പച്ചമുളക് ദിവസങ്ങളോളം കേടാകാതെ സൂക്ഷിക്കാം; അടുക്കളയില്‍ തന്നെയുണ്ട് പോംവഴികള്‍

നമ്മുടെയെല്ലാം അടുക്കളയിലേയും അടുക്കളത്തോട്ടത്തിലേയും ഒഴിച്ചുകൂടാനാകാത്ത ഒന്നാണ് പച്ചമുളക്. പൊതുവെ മിക്ക വിഭവങ്ങളിലേയും അവശ്യ ചേരുവയുമാണ് പച്ചമുളക്. എന്നാല്‍ വളരെ കുറഞ്ഞ ഷെല്‍ഫ് ലൈഫാണ് പച്ചമുളകിന് ഉള്ളത്. അതിനാല്‍ തന്നെ ഇവ പെട്ടെന്ന് ചീത്തയാകാനുള്ള സാധ്യതയും കൂടുതലാണ്. വിപണിയില്‍ നിന്ന് പച്ചമുളക് വാങ്ങുമ്പോള്‍ മിക്കവരും കുറച്ച് കൂടുതല്‍ വാങ്ങിക്കാറുണ്ട്.

എന്നാല്‍ പലപ്പോഴും അവയെല്ലാം ഉപയോഗിക്കാനുള്ള അവസരമോ സമയമോ ഉണ്ടാകണം എന്നില്ല. നന്നായി സൂക്ഷിച്ചില്ലെങ്കില്‍ പച്ചമുളക് രണ്ട് ദിവസത്തിനുള്ളില്‍ ഉണങ്ങുകയോ ചീഞ്ഞഴുകുകയോ ചെയ്യും. മുളക് ഉണങ്ങാതിരിക്കാന്‍ നമ്മള്‍ പലപ്പോഴും ഫ്രിഡ്ജില്‍ വെക്കാറുണ്ട്. പക്ഷേ അവ ഒരു മൂലയില്‍ ചീഞ്ഞഴുകിപ്പോകുകയാണ് ചെയ്യാറുള്ളത്. അതിനാല്‍ തന്നെ പച്ചമുളക് സംരക്ഷിക്കുന്നത് ബുദ്ധിമുട്ടാണ് എന്ന് പലരും അഭിപ്രായപ്പെടാറുണ്ട്.

ഇനി അത്തരം ആശങ്കകള്‍ നിങ്ങളെ അലട്ടേണ്ടതില്ല. പച്ചമുളകുകളുടെ ഷെല്‍ഫ് ലൈഫ് വര്‍ധിപ്പിക്കാന്‍ സഹായിക്കുന്ന പൊടിക്കൈകളെ കുറിച്ചാണ് ഇനി പറയാന്‍ പോകുന്നത്. ഒരു സിപ്പ് ലോക്ക് ബാഗില്‍ പച്ചമുളക് സൂക്ഷിക്കുക എന്നതാണ് ആദ്യത്തെ രീതി. ഇത് നിങ്ങളുടെ മുളകിന്റെ ഷെല്‍ഫ് ലൈഫ് വര്‍ധിപ്പിക്കുകയും ഒരു മാസത്തിനു ശേഷവും അവ പുതുമയോടെ നില്‍നില്‍ക്കാന്‍ അനുവദിക്കുകയും ചെയ്യുന്നു.

ഇതില്‍ ഈര്‍പ്പമില്ല എന്ന് ഉറപ്പാക്കാന്‍ ആദ്യം ഇന നന്നായി കഴുകി ഉണക്കണം. തണ്ടുകള്‍ നീക്കം ചെയ്ത് സിപ്പ് ലോക്ക് ബാഗുകളില്‍ മുളക് ഇടുക. ബാഗുകള്‍ അടയ്ക്കുന്നതിന് മുമ്പ് ഉള്ളില്‍ വായു ഇല്ലെന്ന് ഉറപ്പാക്കുക. നിങ്ങളുടെ റഫ്രിജറേറ്ററിന്റെ ഏറ്റവും തണുത്ത ഭാഗത്ത് സിപ്പ് ലോക്കുകള്‍ ശ്രദ്ധാപൂര്‍വ്വം അടച്ച ശേഷം വയ്ക്കുക. ഇതില്‍ നിന്ന് ആവശ്യാനുസരണം മുളകെടുത്ത് ബാക്കിയുള്ളത് അതേ രീതിയില്‍ പരിപാലിക്കുക.

പച്ചമുളക് സംരക്ഷിക്കുന്നതിനുള്ള മറ്റൊരു ഫലപ്രദമായ രീതി ക്‌ളിംഗ് ഫിലിമില്‍ പൊതിയുക എന്നതാണ്. ഇതിനായി മുളക് കഴുകി തണ്ടുകള്‍ നീക്കം ചെയ്യുക. അവയെ വായുവില്‍ ഉണങ്ങാന്‍ അനുവദിക്കുക. ശേഷം ഒരു പേപ്പര്‍ ടവല്‍ ഉപയോഗിച്ച് അധിക ഈര്‍പ്പം ഒപ്പിയെടുക്കുക. ഒരു ചെറിയ പാത്രത്തില്‍ അടുക്കി വെച്ച് ക്‌ളിംഗ് ഫിലിമില്‍ പൊതിയുക. വായു പ്രവേശിക്കാന്‍ അനുവദിക്കുന്ന വിടവുകള്‍ ഇല്ലെന്ന് ഉറപ്പാക്കുക.

പ്ലേറ്റ് ശരിയായി മൂടിയ ശേഷം ഫ്രീസറില്‍ വയ്ക്കുക. പച്ചമുളക് ആഴ്ചകളോളം നിലനില്‍ക്കും. പച്ചമുളകിന്റെ ഷെല്‍ഫ് ലൈഫ് വര്‍ധിപ്പിക്കുന്നതിനുള്ള മറ്റൊരു ലളിതമായ മാര്‍ഗ്ഗം അലൂമിനിയം ഫോയില്‍ കൊണ്ട് പൊതിഞ്ഞ് ഫ്രീസ് ചെയ്യുക എന്നതാണ്. പച്ചമുളക് ഒരു താലത്തില്‍ നിരത്തി അലുമിനിയം ഫോയില്‍ കൊണ്ട് മൂടുക. ശേഷം ഒരു 6-7 മണിക്കൂര്‍ ഫ്രീസറില്‍ വെക്കുക. അതിനു ശേഷം പുറത്തെടുത്ത് ശീതീകരിച്ച പച്ചമുളക് വായു കടക്കാത്ത പാത്രത്തില്‍ സൂക്ഷിക്കുക.

ഇത് ഫ്രിഡ്ജില്‍ സൂക്ഷിച്ചാല്‍ രണ്ട് മാസം വരെ ഫ്രഷായി ഇരിക്കും. പച്ചമുളക് നിറം മാറാന്‍ തുടങ്ങുമ്പോള്‍, അത് പുറന്തള്ളാന്‍ സമയമായി എന്നതിന്റെ ആദ്യ സൂചനയാണ്. മുളക് പിന്നീട് കാഠിന്യം നഷ്ടപ്പെടുകയും മൃദുവാകാന്‍ തുടങ്ങുകയും ചെയ്യും. മുളകിന് ചീഞ്ഞ ഗന്ധം പുറപ്പെടുവിക്കും. അത്തരം സന്ദര്‍ഭങ്ങളില്‍ ചീത്ത മുളകുകള്‍ കഴിയുന്നത്ര വേഗത്തില്‍ നീക്കം ചെയ്യുന്നതാണ് ഉചിതം.

English summary

Kitchen Tips: Try These Easy Ways To Store Green Chillies For Longer Days