മധുര പലഹാരങ്ങൾ മാത്രമല്ല, നിങ്ങളുടെ പല്ലിന് ഈ ഭക്ഷണങ്ങളും വളരെ ദോഷകരമാണ്, അറിയാം

മധുര പലഹാരങ്ങൾ പല്ലിന് ദോഷകരമാണെന്ന് പൊതുവെ എല്ലാവർക്കും അറിയാം. എന്നാൽ ആരോഗ്യകരമെന്ന് കരുതുന്ന ചില ഭക്ഷണങ്ങളും ദന്താരോഗ്യത്തിന് ഹാനികരമാകാമെന്ന് പഠനങ്ങൾ പറയുന്നു. ഉണങ്ങിയ പഴങ്ങൾ, ക്രാക്കറുകൾ, ചിപ്‌സ്, ഫ്ലേവേർഡ് യോഗർട്ട്, കെച്ചപ്പ്, ബാർബിക്യൂ സോസ് തുടങ്ങിയവ അപ്രതീക്ഷിതമായി പല്ലിന് ദോഷമുണ്ടാക്കുന്നവയാണ്.

ഈ ഭക്ഷണങ്ങൾ ഉയർന്ന അളവിൽ പഞ്ചസാര അടങ്ങിയിരിക്കുകയോ അല്ലെങ്കിൽ വായിൽ വെച്ച് പഞ്ചസാരയായി മാറുകയും ചെയ്യാറുണ്ട്. ഇത് പല്ലിന് കേടുണ്ടാക്കുന്ന ബാക്ടീരിയകൾക്ക് വളരാൻ അനുകൂലമായ സാഹചര്യം ഒരുക്കുകയും ഇനാമലിനെ നശിപ്പിക്കുകയും ചെയ്യും.

പല്ലുകളുടെ ആരോഗ്യം സംരക്ഷിക്കാൻ ആളുകൾ സാധാരണയായി പഞ്ചസാരയുടെ ഉപയോഗം കുറയ്ക്കാറുണ്ട്. മധുര പലഹാരങ്ങളും കാർബണേറ്റഡ് പാനീയങ്ങളും ഈ പട്ടികയിൽ മുന്നിലാണ്. കാലിഫോർണിയ സർവകലാശാലയിൽ പരിശീലനം നേടിയ പീരിയോഡോണ്ടിസ്റ്റ്, ഡെന്റൽ ഇംപ്ലാന്റ് സ്പെഷ്യലിസ്റ്റ് എന്നീ നിലകളിൽ പ്രശസ്തനായ ഡോ. മൈൽസ് മാഡിസന്റെ അഭിപ്രായത്തിൽ, നിങ്ങൾ കഴിക്കുന്ന ഭക്ഷണം മാത്രമല്ല, അതിന്റെ ഗുണങ്ങളും പ്രധാനമാണ്. ഭക്ഷണത്തിന്റെ ഒട്ടിപ്പിടിക്കുന്ന സ്വഭാവം, പഞ്ചസാരയുടെ അളവ്, അസിഡിറ്റി, വായിൽ എത്രനേരം തങ്ങിനിൽക്കുന്നു എന്നതൊക്കെ പല്ലുകളുടെ ആരോഗ്യത്തിന് പ്രധാനമാണെന്നാണ് അദ്ദേഹം പറയുന്നത്.

മൊത്തത്തിലുള്ള ആരോഗ്യം മെച്ചപ്പെടുത്താൻ 'ആരോഗ്യകരമായ ലഘുഭക്ഷണങ്ങളിലേക്ക്' മാറിയിട്ടുണ്ടാവാം. എന്നാൽ നിങ്ങളുടെ ദന്താരോഗ്യത്തിന് ഉണങ്ങിയ പഴങ്ങൾ അത്ര നല്ലതല്ല. "ഇവ സ്വാഭാവികവും ആരോഗ്യകരവുമാണെന്ന് തോന്നാമെങ്കിലും, ഇവ വളരെ ഒട്ടിപ്പിടിക്കുന്നതും ഉയർന്ന അളവിൽ പഞ്ചസാര അടങ്ങിയതുമാണ്. ഇത് പല്ലുകളിൽ പറ്റിപ്പിടിച്ച് കേടുപാടുകൾ വരുത്തുന്ന ബാക്ടീരിയകളെ പ്രോത്സാഹിപ്പിക്കും," ഡോ. മാഡിസൺ പറയുന്നു. ലോകാരോഗ്യ സംഘടനയുടെ കണക്കനുസരിച്ച്, ആഗോളതലത്തിൽ ഏകദേശം 3.7 ബില്യൺ ആളുകൾ മോശം ദന്താരോഗ്യ പ്രശ്നങ്ങളാൽ വലയുന്നുണ്ട്.

നല്ലതെന്ന് കരുതുന്ന ശീലങ്ങളും ചിലപ്പോൾ വിപരീത ഫലങ്ങൾ നൽകാം. മധുരമുള്ള സ്നാക്സുകൾ മാത്രമാണ് പല്ലിന് ഹാനികരമെന്ന് കരുതുന്നുവെങ്കിൽ തെറ്റി. ഡോ. മാഡിസന്റെ അഭിപ്രായത്തിൽ, ക്രാക്കറുകൾ, ചിപ്‌സ്, പോലുള്ള ലഘുഭക്ഷണങ്ങളും ദന്താരോഗ്യത്തെ ദോഷകരമായി ബാധിക്കും. ഇവയിൽ ശുദ്ധീകരിച്ച അന്നജം കൂടുതലായതിനാൽ ചവയ്ക്കുമ്പോൾ എളുപ്പത്തിൽ ലളിതമായ പഞ്ചസാരയായി മാറുന്നു.

ഈ ഭക്ഷണാവശിഷ്ടങ്ങൾ പല്ലുകൾക്കിടയിൽ കുടുങ്ങി മണിക്കൂറുകളോളം കേടുണ്ടാക്കുന്ന ബാക്ടീരിയകൾക്ക് ആഹാരമാകാനും സാധ്യതയുണ്ടെന്ന് അദ്ദേഹം വിശദീകരിക്കുന്നു. 1993-ലെ ഒരു പഠനം കണ്ടെത്തിയത്, ചിപ്‌സ്, ചീസ് ഡൂഡിൽസ്, ക്രാക്കറുകൾ തുടങ്ങിയ ലഘുഭക്ഷണങ്ങൾ വായിൽ കൂടുതൽ നേരം തങ്ങിനിൽക്കുന്നതിനാൽ പ്ലാക്കിലെ പിഎച്ച് അളവിൽ വലിയതും ദീർഘകാലത്തേക്കുള്ളതുമായ കുറവ് വരുത്തുന്നതിന് കാരണമാകുന്നു എന്നാണ്. ഇത് പല്ലിന്റെ ഇനാമലിനെ അലിയിച്ചു കളയാൻ ബാക്ടീരിയകളെ സഹായിക്കുകയും ദന്തക്ഷയത്തിലേക്ക് നയിക്കുകയും ചെയ്യും.

ഐസ് കഷണങ്ങൾ ചവയ്ക്കുന്ന ശീലമുണ്ടെങ്കിൽ അത് നിർത്തേണ്ട സമയമാണിത്. ഐസ് ചവയ്ക്കുന്നത് ഇനാമലിന് കേടുപാടുകൾ വരുത്താൻ എളുപ്പവഴിയാണ്. "പലരും പാനീയം കുടിച്ചു കഴിയുമ്പോൾ ഐസ് ചവയ്ക്കുന്നത് ഞാൻ കണ്ടിട്ടുണ്ട്. ഇത് നിങ്ങളുടെ ഇനാമലിനെ ദുർബലപ്പെടുത്തുകയും പല്ലുകൾക്ക് പൊട്ടലുണ്ടാക്കുകയും ചെയ്യും," ദന്തരോഗ വിദഗ്ദ്ധൻ മുന്നറിയിപ്പ് നൽകുന്നു. .

'ക്ലീൻ ഈറ്റിംഗ്' യുഗത്തിൽ യോഗർട്ട് ജനപ്രിയമാണ്. പക്ഷെ ഫ്ലേവേർഡ് യോഗർടുകൾ നിങ്ങളുടെ ദന്താരോഗ്യത്തിന് അത്ര നല്ലതല്ല. വയറിന്റെ ആരോഗ്യത്തിനും ചിലപ്പോൾ വൻകുടലിലെ ക്യാൻസറിനെ തടയാനും യോഗർട്ടിന് കഴിവുണ്ടെങ്കിലും, പല ഫ്ലേവേർഡ് യോഗർട്ടുകളിലും ഒരു ഡെസർട്ടിലുള്ളത്രയും പഞ്ചസാര അടങ്ങിയിട്ടുണ്ട്. ഫ്ലേവേർഡ് യോഗർട്ടുകളിൽ പഞ്ചസാരയുടെ അളവ് കൂടുതലാണെന്നും നല്ല ദന്താരോഗ്യം നിലനിർത്താൻ ഇവ ഒഴിവാക്കുന്നതാണ് നല്ലതെന്നും ഡോ. മാഡിസൺ പറയുന്നു.

വിപണിയിൽ ലഭ്യമായ കെച്ചപ്പും ബാർബിക്യൂ സോസും ഏറ്റവും കൂടുതൽ പഞ്ചസാര ഒളിപ്പിച്ചു വെച്ചിരിക്കുന്നവയാണ്. ഇവ നമ്മുടെ വിഭവങ്ങൾക്ക് രുചി കൂട്ടുമെങ്കിലും, ഇവയിൽ പഞ്ചസാര ധാരാളമായി അടങ്ങിയിരിക്കുന്നു. "ഈ സോസുകൾ, പ്രത്യേകിച്ച് യു.എസിൽ, പഞ്ചസാര കൊണ്ട് നിറഞ്ഞവയാണ്. യു.എസിലെ ഒരു കെച്ചപ്പ് പാക്കറ്റിൽ ഒരു പഞ്ചസാര പാക്കറ്റിനേക്കാൾ കൂടുതൽ പഞ്ചസാരയുണ്ട്. അതുകൊണ്ട് ഇവ ഒഴിവാക്കുക," ഡോക്ടർ ഓർമ്മിപ്പിച്ചു.

ചിലപ്പോൾ ലളിതമായ മാറ്റങ്ങൾ വലിയ വ്യത്യാസങ്ങൾ ഉണ്ടാക്കും. ഈ സാഹചര്യത്തിൽ, ചില ഭക്ഷണങ്ങൾ ഒഴിവാക്കുന്നത് വളരെ പ്രയോജനകരമാണ്. "എന്താണ് കഴിക്കേണ്ടതെന്ന് ശ്രദ്ധാപൂർവ്വം തിരഞ്ഞെടുക്കാനും, അതുപോലെ എത്രമാത്രം പഞ്ചസാര കഴിക്കുന്നു എന്നതിനും പ്രത്യേക ശ്രദ്ധ നൽകാനും ഓർക്കുക," ദന്തരോഗ വിദഗ്ദ്ധൻ കൂട്ടിച്ചേർത്തു.

ശ്രദ്ധിക്കുക: ഈ ലേഖനത്തിൽ നൽകിയിട്ടുള്ള വിവരങ്ങൾ വിദ്യാഭ്യാസപരമായ ആവശ്യങ്ങൾക്ക് മാത്രമുള്ളതാണ്, ഇത് വൈദ്യോപദേശമായി കണക്കാക്കരുത്. ഏതെങ്കിലും പുതിയ മരുന്നോ ചികിത്സയോ ആരംഭിക്കുന്നതിനോ ഭക്ഷണക്രമത്തിലോ സപ്ലിമെന്റ് ക്രമീകരണത്തിലോ മാറ്റങ്ങൾ വരുത്തുന്നതിനോ മുമ്പായി എപ്പോഴും ഒരു യോഗ്യതയുള്ള ആരോഗ്യ വിദഗ്ദ്ധനെ സമീപിക്കുക.