പണം വാരിയെറിയേണ്ട; കുറഞ്ഞ ചിലവിൽ കൊറിയൻ സ്കിൻകെയർ വീട്ടിൽ ചെയ്യാം, വഴികൾ ഇതാ

ഇന്ന് ലോകമെമ്പാടുമുള്ള സൗന്ദര്യസംരക്ഷണ മാർഗ്ഗങ്ങളിൽ ഏറ്റവും കൂടുതൽ തരംഗം സൃഷ്ടിച്ച ഒന്നാണ് കൊറിയൻ സ്കിൻകെയർ അഥവാ 'കെ-ബ്യൂട്ടി കെയർ'. ചർമ്മത്തിന് ആവശ്യത്തിന് ഈർപ്പം നൽകാനും, ചർമ്മത്തിന്റെ ആരോഗ്യം ദീർഘകാലത്തേക്ക് നിലനിർത്താനും സഹായിക്കുന്നതു കൊണ്ടാണ് കൊറിയൻ രീതികൾക്ക് ഇത്രയും ആരാധകരുള്ളത്. പണ്ട് കൊറിയൻ ഉൽപ്പന്നങ്ങൾ കിട്ടാൻ വലിയ വില കൊടുക്കണമായിരുന്നെങ്കിൽ, ഇന്ന് ഇന്ത്യയിലും വളരെ കുറഞ്ഞ ചിലവിൽ ഇവ വാങ്ങാൻ കിട്ടും. ക്ലെൻസർ, ടോണർ, മോയ്സ്ചറൈസർ, സൺസ്ക്രീൻ എന്നിവയെല്ലാം ഇന്ന് നമ്മുടെ ബഡ്ജറ്റിൽ ഒതുങ്ങുന്ന വിലയിൽ ലഭ്യമാണ്.

എന്തുകൊണ്ടാണ് കൊറിയൻ സ്കിൻകെയർ ഇപ്പോഴും ഇത്ര ട്രെൻഡ്?

ചർമ്മത്തിന് യാതൊരു കേടുപാടും വരുത്താത്ത പ്രകൃതിദത്തമായ ചേരുവകളാണ് കൊറിയൻ ഉൽപ്പന്നങ്ങളിൽ ഉപയോഗിക്കുന്നത്. ഹൈലൂറോണിക് ആസിഡ്, സെന്റെല്ല ഏഷ്യാറ്റിക്ക, സ്നൈൽ മ്യൂസിൻ (ശംഖിന്റെ ദ്രവം), അരിയുടെ സത്ത്, ഗ്രീൻ ടീ എന്നിവയെല്ലാം ഇതിൽ അടങ്ങിയിരിക്കുന്നു. ഇവ ചർമ്മത്തെ വരണ്ടുപോകാൻ അനുവദിക്കില്ല. അതുകൊണ്ട് തന്നെ സെൻസിറ്റീവ് ചർമ്മമുള്ളവർക്ക് പോലും ഇത് ധൈര്യമായി ഉപയോഗിക്കാം. കൂടാതെ, ഇന്ത്യയിലെ വിയർപ്പുള്ള കാലാവസ്ഥയ്ക്ക് പറ്റിയ രീതിയിൽ ഒട്ടും കൊഴുപ്പില്ലാത്ത ലൈറ്റ് വെയിറ്റ് ഫോർമുലയിലാണ് ഇവ തയ്യാറാക്കുന്നത്.

ഇതിനെക്കുറിച്ച് പ്രമുഖ ഡെർമറ്റോളജിസ്റ്റ് ഡോ. ഷിതിജ് ഗോയൽ പറയുന്നത്, കൊറിയൻ ഉൽപ്പന്നങ്ങൾ ചർമ്മത്തിന് പെട്ടെന്നുള്ള മാറ്റങ്ങളല്ല, മറിച്ച് ദീർഘകാലത്തേക്കുള്ള സംരക്ഷണമാണ് നൽകുന്നത് എന്നാണ്. സോഷ്യൽ മീഡിയ ട്രെൻഡുകൾ കണ്ട് മാത്രം സാധനങ്ങൾ വാങ്ങരുതെന്നും സ്വന്തം ചർമ്മത്തിന് അനുയോജ്യമായവ തിരഞ്ഞെടുക്കണമെന്നും അദ്ദേഹം ഓർമ്മിപ്പിക്കുന്നു. എന്തെങ്കിലും അലർജിയോ ചൊറിച്ചിലോ ഉണ്ടായാൽ ഉൽപ്പന്നം ഉപയോഗിക്കുന്നത് നിർത്തി ഡോക്ടറെ കാണണം.

കൊറിയൻ ഉൽപ്പന്നങ്ങൾ ഉപയോഗിക്കുമ്പോൾ ശ്രദ്ധിക്കേണ്ട പ്രധാന കാര്യങ്ങൾ അറിഞ്ഞിരിക്കണം. നിങ്ങളുടെ ചർമ്മം ഏത് തരത്തിലുള്ളതാണെന്ന് ആദ്യം മനസ്സിലാക്കുക. എല്ലാ ഉൽപ്പന്നങ്ങളും ഒരുമിച്ച് ഉപയോഗിച്ച് തുടങ്ങരുത് ഓരോന്നായി മാത്രം ശീലമാക്കുക. മുഖത്ത് ഉപയോഗിക്കുന്നതിന് മുൻപ് എപ്പോഴും കൈകളിൽ പുരട്ടി പാച്ച് ടെസ്റ്റ് ചെയ്യുക. ആന്റി-ഏജിംഗ് ഉൽപ്പന്നങ്ങൾ ഉപയോഗിച്ചാലും ഇല്ലെങ്കിലും ദിവസവും സൺസ്ക്രീൻ കൃത്യമായി പുരട്ടുക.

കൊറിയൻ സ്കിൻകെയർ കൊണ്ടുള്ള പ്രധാന ഗുണങ്ങൾ

ആഴത്തിലുള്ള ഈർപ്പം: ഗ്ലിസറിൻ, ഹൈലൂറോണിക് ആസിഡ് എന്നിവ ചർമ്മത്തിലെ ഈർപ്പം നിലനിർത്തി മുഖം എപ്പോഴും ഫ്രഷായും തിളക്കമുള്ളതായും വെക്കാൻ സഹായിക്കുന്നു.

ചർമ്മത്തിന്റെ പ്രതിരോധശേഷി കൂട്ടുന്നു: സെറാമൈഡുകൾ, പാന്തെനോൾ എന്നിവ ചർമ്മത്തിന്റെ പുറംപാളിയെ ശക്തിപ്പെടുത്തി വരൾച്ചയും അലർജിയും തടയുന്നു.

മുഖത്തിന് നല്ല നിറവും തിളക്കവും: വിറ്റാമിൻ സി, റൈസ് എക്സ്ട്രാക്റ്റ്, നിയാസിനാമൈഡ് എന്നിവ കറുത്ത പാടുകൾ മാറ്റി മുഖത്തിന് ഒരേ നിറം നൽകാൻ സഹായിക്കുന്നു.

കുരുക്കൾ വരുന്നത് തടയുന്നു: ടീ ട്രീ സത്ത്, സാലിസിലിക് ആസിഡ് എന്നിവ അമിതമായി എണ്ണമയം വരുന്നത് തടഞ്ഞ് മുഖക്കുരു വരാതെ നോക്കുന്നു.

പ്രായം തോന്നിക്കാതിരിക്കാൻ: ജിൻസെങ്, പെപ്റ്റൈഡുകൾ എന്നിവ മുഖത്തെ ചുളിവുകൾ മാറ്റി ചർമ്മത്തിന് നല്ല ഇലാസ്തികത നൽകുന്നു.

ഒരുപാട് കട്ടിയുള്ള ക്രീമുകൾ വാരിപ്പൂശുന്നതിന് പകരം, ഭാരം കുറഞ്ഞ ലിക്വിഡ് ഉൽപ്പന്നങ്ങൾ ഒന്നിന് മുകളിൽ ഒന്നായി ലെയർ ചെയ്ത് പുരട്ടുന്നതാണ് കൊറിയൻ ശൈലി. തണുപ്പുകാലത്ത് കൂടുതൽ ഹൈഡ്രേഷനും ചൂടുകാലത്ത് കുറഞ്ഞ ലെയറുകളും ഉപയോഗിച്ച് നമുക്ക് ഈ രീതി എളുപ്പത്തിൽ മാറ്റിയെടുക്കാം.