ബാത്ത്റൂം വൃത്തിയാക്കാൻ ഇനി കെമിക്കൽ വേണ്ട; 7 ലളിതമായ വഴികൾ ഇതാ!
ബാത്റൂം നന്നായി വൃത്തിയാക്കാൻ തീക്ഷ്ണമായ മണമുള്ളതും കടുപ്പമേറിയതുമായ കെമിക്കൽ ക്ലീനറുകൾ തന്നെ വേണമെന്നില്ല. സോപ്പ് കറകൾ, വെള്ളത്തിന്റെ പാടുകൾ, ദുർഗന്ധം എന്നിവ മാറ്റാൻ നമ്മുടെ വീട്ടിൽ തന്നെയുള്ള ചില സാധനങ്ങൾ മതിയാകും.
സ്വാഭാവിക മാർഗ്ഗങ്ങൾ ഉപയോഗിക്കുന്നത് ബാത്റൂമിലെ പ്രതലങ്ങൾ കേടുപാടുകൾ കൂടാതെ സംരക്ഷിക്കാനും, ദോഷകരമായ വാതകങ്ങൾ ഇല്ലാത്തതിനാൽ പരിസ്ഥിതിക്കും വീട്ടിലുള്ളവർക്കും സുരക്ഷിതമായിരിക്കാനും സഹായിക്കും. പ്രത്യേകിച്ച് കുട്ടികളോ വളർത്തുമൃഗങ്ങളോ ഉള്ള വീടുകളിൽ ഇത് ഏറെ നല്ലതാണ്. ബാത്റൂം സ്വാഭാവികമായി വൃത്തിയാക്കാനുള്ള 7 വഴികൾ ഇതാ..
1. ആദ്യം പൊടിയും അഴുക്കും മാറ്റുക
സ്വാഭാവിക ക്ലീനറുകൾ ഉപയോഗിക്കുന്നതിന് മുൻപായി ബാത്റൂമിലെ പൊടിയും വീണുകിടക്കുന്ന മുടിയും മറ്റും മാറ്റണം. തറ തുടച്ചു വൃത്തിയാക്കുകയും പ്രതലങ്ങളിലെ വെള്ളം ഉണക്കുകയും ചെയ്യുക. ഇത് വൃത്തിയാക്കുന്ന സമയത്ത് പൊടി കാരണം ചെളിപ്പാടുകൾ ഉണ്ടാകുന്നത് തടയും.
2. വിനാഗിരി ഉപയോഗിച്ച് വെള്ളത്തിന്റെ കറകൾ മാറ്റാം
ഏറ്റവും ഫലപ്രദമായ ഒരു സ്വാഭാവിക ക്ലീനറാണ് വിനാഗിരി. ബാത്റൂമിലെ പ്രതലങ്ങൾക്ക് കേടുപാടുകൾ വരുത്താതെ തന്നെ സോപ്പ് കറകളും വെള്ളത്തിന്റെ പാടുകളും അലിയിച്ചുകളയാൻ ഇതിന് സാധിക്കും. ടാപ്പുകൾ, ഷവർ, ഗ്ലാസ് ഡോറുകൾ, ടൈലുകൾ എന്നിവയിൽ വിനാഗിരി സ്പ്രേ ചെയ്ത് 10-15 മിനിറ്റ് വെക്കുക. (ശ്രദ്ധിക്കുക: മാർബിൾ, ഗ്രാനൈറ്റ് തുടങ്ങിയ പ്രകൃതിദത്ത കല്ലുകൾ കൊണ്ടുള്ള പ്രതലങ്ങളിൽ വിനാഗിരി ഉപയോഗിക്കരുത്).
3. സിങ്കും ടൈലുകളും വൃത്തിയാക്കാൻ ബേക്കിംഗ് സോഡ
കറകളും ദുർഗന്ധവും നീക്കം ചെയ്യാൻ മികച്ച ഒന്നാണ് ബേക്കിംഗ് സോഡ. സിങ്ക്, കൗണ്ടർടോപ്പുകൾ, ബാത്ത് ടബ്ബ്, ടൈലുകൾ എന്നിവയിൽ അല്പം ബേക്കിംഗ് സോഡ വിതറിയ ശേഷം നനഞ്ഞ സ്പോഞ്ചോ മൃദുവായ ബ്രഷോ ഉപയോഗിച്ച് തിരുമ്മുക. ബേക്കിംഗ് സോഡയിൽ അല്പം വെള്ളം ചേർത്ത് പേസ്റ്റ് രൂപത്തിലാക്കി കറയുള്ള ഭാഗങ്ങളിൽ പുരട്ടി ഏതാനും മിനിറ്റുകൾക്ക് ശേഷം കഴുകിക്കളയുന്നതും നല്ലതാണ്.
4. കണ്ണാടിയും ഗ്ലാസ് പ്രതലങ്ങളും വൃത്തിയാക്കാൻ
ബാത്റൂമിലെ കണ്ണാടിയിലും ഗ്ലാസുകളിലും വെള്ളത്തിന്റെ പാടുകളോ വിരലടയാളങ്ങളോ വീഴാൻ സാധ്യത കൂടുതലാണ്. ഇവ വൃത്തിയാക്കാൻ കെമിക്കലുകൾ ഒഴിവാക്കുക. സമം വെള്ളവും വിനാഗിരിയും കലർത്തിയ മിശ്രിതം ഗ്ലാസിൽ സ്പ്രേ ചെയ്യുക. ശേഷം നല്ല മൈക്രോഫൈബർ തുണിയോ പത്രക്കടലാസോ ഉപയോഗിച്ച് തുടയ്ക്കുക. വെള്ളത്തിന്റെ പാടുകൾ വീണ്ടും ഉണ്ടാകാതിരിക്കാൻ ഉടൻ തന്നെ ഉണങ്ങിയ തുണി കൊണ്ട് തുടച്ചെടുക്കണം.
5. ടോയ്ലറ്റ് സ്വാഭാവികമായി വൃത്തിയാക്കാം
ടോയ്ലറ്റ് ബൗൾ വൃത്തിയാക്കാൻ അതിലേക്ക് അല്പം ബേക്കിംഗ് സോഡ വിതറിയ ശേഷം കുറച്ച് വിനാഗിരി ഒഴിക്കുക. 10-15 മിനിറ്റ് ഇത് മാറ്റിവെച്ച ശേഷം ബ്രഷ് ഉപയോഗിച്ച് വൃത്തിയാക്കി ഫ്ലഷ് ചെയ്യുക. ഈ രീതി പതിവായി പിന്തുടർന്നാൽ കടുപ്പമേറിയ ടോയ്ലറ്റ് ക്ലീനറുകൾ ഉപയോഗിക്കേണ്ടി വരില്ല.
6. പൂപ്പൽ വരാതിരിക്കാൻ വായുസഞ്ചാരം ഉറപ്പാക്കുക
ബാത്റൂം വൃത്തിയായി സൂക്ഷിക്കാനുള്ള ഏറ്റവും നല്ല വഴി അവിടെ പൂപ്പൽ (Mold) ഉണ്ടാകുന്നത് തടയുകയാണ്. കുളിച്ചതിന് ശേഷം ബാത്റൂമിലെ ജനലുകൾ തുറന്നിടുകയോ എക്സോസ്റ്റ് ഫാൻ പ്രവർത്തിപ്പിക്കുകയോ ചെയ്യുക. ഇത് ഈർപ്പം കുറയ്ക്കാൻ സഹായിക്കും. ചുവരുകളിലെയും തറയിലെയും വെള്ളം വൈപ്പറോ ഉണങ്ങിയ തുണിയോ ഉപയോഗിച്ച് മാറ്റുക. നല്ല വായുസഞ്ചാരം ഉണ്ടാകുന്നത് ബാത്റൂം ഉണങ്ങിയിരിക്കാനും പൂപ്പൽ വരുന്നത് തടയാനും സഹായിക്കും.
7. ബാത്റൂമിൽ നല്ല സുഗന്ധം നിലനിർത്താം
ബാത്റൂം വൃത്തിയാക്കിയ ശേഷം അവിടെ നല്ലൊരു സുഗന്ധം നിലനിർത്തണം. ഇതിനായി ഒരു ചെറിയ പാത്രത്തിൽ ബേക്കിംഗ് സോഡ എടുത്തു വെച്ചാൽ അത് ദുർഗന്ധം വലിച്ചെടുത്തോളും. അല്ലെങ്കിൽ നാരങ്ങ, യൂക്കാലിപ്റ്റസ്, ലാവെൻഡർ തുടങ്ങിയ എസൻഷ്യൽ ഓയിലുകളുടെ ഏതാനും തുള്ളികൾ ഡിഫ്യൂസറിൽ ഉപയോഗിക്കാം. ജനലിനരികിലായി സ്പൈഡർ പ്ലാന്റോ പീസ് ലിലിയോ പോലുള്ള ചെടികൾ വളർത്തുന്നതും നല്ലതാണ്.
Click it and Unblock the Notifications
Sign in with Google