45-ലും കെടാത്ത യൗവനം! കരീന കപൂറിന്റെ ഫിറ്റ്‌നസ് രഹസ്യങ്ങളും ഭക്ഷണരീതികളും ഇതാ

ബോളിവുഡിന്റെ സ്വന്തം 'ബേബോ' കരീന കപൂറിന് പ്രായം 45 കഴിഞ്ഞിട്ടും ഇന്നും അതേ തിളക്കവും ഗ്ലാമറും നിലനിർത്താൻ സാധിക്കുന്നുണ്ട്. രണ്ട് കുട്ടികളുടെ അമ്മയായ ശേഷവും കരീന തന്റെ ഫിറ്റ്‌നസും സ്റ്റൈലും കാത്തുസൂക്ഷിക്കുന്നത് പലരെയും അത്ഭുതപ്പെടുത്തുന്ന കാര്യമാണ്. 2016-ൽ തന്റെ ആദ്യ മകൻ തൈമൂറിനും, പിന്നീട് 2021-ൽ രണ്ടാമത്തെ മകൻ ജേഹിനും ജന്മം നൽകിയ ശേഷമുള്ള കരീനയുടെ തിരിച്ചുവരവ് ശ്രദ്ധേയമായിരുന്നു. പ്രസവകാലത്ത് പരമ്പരാഗതമായ ഇന്ത്യൻ ഭക്ഷണശൈലിയാണ് താരം പിന്തുടർന്നത്. പ്രസവത്തിന് ശേഷം മിക്ക സ്ത്രീകളെയും അലട്ടുന്ന കണ്ണിന് താഴെയുള്ള കറുത്ത പാടുകൾ മാറ്റാൻ വിറ്റാമിൻ ബി12, അയൺ എന്നിവ അടങ്ങിയ തൈര്, മോര്, അച്ചാർ തുടങ്ങിയവ ഭക്ഷണത്തിൽ ഉൾപ്പെടുത്താനാണ് കരീന നിർദ്ദേശിക്കുന്നത്.

തന്റെ കരിയറിന്റെ തുടക്കം മുതൽക്കേ കരീന മികച്ചൊരു ഫിറ്റ്‌നസ് ദിനചര്യ കാത്തുസൂക്ഷിക്കുന്നുണ്ട്. കഠിനമായ വർക്കൗട്ടുകൾ ചെയ്യുന്നതിനൊപ്പം അവ ആസ്വദിച്ചു ചെയ്യാനും താരം ശ്രദ്ധിക്കാറുണ്ട്. ലെഗ് റൊട്ടേഷൻസ്, ലെഗ് റൈസസ്, കെറ്റിൽബെൽ സ്വിങ്സ്, ക്രഞ്ചസ് എന്നിവയ്ക്ക് പുറമെ ശരീരത്തിന് വഴക്കവും കരുത്തും നൽകാൻ യോഗയും കരീനയുടെ വർക്കൗട്ടിന്റെ ഭാഗമാണ്. വ്യായാമം ഒരിക്കലും വിരസമാകരുത് എന്ന് വിശ്വസിക്കുന്ന താരം, നല്ല വർക്കൗട്ട് വസ്ത്രങ്ങൾ ധരിക്കുന്നത് നിങ്ങളെ എപ്പോഴും ഉന്മേഷത്തോടെയിരിക്കാൻ സഹായിക്കുമെന്ന് പറയുന്നു. ജിമ്മിൽ മാത്രമല്ല, സുഹൃത്തുക്കളോടൊപ്പം ലഞ്ചിന് പോകുമ്പോൾ പോലും ധരിക്കാൻ കംഫർട്ടബിൾ ആയ വസ്ത്രങ്ങളാണ് തന്റെ പ്രിയപ്പെട്ടവയെന്നും കരീന വ്യക്തമാക്കുന്നു.

ഭക്ഷണ കാര്യത്തിലേക്ക് വന്നാൽ, പാശ്ചാത്യ വിപണിയിലെ വിലകൂടിയ ഫാഷൻ ഡയറ്റുകൾക്ക് പിന്നാലെ പോകാതെ ലളിതമായ വീട്ടിലുണ്ടാക്കുന്ന ഭക്ഷണങ്ങൾക്കാണ് കരീന മുൻഗണന നൽകുന്നത്. പ്രശസ്ത സെലിബ്രിറ്റി ന്യൂട്രീഷ്യനിസ്റ്റായ രുജുത ദിവേകറുമായി ചേർന്ന് 2007 മുതൽ കരീന പിന്തുടരുന്ന ഡയറ്റ് വളരെ ലളിതമാണ്. രാവിലെ കുതിർത്ത വാൽനട്ട്, അത്തിപ്പഴം, ബദാം എന്നിവ കഴിച്ചാണ് താരം ദിവസം ആരംഭിക്കുന്നത്. പ്രഭാതഭക്ഷണമായി പോഹ പോലുള്ള ലഘുഭക്ഷണങ്ങൾ കഴിക്കുമ്പോൾ ഉച്ചയ്ക്ക് വീട്ടിലുണ്ടാക്കിയ ചോറും പരിപ്പുകറിയുമാണ് പ്രിയം. രാത്രിയിൽ ചപ്പാത്തിയും കറിയും കഴിക്കാൻ താല്പര്യപ്പെടുന്ന കരീന, എപ്പോഴെങ്കിലും ഒരിക്കൽ മാത്രമാണ് ബിരിയാണി പോലുള്ള ചീറ്റ് മീലുകൾ കഴിക്കുന്നത്. കൂടാതെ ചർമ്മത്തിന്റെ തിളക്കം നിലനിർത്താൻ ദിവസം മുഴുവൻ ധാരാളം വെള്ളം കുടിച്ച് ശരീരം ഹൈഡ്രേറ്റഡ് ആയി സൂക്ഷിക്കാനും താരം പ്രത്യേകം ശ്രദ്ധിക്കാറുണ്ട്.

ഫാൻസി ബ്യൂട്ടി പ്രൊഡക്ടുകളേക്കാൾ തന്റെ ചർമ്മത്തിന്റെ തിളക്കത്തിനായി കരീന ആശ്രയിക്കുന്നത് അടുക്കളയിലെ ചില നാടൻ കൂട്ടുകളെയാണ്. കരീനയുടെ ഏറ്റവും പ്രിയപ്പെട്ട ബ്യൂട്ടി സീക്രട്ട് ബദാം ഓയിൽ (Almond Oil) ആണ്. ഒഴിവുദിവസങ്ങളിൽ ബദാം ഓയിൽ ചർമ്മത്തിൽ തേച്ചുപിടിപ്പിക്കുന്നത് ചർമ്മത്തിലെ വരൾച്ച മാറാൻ സഹായിക്കുമെന്നാണ് താരം പറയുന്നത്. വരണ്ട ചർമ്മമുള്ളവർക്ക് ബദാം ഓയിലും തൈരും ചേർത്തുള്ള മിശ്രിതം മുഖത്തിടുന്നത് മികച്ച ഫലം നൽകും. ചർമ്മത്തിന് ആവശ്യമായ വിറ്റാമിൻ ഇ, മഗ്നീഷ്യം, ഫോസ്ഫറസ് എന്നിവ അടങ്ങിയ ബദാം ഓയിൽ ആന്റിഓക്‌സിഡന്റുകളാൽ സമ്പന്നമായതിനാൽ ചർമ്മത്തിന്റെ ഗുണനിലവാരം മെച്ചപ്പെടുത്താൻ ഏറെ സഹായിക്കും.