പാല് തിളച്ചുതൂകാതിരിക്കാന് പാത്രത്തിന് മുകളില് ഈ ട്രിക്ക് പരീക്ഷിക്കൂ; പിന്നിലെ സയന്സും അറിയാം
അടുക്കളയില് പാല് തിളച്ചുതൂവുന്നത് വീട്ടമ്മമാര് നേരിടുന്ന ഒരു പ്രധാന വെല്ലുവിളിയാണ്. ചെറിയൊരു ശ്രദ്ധക്കുറവ് ഉണ്ടാകുമ്പോള് പാല് തിളച്ചുതൂവി അടുക്കള മുഴുവന് വൃത്തികേടാകാറുണ്ട്. പാല് സ്റ്റൗവില് വീണുണ്ടാകുന്ന അഴുക്ക് വൃത്തിയാക്കാനും ഏറെ നേരം വേണം. പലപ്പോഴും ജോലിക്കു പോകുന്നതിന് തൊട്ടുമുന്പായിരിക്കും ഈ പ്രശ്നം ഉണ്ടാകുന്നത്. അങ്ങനെ ഒരു ദിവസത്തെ പോസിറ്റീവ് എനര്ജി മുഴുവന് പാല് തിളച്ചുതൂവുന്നതിലൂടെ നഷ്ടപ്പെടാറുണ്ട്.
എന്നാല് ഈ വെല്ലുവിളി ലളിതമായൊരു അടുക്കള വിദ്യയിലൂടെ ഒരു പരിധി വരെ ഒഴിവാക്കാമെന്ന് പല വീട്ടമ്മമാര്ക്കും അറിയില്ല. പാല് തിളപ്പിക്കുമ്പോള് പാത്രത്തിന് കുറുകെ ഒരു തടിയുടെ സ്പൂണ് വെക്കുന്നതിലൂടെ പാല് പതഞ്ഞുപൊങ്ങുന്നത് തടയാന് സാധിക്കും.
ഇതിനു പിന്നിലെ സയന്സ്
പാല് ചൂടാകുമ്പോള് പ്രോട്ടീന്റെയും കൊഴുപ്പിന്റെയും ഒരു നേര്ത്ത പാളി ഉപരിതലത്തില് രൂപപ്പെടുന്നു. ഈ പാളിക്ക് താഴെ നീരാവി കെട്ടിനില്ക്കുമ്പോള് കുമിളകള് രൂപപ്പെട്ട് പാളിയെ ഉയര്ത്തുന്നു. പാത്രത്തിന് കുറുകെ വെക്കുന്ന തടിക്കരണ്ടി ചില കുമിളകളെ പൊട്ടിച്ച് പതഞ്ഞുപൊങ്ങുന്നതിന്റെ വേഗത കുറയ്ക്കാന് സഹായിക്കുന്നു.
പാത്രത്തിന്റെ അരികുകളെ അപേക്ഷിച്ച് തടിക്കരണ്ടിക്ക് ചൂട് കുറവാണ്. പതഞ്ഞുപൊങ്ങുന്ന പാല് തണുത്ത തടിക്കരണ്ടിയില് തട്ടുമ്പോള് ഭാഗികമായി താഴുന്നു. ഇത് പതയുടെ ഉയരം കുറയ്ക്കും. എന്നാല് ഈ പ്രഭാവം താല്ക്കാലികം മാത്രമാണ്. ഇതൊരു പൂര്ണ്ണ പരിഹാരമായി കണക്കാക്കാനാവില്ല.
ഈ ട്രിക്കിനായി വൃത്തിയുള്ളതും ഉണങ്ങിയതുമായ ഒരു തടിക്കരണ്ടി മാത്രം ഉപയോഗിക്കുക. അല്ലെങ്കില് പാല് പിരിഞ്ഞു പോകും. പാത്രത്തിന്റെ വക്കുകളില് ഉറച്ചിരിക്കുന്ന രീതിയില്, പാത്രത്തിന് മുകളിലൂടെ ഇത് തിരശ്ചീനമായി വെക്കണം. സ്പൂണിന്റെ കൈപ്പിടി നേരിട്ടുള്ള തീജ്വാലയില് നിന്ന് അകറ്റി നിര്ത്തുക.
ഈ രീതി ചെറിയ പാത്രത്തില്, മിതമായ തീയില് പാല് തിളയ്ക്കുമ്പോള് കൂടുതല് ഫലപ്രദമാണ്. വളരെ ഉയര്ന്ന തീയിലും വലിയ പാത്രങ്ങളിലും കാര്യമായ ഫലം ലഭിച്ചേക്കില്ല. പാല് സാവധാനം ചൂടാക്കുമ്പോഴാണ് ഈ വിദ്യ നന്നായി പ്രവര്ത്തിക്കുന്നത്. പാല് ഇടയ്ക്കിടെ ഇളക്കുന്നതും പതഞ്ഞുപൊങ്ങുന്നത് നിയന്ത്രിക്കാന് സഹായിക്കും.
തടി ചൂടിനെ സാവധാനത്തില് മാത്രമേ കടത്തിവിടൂ. അതിനാല് തടിക്കരണ്ടിക്ക് കൂടുതല് സമയം തണുപ്പ് നിലനിര്ത്താനാകും. എന്നാല് ലോഹക്കരണ്ടികള് വേഗത്തില് ചൂട് പിടിക്കുന്നതിനാല് പാല് തിളച്ചു തൂവുന്നത് തടയാന് കഴിയില്ല. ചൂടായ ലോഹക്കരണ്ടികള് കൈയ്ക്ക് പൊള്ളലേല്പ്പിക്കാനും സാധ്യതയുണ്ട്. അതേസമയം, ശക്തമായ ചൂടില് പാല് തിളച്ചുതൂവാന് സാധ്യതയുണ്ട് പാല് അടുപ്പത്ത് വെച്ച് ശ്രദ്ധിക്കാതെ പോകരുത്. തിളക്കാറാകുമ്പോള് തീ കുറയ്ക്കുക. മുകളില് തടിയുടെ സ്പൂണ് വയ്ക്കുക. തടിക്കരണ്ടി ഒരു ചെറിയ സഹായം മാത്രമാണ്. പാല് തിളച്ചുതൂവിയുള്ള അപകടങ്ങള് ഒഴിവാക്കാന് ശ്രദ്ധയാണ് ഏറ്റവും ആദ്യം വേണ്ടത്. പാല് തറയില് വീണാല് തെന്നിവീഴാതിരിക്കാന് ഉടന് തുടച്ചുമാറ്റുക.
Click it and Unblock the Notifications
Sign in with Google