മുഖക്കുരു മാറ്റാം, ചുണ്ട് മൃദുലമാക്കാം, ചർമ്മത്തിന് തിളക്കമേകാം, ഈ ഡ്രാഗൺ ഫ്രൂട്ട് അത്ര ചില്ലറക്കാരനല്ല

ഡ്രാഗൺ ഫ്രൂട്ട് വെറുമൊരു മനോഹരമായ ഉഷ്ണമേഖലാ പഴം മാത്രമല്ല. വിറ്റാമിനുകളും ആന്റിഓക്‌സിഡന്റുകളും ജലാംശവുംകൊണ്ട് സമ്പന്നമായ ഈ പഴം ചർമ്മത്തിന് നിരവധി ഗുണങ്ങൾ നൽകുന്നു. മുഖക്കുരു ഇല്ലാതാക്കാനും വാർദ്ധക്യത്തിന്റെ ലക്ഷണങ്ങൾ കുറയ്ക്കാനും ചർമ്മത്തിലെ അസ്വസ്ഥതകൾ ഒഴിവാക്കാനും നിറം വർദ്ധിപ്പിക്കാനും ഡ്രാഗൺ ഫ്രൂട്ട് സഹായിക്കും. ചർമ്മത്തിൽ നേരിട്ട് ഉപയോഗിക്കുകയോ കഴിക്കുകയോ ചെയ്യുമ്പോൾ, ഇതിലെ പ്രകൃതിദത്ത ഘടകങ്ങൾ ചർമ്മത്തെ പോഷിപ്പിക്കുകയും സംരക്ഷിക്കുകയും ചെയ്യുന്നു.

എന്തുകൊണ്ടാണ് ഡ്രാഗൺ ഫ്രൂട്ട് നിങ്ങളുടെ ചർമ്മ സംരക്ഷണ ദിനചര്യയിൽ ഉൾപ്പെടുത്തേണ്ടതെന്ന് നോക്കാം. ഡ്രാഗൺ ഫ്രൂട്ടിൽ വിറ്റാമിൻ സി, വിറ്റാമിൻ ബി3, വിറ്റാമിൻ ഇ, പോളിഫെനോളുകൾ, ബെറ്റാലെയ്ൻസ് എന്നിവ ധാരാളമായി അടങ്ങിയിട്ടുണ്ട്. ഇവയ്ക്ക് ആന്റിഓക്‌സിഡന്റ്, ആൻ്റി-ഇൻഫ്ലമേറ്ററി ഗുണങ്ങളുണ്ട്. "ഹൈബ്രിഡ് അഡ്വാൻസസ്" എന്ന പഠനമനുസരിച്ച്, ഇതിന്റെ തൊലിക്കും പൾപ്പിനും ശക്തമായ ആന്റിഓക്‌സിഡന്റ് ശേഷിയുണ്ട്. ഈ പോഷകങ്ങൾ ഫ്രീ റാഡിക്കലുകളെ ചെറുക്കുകയും ചർമ്മത്തെ സംരക്ഷിക്കുകയും യുവത്വം നിലനിർത്തുകയും ചെയ്യുന്നു.

ഡ്രാഗൺ ഫ്രൂട്ടിന്റെ സ്വാഭാവിക ആൻ്റിബാക്ടീരിയൽ, ആ്റി-ഇൻഫ്ലമേറ്ററി ഗുണങ്ങൾ ചർമ്മത്തിലെ അസ്വസ്ഥതകൾ, ചുവപ്പ് നിറം, മുഖക്കുരു എന്നിവ കുറയ്ക്കാൻ സഹായിക്കുന്നു. ജലാംശം നൽകാനും മുറിവുകൾ ഉണക്കാനും വാർദ്ധക്യത്തെ തടയാനും ഡ്രാഗൺ ഫ്രൂട്ട് മികച്ചതാണ്. ചർമ്മത്തിന് ഡ്രാഗൺ ഫ്രൂട്ട് നൽകുന്ന അഞ്ച് പ്രധാന ഗുണങ്ങൾ ഇതാ.

യുവത്വം നിലനിർത്താൻ സഹായിക്കുന്ന ആന്റിഓക്‌സിഡന്റുകൾ:

ഡ്രാഗൺ ഫ്രൂട്ടിന്റെ പ്രധാന ഗുണങ്ങളിലൊന്ന് അതിന്റെ ആന്റിഓക്‌സിഡന്റ് സാന്നിധ്യമാണ്. വിറ്റാമിൻ സി, ബെറ്റാലെയ്ൻസ്, ഫ്ലേവനോയിഡുകൾ എന്നിവയടങ്ങിയിട്ടുള്ള ഇത് അകാല വാർദ്ധക്യം, ചുളിവുകൾ, കറുത്ത പാടുകൾ എന്നിവയ്ക്ക് കാരണമാകുന്ന ഫ്രീ റാഡിക്കലുകളെ ചെറുക്കുന്നു. "ഫാർമക്കോഗ്നോസി ജേണലിൽ" പ്രസിദ്ധീകരിച്ച പഠനമനുസരിച്ച്, ഡ്രാഗൺ ഫ്രൂട്ടിന്റെ പൾപ്പ്, തൊലി, തണ്ട് എന്നിവയിലെല്ലാം മികച്ച ആന്റിഓക്‌സിഡന്റ് പ്രവർത്തനമുണ്ട്. പതിവായി കഴിക്കുകയോ പുരട്ടുകയോ ചെയ്യുന്നത് വാർദ്ധക്യ ലക്ഷണങ്ങൾ കുറച്ച് ചർമ്മത്തിന് തിളക്കം നൽകുന്നു.

വീക്കം കുറയ്ക്കാനും മുഖക്കുരു തടയാനും:

മുഖക്കുരു സാധ്യതയുള്ള ചർമ്മത്തിന് ഡ്രാഗൺ ഫ്രൂട്ട് ഒരു പ്രകൃതിദത്ത പരിഹാരമാണ്. "ഫുഡ് കെമിസ്ട്രി അഡ്വാൻസസ്" എന്ന പഠനങ്ങൾ ഇതിന്റെ ആൻ്റിബാക്ടീരിയൽ പ്രവർത്തനം മുഖക്കുരുവിന് കാരണമാകുന്ന ബാക്ടീരിയകളെ കുറയ്ക്കാൻ സഹായിക്കുന്നുവെന്ന് പറയുന്നു. ഇതിന്റെ ആൻ്റി-ഇൻഫ്ലമേറ്ററി ഘടകങ്ങൾ ചുവപ്പ്, അസ്വസ്ഥത, വീക്കം എന്നിവ കുറയ്ക്കുന്നു. ഇത് എക്സിമ, സൂര്യാഘാതം, സെൻസിറ്റീവ് ചർമ്മം എന്നിവയുള്ളവർക്കും പ്രയോജനകരമാണ്. പതിവായ ഉപയോഗം മുഖക്കുരു തടഞ്ഞ് ചർമ്മത്തെ ശുദ്ധമാക്കാൻ സഹായിക്കുന്നു.

കൊളാജൻ ഉത്പാദനം വർദ്ധിപ്പിക്കുന്നു:

ചർമ്മത്തിന്റെ ഇലാസ്തികത നിലനിർത്താൻ കൊളാജൻ അത്യാവശ്യമാണ്, വിറ്റാമിൻ സി ഇതിന്റെ ഉത്പാദനത്തിൽ പ്രധാന പങ്ക് വഹിക്കുന്നു. വിറ്റാമിൻ സി ധാരാളമായി അടങ്ങിയിരിക്കുന്ന ഡ്രാഗൺ ഫ്രൂട്ട് കൊളാജൻ സിന്തസിസിനെ പിന്തുണയ്ക്കുകയും ചർമ്മം മൃദുവും മിനുസമാർന്നതുമാക്കുകയും ചെയ്യുന്നു. കൂടാതെ, ഇതിന്റെ ആന്റിഓക്‌സിഡന്റ് ഗുണങ്ങൾ ഫ്രീ റാഡിക്കലുകളെ നിർവീര്യമാക്കുകയും ഓക്സിഡേറ്റീവ് സ്ട്രെസിൽ നിന്ന് ചർമ്മത്തെ സംരക്ഷിക്കുകയും യുവത്വം നിലനിർത്തുകയും ചെയ്യുന്നു. ഡ്രാഗൺ ഫ്രൂട്ട് പതിവായി കഴിക്കുന്നത് ജലാംശം വർദ്ധിപ്പിക്കാനും വീക്കം കുറയ്ക്കാനും ചർമ്മത്തിന്റെ നിറം മെച്ചപ്പെടുത്താനും സഹായിക്കും. ഇത് പാരിസ്ഥിതിക നാശത്തിൽ നിന്നുള്ള പ്രതിരോധം മെച്ചപ്പെടുത്തി നേർത്ത വരകളും ചുളിവുകളും രൂപപ്പെടുന്നത് മന്ദഗതിയിലാക്കുന്നു.

ആഴത്തിലുള്ള ജലാംശവും ഈർപ്പവും:

ഡ്രാഗൺ ഫ്രൂട്ടിൽ ഉയർന്ന അളവിൽ ജലാംശം അടങ്ങിയിരിക്കുന്നതിനാൽ ചർമ്മത്തിന് മികച്ച മോയ്സ്ചറൈസറാണ്. ഇത് പതിവായി ഉപയോഗിക്കുന്നത് വരൾച്ച, പാടുകൾ, നിറം മങ്ങൽ എന്നിവ തടഞ്ഞ് ചർമ്മത്തിന് തിളക്കം നൽകുന്നു. ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ച് പറയുന്നതനുസരിച്ച്, ഡ്രാഗൺ ഫ്രൂട്ടിന്റെ സ്വാഭാവിക ഗുണങ്ങൾ സൂര്യാഘാതം ശമിപ്പിക്കാൻ സഹായിക്കും.

ചർമ്മത്തിലെ കേടുപാടുകൾ പരിഹരിക്കുന്നു:

വിറ്റാമിൻ ബി3, വിറ്റാമിൻ ഇ എന്നിവയാൽ സമ്പന്നമായ ഡ്രാഗൺ ഫ്രൂട്ട് ചർമ്മത്തിന്റെ രോഗശാന്തിയെയും പുനരുജ്ജീവനത്തെയും പിന്തുണയ്ക്കുന്നു. ഇത് മുറിവുകൾ ഉണക്കാനും അൾട്രാവയലറ്റ് രശ്മികളിൽ നിന്നുള്ള കേടുപാടുകൾ കുറയ്ക്കാനും സഹായിക്കുന്നു. ഇത് കോശങ്ങളുടെ പുനരുജ്ജീവനത്തെ പ്രോത്സാഹിപ്പിക്കുകയും പാടുകൾ കുറയ്ക്കുകയും ചെയ്യുന്നു. അതിനാൽ, ഇത് ഭക്ഷണക്രമത്തിലും ചർമ്മ സംരക്ഷണത്തിലും ഒരു പ്രധാന ഘടകമാണ്.

ചർമ്മത്തിന് ഡ്രാഗൺ ഫ്രൂട്ട് എങ്ങനെ ഉപയോഗിക്കാം:

ഡ്രാഗൺ ഫ്രൂട്ട് നിങ്ങളുടെ ചർമ്മ സംരക്ഷണ ദിനചര്യയിൽ ഉൾപ്പെടുത്തുന്നത് വളരെ ലളിതമാണ്. പുതിയതായി കഴിക്കുകയാണെങ്കിലും മാസ്കായി ഉപയോഗിക്കുകയാണെങ്കിലും ഇതിന്റെ ഗുണങ്ങൾ ശക്തമായിരിക്കും. വീട്ടിലിരുന്ന് ഡ്രാഗൺ ഫ്രൂട്ട് ഉപയോഗിക്കാനുള്ള ചില വഴികൾ താഴെ നൽകുന്നു:

ഡ്രാഗൺ ഫ്രൂട്ട്, തേൻ മാസ്ക്: ചർമ്മത്തിന് ജലാംശം നൽകാനും തിളക്കം നൽകാനും. 2 ടേബിൾസ്പൂൺ ഡ്രാഗൺ ഫ്രൂട്ട് പൾപ്പും 1 ടീസ്പൂൺ തേനും കലർത്തി 20 മിനിറ്റ് മുഖത്ത് പുരട്ടിയ ശേഷം കഴുകിക്കളയുക.

ഡ്രാഗൺ ഫ്രൂട്ട്, തൈര് മാസ്ക്: ചർമ്മത്തിന് നിറം നൽകാനും തിളക്കം വർദ്ധിപ്പിക്കാനും. 2 ടേബിൾസ്പൂൺ പൾപ്പും 1 ടേബിൾസ്പൂൺ തൈരും കലർത്തി 15 മിനിറ്റ് മുഖത്ത് പുരട്ടിയ ശേഷം കഴുകിക്കളയുക.

ഡ്രാഗൺ ഫ്രൂട്ട്, കറ്റാർ വാഴ മാസ്ക്: ചർമ്മത്തിലെ അസ്വസ്ഥതകളും സൂര്യാഘാതവും ശമിപ്പിക്കാൻ. പൾപ്പും 1 ടേബിൾസ്പൂൺ കറ്റാർ വാഴ ജെല്ലും ചേർത്ത് കലർത്തി 20 മിനിറ്റിനു ശേഷം കഴുകിക്കളയുക.

ഡ്രാഗൺ ഫ്രൂട്ട്, ഓട്സ് സ്ക്രബ്: ചർമ്മത്തെ മൃദുവായി എക്സ്ഫോളിയേറ്റ് ചെയ്യാൻ. പൾപ്പും 1 ടേബിൾസ്പൂൺ ഓട്സും ആവശ്യാനുസരണം വെളിച്ചെണ്ണയും കലർത്തി വൃത്താകൃതിയിൽ മുഖത്ത് ഉരസിയ ശേഷം കഴുകിക്കളയുക.

ഡ്രാഗൺ ഫ്രൂട്ട്, നാരങ്ങ മാസ്ക്: എണ്ണമയം നിയന്ത്രിക്കാനും സുഷിരങ്ങൾ മുറുക്കാനും. പൾപ്പും അര ടീസ്പൂൺ നാരങ്ങാനീരും കലർത്തി 15 മിനിറ്റ് മുഖത്ത് പുരട്ടിയ ശേഷം കഴുകിക്കളയുക.

ഡ്രാഗൺ ഫ്രൂട്ട് ലിപ് സ്ക്രബ്: ചുണ്ടുകൾ മൃദുവാക്കാൻ. പൾപ്പും പഞ്ചസാരയും ഒലിവ് ഓയിലും കലർത്തി മൃദുവായി ചുണ്ടിൽ ഉരസിയ ശേഷം കഴുകിക്കളയുക.

ഡ്രാഗൺ ഫ്രൂട്ട്, മഞ്ഞൾ മാസ്ക്: മുഖക്കുരുവിനെതിരെ പോരാടാൻ. പൾപ്പും അര ടീസ്പൂൺ മഞ്ഞളും കലർത്തി മുഖക്കുരു ഉള്ള ഭാഗങ്ങളിൽ പുരട്ടി 15 മിനിറ്റിനു ശേഷം കഴുകിക്കളയുക.

ഈ പ്രകൃതിദത്ത പരിഹാരങ്ങൾ ലളിതവും ചെലവുകുറഞ്ഞതും രാസവസ്തുക്കൾ ഇല്ലാത്തതുമാണ്. ഡ്രാഗൺ ഫ്രൂട്ട് സാധാരണയായി ചർമ്മത്തിന് സുരക്ഷിതമാണെങ്കിലും, ചില ആളുകൾക്ക് ഇത് അനുയോജ്യമാകണമെന്നില്ല. സെൻസിറ്റീവ് ചർമ്മമുള്ള ചിലർക്ക് ചുവപ്പ്, ചൊറിച്ചിൽ, അല്ലെങ്കിൽ നേരിയ അസ്വസ്ഥതകൾ എന്നിവ അനുഭവപ്പെടാം. മുറിവുള്ള ചർമ്മത്തിൽ ഇത് ഉപയോഗിക്കുന്നത് അസ്വസ്ഥതകൾക്ക് കാരണമാകും. പ്രതികൂല പ്രതികരണങ്ങൾ ഒഴിവാക്കാൻ, ഡ്രാഗൺ ഫ്രൂട്ട് അടിസ്ഥാനമാക്കിയുള്ള ഏതെങ്കിലും മാസ്കോ സ്ക്രബ്ബോ ഉപയോഗിക്കുന്നതിന് മുൻപ് പാച്ച് ടെസ്റ്റ് നടത്തുന്നത് നല്ലതാണ്. എന്തെങ്കിലും അസ്വസ്ഥതകൾ ഉണ്ടായാൽ ഉടൻ തന്നെ ഉപയോഗം നിർത്തുക.

Disclaimer: ഈ ലേഖനം പൊതുവായ വിവരങ്ങൾക്ക് മാത്രമുള്ളതാണ്, ഇത് പ്രൊഫഷണൽ മെഡിക്കൽ ഉപദേശത്തിനോ രോഗനിർണയത്തിനോ ചികിത്സയ്ക്കോ പകരമാവില്ല.