രാവിലെ ഉറക്കമുണരുമ്പോള്‍ കാഴ്ച മങ്ങുന്നുണ്ടോ? ഇത് രോഗത്തിന്റെ മുന്നറിയിപ്പാണോ? വിശദമായി അറിയാം

Updated: Thursday, February 19, 2026, 16:37 [IST]

രാവിലെ ഉറക്കമുണരുമ്പോള്‍ കാഴ്ച മങ്ങുന്ന അവസ്ഥ പലര്‍ക്കും അനുഭവപ്പെടാറുണ്ട്. കുറച്ചു നേരം കാഴ്ച്ച മങ്ങിയതിനു ശേഷം കണ്ണുകള്‍ തെളിയാറുമുണ്ട്. എന്നാല്‍ ചിലപ്പോള്‍ ഇത് ഗുരുതരമായ ആരോഗ്യപ്രശ്‌നങ്ങളുടെ സൂചനയാകാം. വരണ്ട കണ്ണുകള്‍, തെറ്റായ പവറുള്ള കണ്ണടകള്‍, സ്‌ക്രീന്‍ ഉപയോഗം മൂലമുള്ള കണ്ണിന്റെ ആയാസം, രക്തത്തിലെ ഉയര്‍ന്ന പഞ്ചസാരയുടെ അളവ്, നിര്‍ജ്ജലീകരണം, അലര്‍ജികള്‍, അണുബാധകള്‍, അല്ലെങ്കില്‍ അപൂര്‍വമായി തലച്ചോറുമായി ബന്ധപ്പെട്ട പ്രശ്‌നങ്ങള്‍ എന്നിവയൊക്കെ ഇതിന് കാരണമായേക്കാം.

ഉറക്കമുണരുമ്പോള്‍ കാഴ്ച ഏതാനും മിനിറ്റുകളോളം മങ്ങിയതായി തോന്നുന്നത് സാധാരണമാണ്. കണ്ണ് നനയുകയും കണ്ണുനീര്‍ പൂര്‍ണ്ണമായി പരക്കുകയും ചെയ്യുമ്പോള്‍ കാഴ്ച തെളിയാറുണ്ട്. എന്നാല്‍ മങ്ങല്‍ കൂടുതല്‍ നേരം നീണ്ടുനില്‍ക്കുകയാണെങ്കില്‍, അത് എപ്പോള്‍ തുടങ്ങി, എത്രനേരം നീണ്ടുനില്‍ക്കുന്നു, ഒരു കണ്ണിലാണോ അതോ രണ്ട് കണ്ണുകളിലുമാണോ പ്രശ്‌നം എന്നെല്ലാമുള്ള വിവരങ്ങള്‍ ശ്രദ്ധിക്കുക. ഈ വിവരങ്ങള്‍ നേത്രരോഗ വിദഗ്ദ്ധന് യഥാര്‍ത്ഥ കാരണം കണ്ടെത്താന്‍ സഹായിക്കും.

കണ്ണുകളുടെ വരള്‍ച്ചയാണ് രാവിലെ കാഴ്ച മങ്ങുന്നതിന്റെ പ്രധാന കാരണങ്ങളിലൊന്ന്. ഉറങ്ങുമ്പോള്‍ കണ്ണുനീര്‍ പാളിക്ക് തകരാറുകള്‍ സംഭവിക്കാം. എസിയും ഫാനും ഇതിന്റെ തീവ്രത വര്‍ദ്ധിപ്പിക്കാന്‍ സാധ്യതയുണ്ട്. ചിലപ്പോള്‍ കണ്ണിന് അസ്വസ്ഥതയോ വേദനയോ അനുഭവപ്പെട്ടേക്കാം. കണ്ണിന് ഈര്‍പ്പം നല്‍കുന്ന തുള്ളിമരുന്നുകള്‍ ഉപയോഗിക്കുക, രാത്രിയില്‍ കാറ്റ് നേരിട്ട് മുഖത്ത് ഏല്‍ക്കുന്നത് ഒഴിവാക്കുക എന്നിവ ഇതിനുള്ള പരിഹാരങ്ങളാണ്.

കാഴ്ചാ വൈകല്യങ്ങളായ മയോപിയ (ഹ്രസ്വദൃഷ്ടി), ഹൈപ്പര്‍മെട്രോപിയ (ദീര്‍ഘദൃഷ്ടി), എന്നിവയും രാവിലെ കാഴ്ച മങ്ങലിന് കാരണമാവാം. പ്രായത്തിനനുസരിച്ച് കണ്ണടയുടെ പവറില്‍ മാറ്റങ്ങള്‍ വരുത്തണം. പ്രമേഹ രോഗികളുടെ കാഴ്ചയില്‍ ഇടയ്ക്കിടെ മാറ്റങ്ങള്‍ വരാനുള്ള സാധ്യത കൂടുതലാണ്. അതിനാല്‍ പതിവായ നേത്രപരിശോധന നിര്‍ബന്ധമാണ്.

ഉറങ്ങുന്നതിനു മുമ്പ് ദീര്‍ഘനേരം സ്‌ക്രീനില്‍ നോക്കുന്നത് കണ്ണിന്റെ പേശികള്‍ക്ക് ആയാസമുണ്ടാക്കും. ഫോണുകളിലോ ലാപ്‌ടോപ്പുകളിലോ ശ്രദ്ധ കേന്ദ്രീകരിക്കുന്നത് കണ്ണു ചിമ്മുന്നതിന്റെ എണ്ണം കുറയ്ക്കും. ഇത് കണ്ണിന്റെ ഉപരിതലത്തെ വരണ്ടതാക്കുകയും ക്ഷീണിപ്പിക്കുകയും ചെയ്യും. ഉറക്കമുണരുമ്പോള്‍ കാഴ്ച മങ്ങുന്നതിന് ഇത് പ്രധാന കാരണമാണ്. ചെറിയ ഇടവേളകള്‍ എടുക്കാനും രാത്രിയില്‍ സ്‌ക്രീനിന്റെ തെളിച്ചം കുറയ്ക്കാനും ഡോക്ടര്‍മാര്‍ നിര്‍ദേശിക്കുന്നു.

പ്രമേഹരോഗികളിലെ കാഴ്ച മങ്ങല്‍

പ്രമേഹരോഗികളില്‍ രാവിലെ കാഴ്ച മങ്ങുന്നത് സാധാരണമാണ്. ഷുഗര്‍ നില സാധാരണമാകുമ്പോള്‍ ഈ അവസ്ഥ മെച്ചപ്പെടാറുണ്ട്. എന്നാല്‍ കാഴ്ച മങ്ങുന്നത് നീണ്ടു നിന്നാല്‍ വൈദ്യസഹായം തേടേണ്ടത് അത്യാവശ്യമാണ്. നിര്‍ജ്ജലീകരണവും കുറഞ്ഞ രക്തസമ്മര്‍ദ്ദവും രാവിലത്തെ കാഴ്ചയെ ബാധിക്കാം. രാത്രിയില്‍ ചിലര്‍ വെള്ളം കുടിക്കാതെ മണിക്കൂറുകളോളം ഉറങ്ങുകയും ഉറക്കത്തില്‍ വിയര്‍ക്കുകയും ചെയ്യാം. ഇത് കണ്ണുകളിലേക്കുള്ള രക്തയോട്ടത്തില്‍ മാറ്റങ്ങള്‍ വരുത്തിയേക്കാം. പെട്ടെന്ന് എഴുന്നേറ്റു നില്‍ക്കുമ്പോള്‍ കാഴ്ച മങ്ങുന്നതായോ ഇരുണ്ട പാടുകളോ അനുഭവപ്പെടാം. ഇത്തരം പ്രശ്‌നങ്ങള്‍ തുടര്‍ച്ചയായി ഉണ്ടാകുകയാണെങ്കില്‍ ഒരു ഡോക്ടറെ സമീപിക്കേണ്ടത് അത്യാവശ്യമാണ്.

പനിയും അലര്‍ജികളും നേരിയ അണുബാധകളും പലപ്പോഴും രാത്രിയില്‍ വഷളാകാറുണ്ട്. സ്രവങ്ങള്‍ കാരണം രാവിലെ കണ്ണുകള്‍ ഒട്ടിപ്പിടിച്ചേക്കാം. കണ്‍പോളകള്‍ വീര്‍ക്കുകയും വൃത്തിയാക്കുന്നതുവരെ കാഴ്ച മങ്ങുകയും ചെയ്യും. ചുവപ്പ് നിറം, ചൊറിച്ചില്‍, വേദന, കട്ടിയുള്ള സ്രവം എന്നിവ അണുബാധയുടെ സൂചനകളാണ്. ഇത്തരം സാഹചര്യങ്ങളില്‍ ഒരു നേത്രരോഗ വിദഗ്ദ്ധന്റെ അടിയന്തര പരിചരണം ആവശ്യമാണ്.

ഗുരുതരമായ രോഗങ്ങളുടെ സൂചന

ചിലപ്പോള്‍ രാവിലെ കാഴ്ച മങ്ങുന്നത് ഗുരുതരമായ രോഗങ്ങളുടെ സൂചനയാവാം. സ്‌ട്രോക്ക്, ഒപ്റ്റിക് നെര്‍വിനുള്ള തകരാറുകള്‍, അല്ലെങ്കില്‍ അക്യൂട്ട് ഗ്ലോക്കോമ എന്നിവ കാഴ്ചയില്‍ മാറ്റങ്ങളുണ്ടാക്കാം. പെട്ടെന്നുണ്ടാകുന്ന കടുത്ത തലവേദന, കണ്ണ് വേദന, മനംപിരട്ടല്‍, ഇരട്ട കാഴ്ച, ഒരു കണ്ണിന്റെ പകുതി ഭാഗത്തെ കാഴ്ച നഷ്ടപ്പെടുക എന്നിവയാണ് പ്രധാന മുന്നറിയിപ്പുകള്‍. ഈ ലക്ഷണങ്ങള്‍ക്ക് അടിയന്തര വൈദ്യസഹായം അത്യാവശ്യമാണ്.

എല്ലാ ദിവസവും കാഴ്ച മങ്ങല്‍ എത്രനേരം നീണ്ടുനില്‍ക്കുന്നു എന്ന് രേഖപ്പെടുത്തുക. തലവേദന, തലകറക്കം പോലുള്ള അനുബന്ധ ലക്ഷണങ്ങള്‍ ഉണ്ടോ എന്നു ശ്രദ്ധിക്കുക. പ്രമേഹം, രക്തസമ്മര്‍ദ്ദം തുടങ്ങിയ മെഡിക്കല്‍ ചരിത്രം ഡോക്ടറുമായി പങ്കുവെക്കുക. ഒരു നേത്രരോഗ വിദഗ്ദ്ധന്റെ നേരത്തെയുള്ള പരിശോധനകള്‍ പ്രശ്‌നങ്ങള്‍ കണ്ടെത്താനും ദീര്‍ഘകാലത്തേക്ക് കാഴ്ച സംരക്ഷിക്കാനും സഹായിക്കും.