മിന്നും ചർമ്മത്തിന് റൈസ് വാട്ടർ മിസ്റ്റ് എന്ന മാജിക്! ജെൻ സി ഏറ്റെടുത്ത ബ്യൂട്ടി സീക്രട്ട്

ഇന്നത്തെ കാലത്ത് ചർമ്മസംരക്ഷണത്തിന് വലിയ പ്രാധാന്യമാണ് യുവതി-യുവാക്കൾ നൽകുന്നത്. വിലകൂടിയ കെമിക്കൽ ഉൽപ്പന്നങ്ങളേക്കാൾ പ്രകൃതിദത്തമായ ചേരുവകളോടാണ് പുതിയ തലമുറയ്ക്ക് (Gen Z) പ്രിയം. ഈ താൽപ്പര്യത്തിൽ നിന്ന് ഉടലെടുത്ത ഏറ്റവും പുതിയ സ്കിൻ കെയർ ട്രെൻഡാണ് 'റൈസ് വാട്ടർ മിസ്റ്റ്' (Rice Water Mist). ഇൻസ്റ്റഗ്രാം, ടിക്ടോക് തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളിൽ വൻ പ്രചാരം നേടിക്കൊണ്ടിരിക്കുന്ന ഈ വിദ്യ യഥാർത്ഥത്തിൽ നൂറ്റാണ്ടുകളായി കൊറിയൻ, ജാപ്പനീസ് സ്ത്രീകൾ പിന്തുടരുന്ന ഒന്നാണ്.

എന്താണ് റൈസ് വാട്ടർ മിസ്റ്റ്?

അരി കഴുകിയ വെള്ളം അല്ലെങ്കിൽ കഞ്ഞിവെള്ളം ശുദ്ധീകരിച്ച് ചർമ്മത്തിലേക്ക് നേരിട്ട് സ്പ്രേ ചെയ്യുന്ന രീതിയാണിത്. ചർമ്മത്തിന് പെട്ടെന്ന് ഒരു ഉന്മേഷവും തിളക്കവും നൽകാൻ ഇത് സഹായിക്കുന്നു. പത്തു പൈസ ചെലവില്ലാതെ വീട്ടിൽ തന്നെ തയ്യാറാക്കാം എന്നതും ഇതിന്റെ പ്രത്യേകതയാണ്.

റൈസ് വാട്ടർ മിസ്റ്റിന്റെ പ്രധാന ഗുണങ്ങൾ

ചർമ്മത്തിന് തിളക്കം നൽകുന്നു: അരിവെള്ളത്തിൽ അടങ്ങിയിരിക്കുന്ന വിറ്റാമിനുകളും ധാതുക്കളും ചർമ്മത്തിലെ കറുത്ത പാടുകൾ കുറയ്ക്കാനും സ്വാഭാവിക നിറം വർദ്ധിപ്പിക്കാനും സഹായിക്കുന്നു.

പ്രായം കുറയ്ക്കാം: ഇതിലെ ആന്റിഓക്സിഡന്റുകൾ ചർമ്മത്തിലെ കൊളാജൻ ഉത്പാദനം വർദ്ധിപ്പിക്കുന്നു. ഇത് മുഖത്തെ ചുളിവുകൾ തടയാനും ചർമ്മം തൂങ്ങുന്നത് ഒഴിവാക്കാനും സഹായിക്കും.

സൺ ടാൻ മാറ്റുന്നു: വെയിൽ കൊണ്ട് ചർമ്മത്തിനുണ്ടാകുന്ന കരുവാളിപ്പ് (Tan) മാറ്റാനും ചർമ്മത്തെ തണുപ്പിക്കാനും റൈസ് വാട്ടർ മിസ്റ്റ് മികച്ചതാണ്.

സുഷിരങ്ങൾ അടയ്ക്കുന്നു: ചർമ്മത്തിലെ വലിയ സുഷിരങ്ങൾ (Pores) ചുരുക്കാനും ചർമ്മത്തെ ടൈറ്റ് ആക്കാനും ഇത് സഹായിക്കുന്നു.

വീട്ടിൽ എങ്ങനെ തയ്യാറാക്കാം?

റൈസ് വാട്ടർ മിസ്റ്റ് പ്രധാനമായും രണ്ട് രീതിയിൽ തയ്യാറാക്കാം

കുതിർത്ത അരിവെള്ളം: അര കപ്പ് അരി നന്നായി കഴുകി വൃത്തിയാക്കുക. അതിലേക്ക് രണ്ട് കപ്പ് ശുദ്ധജലം ഒഴിച്ച് 30 മിനിറ്റ് കുതിർക്കാൻ വെക്കുക. ശേഷം ഈ വെള്ളം അരിച്ചെടുത്ത് ഒരു സ്പ്രേ ബോട്ടിലിലേക്ക് മാറ്റാം.

പുളിപ്പിച്ച അരിവെള്ളം: കുതിർത്ത അരിവെള്ളം ഒന്നോ രണ്ടോ ദിവസം മുറിയിലെ താപനിലയിൽ വെച്ച് പുളിപ്പിക്കുക. ഇതിൽ പോഷകങ്ങൾ കൂടുതലായിരിക്കും. എന്നാൽ നേരിയ മണം ഉണ്ടാകാൻ സാധ്യതയുള്ളതിനാൽ ഉപയോഗിക്കുന്നതിന് മുൻപ് അല്പം സാധാരണ വെള്ളം കൂടി ചേർക്കാവുന്നതാണ്.

എങ്ങനെ ഉപയോഗിക്കണം?

മുഖം നന്നായി കഴുകി വൃത്തിയാക്കിയ ശേഷം ഒരു ടോണറിന് പകരമായി ഇത് സ്പ്രേ ചെയ്യാം. ഫ്രിഡ്ജിൽ വെച്ച് തണുപ്പിച്ച ശേഷം ഉപയോഗിക്കുന്നത് ചർമ്മത്തിന് കൂടുതൽ ഉന്മേഷം നൽകും. മേക്കപ്പ് ചെയ്യുന്നതിന് മുൻപോ ശേഷമോ ഒരു സെറ്റിങ് സ്പ്രേയായും ഇത് ഉപയോഗിക്കാവുന്നതാണ്.

ശ്രദ്ധിക്കേണ്ട കാര്യങ്ങൾ
എല്ലാ ചർമ്മപ്രകൃതിക്കും റൈസ് വാട്ടർ അനുയോജ്യമാകണമെന്നില്ല. ഡ്രൈ സ്കിൻ ഉള്ളവർ ഇത് ഉപയോഗിച്ച ശേഷം മോയിസ്ചറൈസർ പുരട്ടാൻ ശ്രദ്ധിക്കണം. ഉപയോഗിക്കുന്നതിന് മുൻപ് ഒരു പാച്ച് ടെസ്റ്റ് നടത്തുന്നത് അലർജി സാധ്യത ഒഴിവാക്കാൻ സഹായിക്കും. കൂടാതെ, ഇത് 4-5 ദിവസത്തിൽ കൂടുതൽ സൂക്ഷിച്ചു വെക്കാതെ പുതിയത് തയ്യാറാക്കുന്നതാണ് ഉചിതം.