കിച്ചണ്‍ സിങ്കില്‍ വെള്ളം കെട്ടിക്കിടുന്നതാണോ പ്രശ്‌നം; പരിഹരിക്കാന്‍ ഈ മാര്‍ഗങ്ങള്‍ പരീക്ഷിക്കൂ

കിച്ചണ്‍ സിങ്കിലെ മലിനജലം പോകുന്ന പൈപ്പുകള്‍ അടഞ്ഞുപോകുന്നത് പല വീട്ടമ്മമാരും ഇടയ്ക്കിടെ നേരിടുന്ന പ്രശ്‌നമാണ്. ഭക്ഷണ അവശിഷ്ടങ്ങളും എണ്ണമെഴുക്കും സോപ്പ് പതയുമൊക്കെ ചേര്‍ന്ന് കിച്ചണ്‍ സിങ്ക് തടസപ്പെടുമ്പോള്‍ ജോലി ഭാരം വര്‍ധിക്കുകയും അടുക്കളപ്പണി വല്ലാതെ മുഷിപ്പിക്കുകയും ചെയ്യും. എന്നാല്‍ ലളിതമായ ചില മാര്‍ഗങ്ങളിലൂടെ ഈ സങ്കീര്‍ണമായ പ്രശ്‌നത്തിന് പരിഹാരം കാണാന്‍ കഴിയും. സിങ്കിലെ ബ്ലോക്ക് മാറ്റാനുള്ള എളുപ്പവഴികള്‍ ഇതാ.

തിളച്ച വെള്ളം കൊണ്ടുള്ള പ്രയോഗം

അഴുക്കും സോപ്പും അലിയിക്കാന്‍ തിളച്ച വെള്ളം കിച്ചണ്‍ സിങ്കിലേക്ക് ഒഴിക്കുക. പൈപ്പുകളില്‍ പലപ്പോഴായി അടിഞ്ഞുകൂടുന്ന ഗ്രീസ്, എണ്ണ, സോപ്പ്, ഭക്ഷണ അവശിഷ്ടങ്ങള്‍ എന്നിവ അലിയിച്ച് നീക്കം ചെയ്യാന്‍ തിളച്ച വെള്ളം കൊണ്ട് സാധിക്കും. ഒരു പാത്രത്തില്‍ വെള്ളം തിളപ്പിച്ച ശേഷം രണ്ടോ മൂന്നോ തവണകളായി വെള്ളം പതുക്കെ സിങ്കിലേക്ക് ഒഴിക്കുക. ഒഴിക്കുന്നതിനിടയില്‍ അല്‍പ്പനേരം നിര്‍ത്തുക. ഇത് ചൂടുവെള്ളം അവശിഷ്ടങ്ങള്‍ക്ക് ഇടയിലൂടെ കടന്നുപോകാന്‍ അനുവദിക്കുന്നു. അവശിഷ്ടങ്ങളുടെ കട്ടി കുറഞ്ഞ് അവ പൈപ്പിലൂടെ തന്നെ ഒഴുകി പോകും. ചെറിയ തടസങ്ങള്‍ക്ക് തിളച്ച വെള്ളം ഒഴിക്കുന്നത് വളരെ ഫലപ്രദമാണ്.

അതേസമയം തിളച്ച വെള്ളം എന്നും പൈപ്പിലേക്ക് ഒഴിക്കുന്നത് നല്ലതല്ല. പൈപ്പുകള്‍ നിര്‍മിച്ചിരിക്കുന്നത് പ്ലാസിക്ക് കൊണ്ടായതിനാല്‍ അത് ഉരുകാന്‍ സാധ്യതയുണ്ട്. അതുകൊണ്ട് ഇടയ്ക്കിടെ മാത്രം തിളച്ച വെള്ളം ഒഴിക്കുക.

ബേക്കിങ് സോഡയും വിനാഗിരിയും

ബേക്കിങ് സോഡയും വിനാഗിരിയും അടുക്കളയിലെ പല പ്രശ്‌നങ്ങള്‍ക്കുമുള്ള പ്രതിവിധിയാണ്. കിച്ചണ്‍ സിങ്കിലെ ബ്ലോക്ക് നീക്കാനുള്ള ഏറ്റവും പ്രകൃതിദത്തമായ പരിഹാരമാണിത്. അര കപ്പ് ബേക്കിങ് സോഡ നേരിട്ട് സിങ്കിലേക്ക് വിതറുക. തുല്യ അളവില്‍ വിനാഗിരിയും ഒഴിക്കുക. രണ്ടും കൂടി ചേരുമ്പോള്‍ സിങ്കില്‍ നിന്ന് പത പൊങ്ങുന്നത് കാണാം. ഈ മിശ്രിതം കിച്ചണ്‍ സിങ്കിലെ തടസങ്ങള്‍ അലിയിച്ച് കളയുന്നു.

ബേക്കിങ് സോഡയും വിനാഗിരിയും ചേര്‍ന്ന മിശ്രിതം ഏകദേശം 15 മിനിറ്റ് കിച്ചണ്‍ സിങ്കില്‍ കിടക്കാന്‍ അനുവദിക്കുക, തുടര്‍ന്ന് ചൂടുവെള്ളം ഒഴിച്ച് അവശിഷ്ടങ്ങള്‍ നീക്കം ചെയ്യുക. എന്നിട്ടും അടഞ്ഞുപോയ അവസ്ഥ തുടരുകയാണെങ്കില്‍ ഈ പ്രക്രിയ വീണ്ടും ആവര്‍ത്തിക്കുക. ഈ രീതി പരിസ്ഥിതി സൗഹൃദവും വിലകുറഞ്ഞതും പൈപ്പുകള്‍ക്ക് ഹാനികരമല്ലാത്തതുമാണ്.

കാസ്റ്റിക് സോഡ (സോഡിയം ഹൈഡ്രോക്‌സൈഡ്)

ഇത് അവസാന മാര്‍ഗമെന്ന നിലയില്‍ വേണം ഉപയോഗിക്കാന്‍. കാസ്റ്റിക് സോഡ കിച്ചണ്‍ സിങ്കില്‍ അടിഞ്ഞുകൂടിയിട്ടുള്ള ഭക്ഷണ അവശിഷ്ടങ്ങളും മുടിയും ഗ്രീസുമൊക്കെ അലിയിപ്പിക്കാന്‍ കഴിവുള്ള ശക്തമായ രാസവസ്തുവാണ്. എന്നാല്‍ ഇതിന്റെ അപകട സാധ്യതകള്‍ അറിഞ്ഞുകൊണ്ട് വേണം ഉപയോഗിക്കാന്‍.

കാസ്റ്റിക് സോഡ കൈകാര്യം ചെയ്യുമ്പോള്‍ എല്ലായ്‌പ്പോഴും കൈയില്‍ ഗ്ലൗസും കണ്ണടകളും ധരിക്കുക. നേര്‍പ്പിച്ച മിശ്രിതം ശ്രദ്ധാപൂര്‍വ്വം കിച്ചണ്‍ സിങ്കിലേക്ക് ഒഴിക്കുക. അല്‍പനേരം കഴിഞ്ഞ് ചൂടുവെള്ളവും ഒഴിക്കുക. ഈ രീതി ഇടയ്ക്കിടെ ഉപയോഗിക്കുന്നത് ഒഴിവാക്കുക. കാരണം ആവര്‍ത്തിച്ച് പ്രയോഗിക്കുന്നത് പൈപ്പുകള്‍ക്ക് കേടുപാടുകള്‍ വരുത്തും.

അടഞ്ഞുപോയ അടുക്കള സിങ്കുകള്‍ എപ്പോഴുമുണ്ടാകുന്ന പ്രശ്‌നമാണ്. എന്നാല്‍ എല്ലായ്‌പ്പോഴും പ്ലമ്പറുടെ പിന്നാലെ പോകാതെ ഇത്തരം പ്രശ്‌നങ്ങള്‍ക്കുള്ള പരിഹാരം അറിഞ്ഞിരിക്കുന്നത് ഉപകാരപ്രദമാണ്. തിളച്ച വെള്ളം, ബേക്കിങ് സോഡ, വിനാഗിരി എന്നിവ പോലുള്ള ലളിതമായ പരിഹാരങ്ങള്‍ അടുക്കള ജോലികള്‍ എളുപ്പമാക്കും. സങ്കീര്‍ണമായ തടസങ്ങള്‍ക്ക് കാസ്റ്റിക് സോഡ പോലുള്ള ശക്തമായ രാസ ലായനികള്‍ സ്‌റ്റോറില്‍ കരുതിവയ്ക്കുക. അവ സൂക്ഷ്മതയോടെ ഉപയോഗിക്കുക. ഈ രീതികള്‍ പിന്തുടര്‍ന്നാല്‍ വൃത്തിയുള്ള അടുക്കള സിങ്ക് നിലനിര്‍ത്താന്‍ കഴിയും.