നിങ്ങളുടെ ചുണ്ട് വരണ്ട് നിറമില്ലാതെ ഇരിക്കുകയാണോ? ചുണ്ടിന് നിറം നൽകാൻ ഇങ്ങനെ ചെയ്താൽ മതി

പല കാരണങ്ങൾ കൊണ്ടും നമുക്ക് ചുണ്ടുകളുടെ സ്വാഭാവിക നിറവും മൃദുത്വവും നഷ്ടപ്പെടാം. സ്ഥിരമായി കാപ്പി കുടിക്കുന്നതോ സൂര്യപ്രകാശം ഏൽക്കുന്നതോ നിരന്തരം ലിപ്സ്റ്റിക് ഉപയോഗിക്കുന്നതോ സിഗരറ്റ് ഉപയോഗമോ ചുണ്ടുകളുടെ നിറം നഷ്ടപ്പെടാൻ കാരണമാകാം. എന്നാൽ വിലകൂടിയ ഉത്പന്നങ്ങൾ ഇല്ലാതെ തന്നെ ചുണ്ടുകൾക്ക് സ്വാഭാവികമായ റോസ് നിറം വീണ്ടെടുക്കാൻ സാധിക്കും.

ചുണ്ടുകൾക്ക് സ്വാഭാവികമായി പിങ്ക് നിറം ലഭിക്കാൻ സ്ഥിരമായ പരിചരണവും ലളിതമായ ശീലങ്ങളും ആവശ്യമാണ്. മൃദുലമായ സ്ക്രബ്ബിങ് മുതൽ അല്പം പരിശ്രമവും പ്രകൃതിദത്ത ചേരുവകളും ദിവസേനയുള്ള ശ്രദ്ധയും നൽകിയാൽ മൃദുവും ആരോഗ്യകരവുമായ ചുണ്ടുകൾ ലഭിക്കും. അതിനുളള ചില വഴികളിതാ.

മൃതകോശങ്ങൾ നീക്കം ചെയ്യുക: വരണ്ടതും നിറം മങ്ങിയതുമായ ചുണ്ടുകൾക്ക് കാരണം മൃതകോശങ്ങളാകാം. ഒരു ടീസ്പൂൺ പഞ്ചസാര, തേൻ അല്ലെങ്കിൽ വെളിച്ചെണ്ണയുമായി ചേർത്ത് ചുണ്ടുകളിൽ ഒരു മിനിറ്റ് വൃത്താകൃതിയിൽ മസാജ് ചെയ്യുക. ശേഷം ഇളം ചൂടുവെള്ളത്തിൽ കഴുകി കളയുക. ആഴ്ചയിൽ രണ്ടോ മൂന്നോ തവണ ഇത് ചെയ്യുക. പതിവായി മൃതകോശങ്ങൾ നീക്കം ചെയ്യുന്നത് ചുണ്ടുകൾക്ക് മൃദുത്വവും ഉന്മേഷവും നൽകും. അമിതമായി ഉരസുന്നത് ഒഴിവാക്കുക.

ചുണ്ടുകൾക്ക് ജലാംശം നൽകുക: മൃദുലവും സ്വാഭാവിക പിങ്ക് നിറമുള്ള ചുണ്ടുകൾക്ക് ജലാംശം പ്രധാനമാണ്. ധാരാളം വെള്ളം കുടിക്കുക. ചുണ്ട് തുപ്പലുപയോഗിച്ച് നനയ്ക്കുന്നത് ഒഴിവാക്കുക, ഇത് ചുണ്ടുകൾ വരണ്ടതാക്കും. ഷിയ ബട്ടർ, ബദാം ഓയിൽ, ബീസ്‌വാക്സ് എന്നിവ അടങ്ങിയ മോയ്സ്ചറൈസിങ് ലിപ് ബാം ഉപയോഗിക്കുക.

വെയിലിൽ നിന്ന് സംരക്ഷണം: എസ്പിഎഫ് അടങ്ങിയ ലിപ് ബാം ഉപയോഗിച്ച് ചുണ്ടുകളെ സൂര്യപ്രകാശത്തിൽ നിന്ന് സംരക്ഷിക്കുക. ഉറങ്ങുന്നതിന് മുമ്പ് അല്പം നെയ്യ്, പെട്രോളിയം ജെല്ലി, അല്ലെങ്കിൽ ബദാം ഓയിൽ പുരട്ടുന്നത് ചുണ്ടുകൾക്ക് രാത്രി മുഴുവൻ ഈർപ്പം നൽകി മൃദുത്വവും സ്വാഭാവിക നിറവും നിലനിർത്താൻ സഹായിക്കും.

നാരങ്ങയും തേനും: ചുണ്ടുകൾക്ക് തിളക്കം നൽകാനും മൃതകോശങ്ങൾ നീക്കം ചെയ്യാനും സഹായിക്കുന്നു. 10 മിനിറ്റ് പുരട്ടിയ ശേഷം കഴുകി കളയുക.

ബീറ്റ്റൂട്ട് ജ്യൂസ്: സ്വാഭാവികമായ റോസ് നിറം നൽകുന്നു. കാലക്രമേണ ചുണ്ടുകളുടെ നിറം മെച്ചപ്പെടുത്തുന്നു.

കറ്റാർ വാഴ ജെൽ: മുറിവുകൾ ഉണക്കാനും ജലാംശം നൽകാനും ചുണ്ട് വരളുന്നതും ഇരുണ്ട നിറവും കുറയ്ക്കാനും സഹായിക്കുന്നു.

ചർമ്മം പോലെ ചുണ്ടുകൾക്കും സൂര്യപ്രകാശത്തിൽ നിന്ന് സംരക്ഷണം ആവശ്യമാണ്. പുറത്തുപോകുമ്പോൾ എസ്പിഎഫ് 15 അല്ലെങ്കിൽ അതിൽ കൂടുതൽ അടങ്ങിയ ലിപ് ബാം എല്ലായ്പ്പോഴും ഉപയോഗിക്കുക. യു വി രശ്മികൾ ചുണ്ടുകൾക്ക് നിറം മങ്ങാനും ഇരുണ്ടതാക്കാനും ഇടയാക്കും. അതിനാൽ വെയിലത്ത് പോകുമ്പോൾ ഓരോ മണിക്കൂറിലും വീണ്ടും ലിപ് ബാം പുരട്ടുക.

നല്ല ഭക്ഷണക്രമം ചുണ്ടുകൾക്ക് സ്വാഭാവിക നിറം വീണ്ടെടുക്കാൻ സഹായിക്കും. വിറ്റാമിൻ എ, സി, ഇ എന്നിവ അടങ്ങിയ മാതളനാരങ്ങ, തക്കാളി, കാരറ്റ്, ചീര തുടങ്ങിയ പഴങ്ങളും പച്ചക്കറികളും ഭക്ഷണത്തിൽ ഉൾപ്പെടുത്തുക. ഈ പോഷകങ്ങൾ രക്തചംക്രമണം മെച്ചപ്പെടുത്താനും കേടായ കോശങ്ങളെ നന്നാക്കാനും ചുണ്ടുകളുടെ സ്വാഭാവിക റോസ് നിറം വർദ്ധിപ്പിക്കാനും സഹായിക്കുന്നു.

ചുണ്ടുകൾ വരണ്ടതാക്കുന്ന മാറ്റ് അല്ലെങ്കിൽ രാസവസ്തുക്കൾ അടങ്ങിയ ലിപ്സ്റ്റിക്കുകൾ ഒഴിവാക്കുക. ജലാംശം നൽകുന്ന അല്ലെങ്കിൽ ക്രീം ഫോർമുലകൾ തിരഞ്ഞെടുക്കുക. കിടക്കുന്നതിന് മുമ്പ് എല്ലായ്പ്പോഴും ലിപ്സ്റ്റിക് നീക്കം ചെയ്യുക. മേക്കപ്പ് ഇട്ട് ഉറങ്ങുന്നത് പിഗ്മെന്റേഷന് കാരണമാകും.

റോസ് വാട്ടർ തേനുമായി കലർത്തുക അല്ലെങ്കിൽ വിറ്റാമിൻ ഇ ഓയിൽ രാത്രിയിൽ പുരട്ടുക. ഇത്തരത്തിൽ രാത്രിയിലെ പരിചരണം ചുണ്ടുകൾക്ക് പോഷണം നൽകാനും രാവിലെ സ്വാഭാവിക പിങ്ക് നിറം ലഭിക്കാനും സഹായിക്കുന്നു.

Disclaimer: ഈ ലേഖനം പൊതുവായ വിവരങ്ങൾ നൽകുന്നതിന് മാത്രമുള്ളതാണ്. ഇത് ഒരു പ്രൊഫഷണൽ മെഡിക്കൽ ഉപദേശത്തിനോ രോഗനിർണ്ണയത്തിനോ ചികിത്സക്കോ പകരമാവില്ല. ഏതെങ്കിലും ആരോഗ്യപ്രശ്നങ്ങളിലോ ജീവിതശൈലി മാറ്റങ്ങളിലോ എല്ലായ്പ്പോഴും ഒരു യോഗ്യതയുള്ള ആരോഗ്യ വിദഗ്ദ്ധന്റെ ഉപദേശം തേടുക.