രാവിലെ എഴുന്നേല്‍ക്കുമ്പോള്‍ നടുവേദന? വില്ലന്‍ നിങ്ങളുടെ കിടക്കയാകാം: എങ്ങനെ തിരിച്ചറിയാം?

Updated: Thursday, February 26, 2026, 6:56 [IST]

രാവിലെ ഉണരുമ്പോള്‍ നടുവേദന പതിവാണെങ്കില്‍ അതിനു കാരണം കിടക്കയാകാം. ഇത് പലരും തിരിച്ചറിയാറില്ല. മോശം കിടക്ക രാത്രികളില്‍ നട്ടെല്ലില്‍ സമ്മര്‍ദ്ദം ചെലുത്തി ക്രമേണ വേദനയ്ക്കും ഉറക്കക്കുറവിനും വഴിതെളിക്കും. നിങ്ങളുടെ കിടക്കയാണ് പ്രശ്‌നക്കാരനെന്ന് സൂചിപ്പിക്കുന്ന അഞ്ച് പ്രധാന ലക്ഷണങ്ങള്‍ എന്തൊക്കെയാണെന്ന് നോക്കാം.

ഉറക്കത്തിനു ശേഷം മാത്രം വരുന്ന നടുവേദനയാണ് ആദ്യ സൂചന. ഉണരുമ്പോള്‍ പുറംഭാഗത്തിന് അസ്വസ്ഥത അനുഭവപ്പെടുകയും, പിന്നീട് ചലിക്കുമ്പോള്‍ അത് കുറയുകയും ചെയ്യും. ഇത് കിടക്കയുമായി ബന്ധപ്പെട്ട പ്രശ്‌നമാണ്. ഏകദേശം ഒരു മണിക്കൂറിനുള്ളില്‍ വേദന മാറുകയാണെങ്കില്‍, നിങ്ങളുടെ കിടക്കയാണ് പ്രധാന കാരണം.

കിടക്കയുടെ പ്രതലം താഴ്ന്നുപോകുകയോ ഉയര്‍ന്നു നില്‍ക്കുകയോ ചെയ്യുന്നത് രണ്ടാമത്തെ ലക്ഷണമാണ്. ഉറങ്ങുന്ന ഭാഗങ്ങളില്‍ കുഴിവുണ്ടോ എന്ന് പരിശോധിക്കുക. കിടക്കയിലൂടെ കൈ ഓടിക്കുമ്പോള്‍ താഴ്ന്ന ഭാഗങ്ങളോ കടുപ്പമുള്ള പാച്ചുകളോ ഉണ്ടെങ്കില്‍, ശരീരത്തിന് താങ്ങ് ലഭിക്കില്ല. ഇത് നട്ടെല്ലിനെ വളയ്ക്കാനും ഓരോ രാത്രിയിലും പേശികളില്‍ സമ്മര്‍ദ്ദം ചെലുത്താനും ഇടയാക്കും.

കൈകാലുകളില്‍ മരവിപ്പും സൂചി കുത്തുന്നതു പോലെയുള്ള അനുഭവങ്ങളും മൂന്നാമത്തെ ലക്ഷണമാണ്. ഉണരുമ്പോള്‍ കൈകള്‍ തളര്‍ന്ന പോലെ അനുഭവപ്പെടാം. കടുപ്പമുള്ളതോ പഴകിയതോ ആയ കിടക്ക ഞരമ്പുകളിലും രക്തക്കുഴലുകളിലും സമ്മര്‍ദ്ദം ചെലുത്തി നട്ടെല്ലിനെ ബാധിക്കാം.

മറ്റുള്ളവരുടെ കിടക്കയില്‍ ഉറങ്ങുമ്പോള്‍ നല്ല സുഖം ലഭിക്കുന്നതാണ് നാലാമത്തെ ലക്ഷണം. ഹോട്ടലുകളിലോ ബന്ധുക്കളുടെ വീടുകളിലോ ഉറങ്ങുമ്പോള്‍ നടുവേദന കുറയുകയോ പൂര്‍ണ്ണമായി ഇല്ലാതാവുകയോ ചെയ്യുന്നുണ്ടെങ്കില്‍, നിങ്ങളുടെ കിടക്കയാണ് പ്രശ്‌നമെന്ന് വ്യക്തം. സ്ഥലം മാറുമ്പോള്‍ ഉറങ്ങുന്ന പ്രതലം മാറുന്നതാണ് ഈ വ്യത്യാസത്തിന് കാരണം.

രാത്രിയില്‍ തുടര്‍ച്ചയായി തിരിഞ്ഞും മറിഞ്ഞും കിടക്കേണ്ടി വരുന്നത് അഞ്ചാമത്തെ സൂചനയാണ്. സുഖകരമായ ഒരു സ്ഥലം കണ്ടെത്താനും ഇടയ്ക്കിടെ ഉറക്കമുണര്‍ന്ന് സ്ഥാനം മാറ്റാനും നിങ്ങള്‍ക്ക് ബുദ്ധിമുട്ട് വരും. ശരീരത്തിന് മതിയായ താങ്ങ് ലഭിക്കാതിരിക്കുമ്പോള്‍ ഉറക്കം തടസപ്പെടാം. ഇത് പേശികളില്‍ പിരിമുറുക്കത്തിനും രാവിലെ ശരീരത്തിന് കടുപ്പത്തിനും വഴിയൊരുക്കും.

കിടക്കയുടെ പഴക്കവും ഒരു പ്രധാന ഘടകമാണെന്ന് വിദഗ്ദ്ധര്‍ ചൂണ്ടിക്കാട്ടുന്നു. ഏതാനും വര്‍ഷങ്ങള്‍ കഴിയുമ്പോള്‍ പല കിടക്കകളും അവയുടെ താങ്ങാനുള്ള ശേഷി നഷ്ടപ്പെടും. തുണിത്തരങ്ങള്‍ ചുരുങ്ങുകയും സ്പ്രിംഗുകള്‍ ദുര്‍ബലമാവുകയും ചെയ്യും. പഴയ കിടക്കകള്‍, പ്രത്യേകിച്ച് ദീര്‍ഘനേരം ജോലി ചെയ്യുന്നവരെ സംബന്ധിച്ച് നടുവേദനയ്ക്ക് സാധ്യത കൂട്ടും.

നട്ടെല്ലിന്റെ താങ്ങ് ഉറങ്ങുന്ന രീതിക്കനുസരിച്ചും വ്യത്യാസപ്പെടും. വശം ചരിഞ്ഞുകിടക്കുന്നവര്‍ക്ക് തോളുകള്‍ക്ക് മതിയായ മൃദുത്വം ആവശ്യമാണ്. മലര്‍ന്നുകിടക്കുന്ന ആളുകള്‍ക്ക് അരക്കെട്ടിന് കീഴില്‍ കൃത്യമായ പിന്തുണ വേണ്ടിവരും. ഉറപ്പുള്ളതോ തീരെ മൃദലമായതോ ആയ കിടക്കകള്‍ക്ക് ഇത് നല്‍കാനാവില്ല. അപ്പോള്‍ നട്ടെല്ല് വളയുകയും സ്ഥാനം തെറ്റുകയും ചെയ്യും.

ചില ലളിതമായ വഴികളിലൂടെ നിങ്ങളുടെ കിടക്കയുടെ അവസ്ഥ പരിശോധിക്കാന്‍ സാധിക്കും. പിന്നോട്ട് മാറിനിന്ന് കിടക്കയില്‍ കാണുന്ന കുഴിവുകള്‍ ശ്രദ്ധിക്കുക. കിടന്നുനോക്കി നടുവിന് എന്തു തോന്നുന്നുവെന്ന് വിലയിരുത്തുക. അരക്കെട്ട് ആഴത്തില്‍ താഴുന്നുണ്ടെങ്കില്‍ താങ്ങ് മോശമാണ്. തോളുകള്‍ക്ക് താഴാന്‍ കഴിയുന്നില്ലെങ്കില്‍ പ്രതലം വളരെ കടുപ്പമുള്ളതാവാം.

തലയിണകളും നട്ടെല്ലിന്റെ വിന്യാസത്തെ നേരിട്ട് സ്വാധീനിക്കുന്നുണ്ട്. വളരെ ഉയരമുള്ള തലയിണ കഴുത്തിനെ വളച്ചേക്കാം. തീരെ നേര്‍ത്ത തലയിണയാകട്ടെ, തല താഴാന്‍ ഇടയാക്കും. കഴുത്ത് ശരിയായ വിന്യാസത്തില്‍ അല്ലാത്തപ്പോള്‍, നടുവിന് മൊത്തത്തില്‍ വേദന വരാം. കിടക്കയുടെ പരിശോധനയോടൊപ്പം തലയിണയുടെ ഉയരവും ക്രമീകരിക്കേണ്ടത് പ്രധാനമാണ്.

ദിവസവും ദീര്‍ഘനേരം ഇരിക്കുന്നവര്‍ക്ക് കൂടുതല്‍ ശ്രദ്ധ ആവശ്യമാണ്. മോശം കിടക്ക രാത്രിയില്‍ ഈ സമ്മര്‍ദ്ദം കൂട്ടും. അങ്ങനെയുള്ളവര്‍ക്ക് നല്ല ഉറക്കം ലഭിക്കാന്‍ സഹായകമായ കിടക്ക നിര്‍ബന്ധമാണ്. ഇത് ദീര്‍ഘനേരത്തെ ഇരിപ്പിന് ശേഷം പേശികളെ വീണ്ടെടുക്കാന്‍ സഹായിക്കും.

ഈ ലക്ഷണങ്ങള്‍ നിങ്ങളുടെ സാഹചര്യങ്ങളുമായി യോജിക്കുന്നുവെങ്കില്‍, കിടക്ക മാറ്റുന്നത് പരിഗണിക്കുക. ആദ്യം കിടക്ക തിരിച്ച് ഉപയോഗിച്ചുനോക്കുക. ഷോറൂമുകളില്‍ പോയി വ്യത്യസ്ത വലിപ്പത്തിലുള്ള കിടക്കകള്‍ പരീക്ഷിച്ച്, അടുത്ത ദിവസം രാവിലെ നടുവിന് എന്തു തോന്നുന്നുവെന്ന് ശ്രദ്ധിക്കുക. ഈ ലളിതമായ മാറ്റങ്ങള്‍ നിങ്ങളുടെ നട്ടെല്ലിന്റെ ആരോഗ്യം സംരക്ഷിക്കാനും ദൈനംദിന അസ്വസ്ഥതകള്‍ കുറയ്ക്കാനും സഹായിക്കും.