭിത്തിയിലെ പെയിന്റ് പാച്ച് പാച്ചായി ഇളകുന്നത് കാഴ്ചയ്ക്ക് ഭംഗിയില്ലായ്മ ഉണ്ടാക്കും. എന്നാൽ ഇത് ഒറ്റരാത്രികൊണ്ട് സംഭവിക്കുന്നതല്ല. ചെറിയ കുമിളകളായോ നേരിയ വിള്ളലുകളായോ ഇത് തുടങ്ങി, നമ്മൾ അത് തിരിച്ചറിയുമ്പോഴേക്കും അത് വലിയ പ്രശ്നമായി മാറിയിട്ടുണ്ടാകും.

എന്നാൽ വിഷമിക്കേണ്ട! പെയിന്റ് ഇളകിയാൽ ആയിരക്കണക്കിന് രൂപ മുടക്കി ഉടൻതന്നെ മുഴുവനായി പെയിന്റ് ചെയ്യേണ്ടതില്ല. നിങ്ങൾക്ക് അടർന്നുപോകുന്ന പെയിന്റ് പ്രശ്നം എളുപ്പത്തിൽ കൈകാര്യം ചെയ്യാൻ കഴിയും. ഗുരുഗ്രാമിലെ ഇൻ്റീരിയർ വിദഗ്ദ്ധയായ പ്രിയങ്കാ സഹായ് പറയുന്നു: "പെയിന്റ് സ്വയം നശിക്കാറില്ല. അതിനടിയിലുള്ള പ്രതലമാണ് യഥാർത്ഥ കഥ പറയുന്നത്."

അമിതമായ ഈർപ്പവും നനവുമാണ് ഭിത്തിയിൽ പെയിന്റ് അടർന്ന് പോകാനുള്ള ഏറ്റവും സാധാരണമായ കാരണങ്ങൾ. ഇന്ത്യയിലെ വീടുകളിൽ പെയിന്റ് അടരുന്നതിൻ്റെ പ്രധാന വില്ലൻമാരിൽ ഒന്ന് ചോർച്ചയുള്ള പൈപ്പുകൾ, കുളിമുറിയിലെ ഉയർന്ന ഈർപ്പം, വെള്ളം ഇറങ്ങുന്നത്, അല്ലെങ്കിൽ ശരിയായി വാട്ടർപ്രൂഫ് ചെയ്യാത്ത പുറംചുമരുകൾ എന്നിവ മൂലമുണ്ടാകുന്ന ഈർപ്പവും നനവുമാണ്.

അതുപോലെ, പൊടിപിടിച്ച ചുമരുകളിലോ നിരപ്പല്ലാത്ത പ്രതലങ്ങളിലോ പെയിന്റ് ചെയ്യുമ്പോൾ അത് പെയിന്റിന്റെ പിടുത്തം ദുർബലമാക്കുകയും ക്രമേണ പെയിന്റ് അടർന്നുപോകാൻ തുടങ്ങുകയും ചെയ്യും. പ്രൈമർ ഉപയോഗിക്കാതിരിക്കുന്നതോ തെറ്റായ പ്രൈമർ ഉപയോഗിക്കുന്നതോ ആണ് മറ്റൊരു പ്രധാന കാരണം.

ഗുണമേന്മ കുറഞ്ഞ പെയിന്റുകളും ഒരു കാരണമാണ്. പുറംചുമരുകളിൽ ഇൻ്റീരിയർ പെയിന്റ് ഉപയോഗിക്കുന്നതോ ഈർപ്പത്തെ പ്രതിരോധിക്കാത്ത വിലകുറഞ്ഞ പെയിന്റുകളോ വേഗത്തിൽ അടർന്നുപോകും. കൂടുതൽ കാലം നിലനിൽക്കുന്ന നല്ല നിലവാരമുള്ള പെയിന്റ് എപ്പോഴും ഉപയോഗിക്കാൻ ശ്രദ്ധിക്കുക. കാലാവസ്ഥാ സാഹചര്യങ്ങളും പെയിന്റിനെ ബാധിക്കാം. അമിതമായ ഈർപ്പം, തണുപ്പ്, അല്ലെങ്കിൽ ചൂട് എന്നിവയുള്ള സമയങ്ങളിൽ പെയിന്റ് ചെയ്യുന്നത് ശരിയായ രീതിയിൽ ഉണങ്ങാതിരിക്കാൻ കാരണമാവുകയും പെയിന്റ് അടർന്ന് പോകാൻ ഇടയാക്കുകയും ചെയ്യും.

പെയിന്റ് അടർന്നുപോകുന്നത് മാറ്റാൻ ചില ലളിതമായ പരിഹാരങ്ങളുണ്ട്. അടർന്നുപോയ പെയിന്റ് പൂർണ്ണമായും നീക്കം ചെയ്യാൻ ഒരു സ്ക്രാപ്പർ ഉപയോഗിക്കുക. ഒരിക്കലും, അടർന്നുപോയ ഭാഗങ്ങളിൽ വീണ്ടും പെയിന്റ് ചെയ്യരുത്. അത് പ്രശ്നം കൂടുതൽ വഷളാക്കുകയേയുള്ളൂ.

തുടർന്ന്, ആ ഭാഗം മിനുസപ്പെടുത്താൻ സാൻഡ്പേപ്പർ ഉപയോഗിക്കുക. അടർന്നുപോയ അരികുകൾ ചുറ്റുമുള്ള ഭിത്തിയുമായി ചേർന്ന് കിടക്കാൻ ഇത് സഹായിക്കും. ഇത് വഴി റിപ്പയർ ചെയ്ത ഭാഗം പിന്നീട് വേറിട്ടുനിൽക്കുന്നതായി തോന്നുകയില്ല. അതിനുശേഷം, പൊടിയോ മറ്റോ ഉണ്ടെങ്കിൽ ഒരു നനഞ്ഞ തുണികൊണ്ട് തുടച്ച് വൃത്തിയാക്കുക. പിന്നീട് ഇത് പൂർണ്ണമായും ഉണങ്ങാൻ അനുവദിക്കുക.

ഈർപ്പം കാരണമാണ് പെയിന്റ് അടർന്നുപോയതെങ്കിൽ, ആദ്യം ചോർച്ചകൾ പരിഹരിക്കുക. വായുസഞ്ചാരം ഉറപ്പാക്കുക. ഭിത്തികൾ കുറഞ്ഞത് 24-48 മണിക്കൂർ നേരത്തേക്ക് ഉണങ്ങാൻ അനുവദിക്കുക. തുടർന്ന് വിള്ളലുകളും നിരപ്പല്ലാത്ത പ്രതലങ്ങളും ശരിയാക്കാൻ വാൾ-പുട്ടി ഉപയോഗിക്കുക. അത് ഉണങ്ങിയ ശേഷം, മിനുസമുള്ളതാക്കാൻ ചെറുതായി സാൻഡ്പേപ്പർ ഉപയോഗിച്ച് ഉരസുക.

എപ്പോഴും നല്ല നിലവാരമുള്ള പെയിന്റ് മാത്രം ഉപയോഗിക്കുക. ഭിത്തിയിൽ രണ്ട് നേർത്ത കോട്ടുകൾ പുരട്ടുന്നത് പ്രധാനമാണ്. ഒരു കട്ടിയുള്ള ലേയർ ഒഴിവാക്കുകയും ഓരോ കോട്ടിനും ഇടയിൽ ഉണങ്ങാൻ ആവശ്യമായ സമയം നൽകുകയും ചെയ്യുക.

ഉടൻ പെയിന്റ് ചെയ്യാൻ കഴിയുന്നില്ലെങ്കിൽ, ചില താൽക്കാലിക ഡിസൈൻ പരിഹാരങ്ങളുമുണ്ട്. അടർന്നുപോയ ഭാഗം ഒരു ആക്സന്റ് ഭിത്തിയായി മാറ്റിക്കൊണ്ട് ഒരു ഡിസൈൻ തയ്യാറാക്കം. അല്ലെങ്കിൽ വാൾപേപ്പർ ഉപയോഗിച്ച് ആ ഭാഗം മറയ്ക്കാം.

പെയിന്റ് അടർന്നുപോകുന്നത് തടയാൻ അടുക്കളകളും കുളിമുറികളും ശരിയായി വായുസഞ്ചാരമുള്ളതാണെന്ന് ഉറപ്പാക്കുക. മഴക്കാലം എത്തുന്നതിന് മുമ്പ് വീടിന്റെ ചോർച്ചകൾ പരിഹരിക്കുക. എല്ലാപ്പോഴും പ്രൈമർ ഉപയോഗിക്കുക. അമിതമായ ഈർപ്പമുള്ള കാലാവസ്ഥയിലോ മഴ സമയത്തോ പെയിന്റ് ചെയ്യുന്നത് ഒഴിവാക്കുക.

ഭിത്തിയിൽ പെയിന്റ് അടർന്നുപോകുന്നത് നിങ്ങളുടെ വീടിന് ശ്രദ്ധ വേണ്ടതിൻ്റെ ഒരു മുന്നറിയിപ്പാണ്. കൃത്യസമയത്തുള്ള ഇടപെടലിലൂടെ നിങ്ങളുടെ ഭിത്തികളെ പൂർവ്വസ്ഥിതിയിലാക്കാനും കേടുപാടുകൾ തടയാനും കഴിയും. ഒരുതവണ ശരിയാക്കുക, ശരിയായ രീതിയിൽ ശരിയാക്കുക.