അക്ഷയ തൃതീയ ദിവസം ഐശ്വര്യത്തിന് സ്വർണം തന്നെ വാങ്ങണമെന്നില്ല, ഈ 5 കാര്യങ്ങൾ വാങ്ങിയാലും മതി

വൈശാഖ മാസത്തിലെ ശുക്ലപക്ഷത്തിലെ മൂന്നാം തിഥിയിൽ വരുന്ന അക്ഷയ തൃതീയ മംഗളകരമായ ദിനമായാണ് കണക്കാക്കുന്നത്. എല്ലാ വർഷവും ഈ ദിവസം സ്വർണ്ണക്കടകളിൽ തിരക്കേറും. കാരണം അക്ഷയ തൃതീയ ദിവസം സ്വർണം വാങ്ങുന്നത് ഐശ്വര്യം കൊണ്ട് വരും എന്നാണ് വിശ്വാസം.

മറ്റ് അവസരങ്ങളിൽ നിന്ന് വ്യത്യസ്തമായി അക്ഷയതൃതീയക്ക് പ്രത്യേക മുഹൂർത്തം ആവശ്യമില്ല. നിക്ഷേപങ്ങൾക്കും പുതിയ തുടക്കങ്ങൾക്കും ഇത് ഉചിതമായ ദിവസമാണ്. ഈ ദിനം തുടങ്ങുന്ന കാര്യങ്ങൾ വളർന്ന് വലിയ നേട്ടങ്ങൾ നൽകുമെന്നും വിശ്വാസമുണ്ട്.

അക്ഷയ ത്രിതീയ ദിവസം എല്ലാവരും സ്വർണം വാങ്ങാനാണ് ആഗ്രഹിക്കുന്നത്. അന്നേ ദിവസം ജ്വല്ലറികൾ വലിയ ഓഫറുകളൊരുക്കുക പതിവാണ്. ഇത്തവണ പവൻ വില ലക്ഷം കടന്ന സാഹചര്യത്തിൽ സ്വർണം വാങ്ങുക എല്ലാവരെക്കൊണ്ടും നടക്കുന്ന കാര്യമല്ല. സ്വർണം മാത്രമല്ല ഐശ്വര്യത്തിനായി അക്ഷയ ത്രിതീയ ദിവസം വാങ്ങാവുന്നത്. മറ്റെന്തൊക്കെ വാങ്ങാമെന്ന് നോക്കാം:

സ്വർണ്ണത്തിന് അടുത്ത ബദൽ വെള്ളിയാണ്. വിലയിലും സാംസ്കാരിക മൂല്യത്തിലും ഇത് പ്രധാനമാണ്. വെള്ളി നാണയങ്ങൾ, ആഭരണങ്ങൾ, പാത്രങ്ങൾ എന്നിവ വാങ്ങുന്നത് വിശുദ്ധിയും സമ്പത്തും സൂചിപ്പിക്കുന്നു. ലഭ്യമായതിനാലും മതപരമായ പ്രാധാന്യത്താലും പല വീടുകളും വെള്ളിക്ക് മുൻഗണന നൽകുന്നു.

ഭൂമി, വീടുകൾ, വ്യാപാര സ്ഥാപനങ്ങൾ എന്നിവയിലെ നിക്ഷേപം അക്ഷയ തൃതീയ ദിവസം നടത്തിയാൽ ഐശ്വര്യം തേടിവരും. സ്ഥിരതയുടെയും തലമുറകളായുള്ള സമ്പത്തിന്റെയും അടയാളമായി ഇവയെ കണക്കാക്കുന്നു. വലിയ സാമ്പത്തിക ഇടപാടുകൾക്ക് ഈ ദിനം അനുയോജ്യമെന്ന് പലരും വിശ്വസിക്കുന്നു.

അക്ഷയ ത്രിതീയ ദിനത്തിൽ ഒരു കാറോ ഇരുചക്രവാഹനങ്ങളോ വാങ്ങുന്നത് മുന്നോട്ടുള്ള പ്രയാണവുമായും വളർച്ചയുമായും ബന്ധിപ്പിക്കുന്നു. പല കുടുംബങ്ങൾക്കും ഇത് വെറുമൊരു വാങ്ങലല്ല, മികച്ച അവസരങ്ങളിലേക്കും സൗകര്യങ്ങളിലേക്കുമുള്ള നാഴികക്കല്ലാണിത്.

മ്യൂച്വൽ ഫണ്ടുകൾ, ഫിക്സഡ് ഡെപ്പോസിറ്റുകൾ, സിസ്റ്റമാറ്റിക് ഇൻവെസ്റ്റ്‌മെന്റ് പ്ലാനുകൾ (SIP) പോലുള്ള ആധുനിക സാമ്പത്തിക നിക്ഷേപങ്ങൾ വർദ്ധിച്ചുവരുന്നു. നിലനിൽക്കുന്ന സമ്പത്ത് സൃഷ്ടിക്കുക എന്ന ആശയത്തിന് ഊന്നൽ നൽകുന്ന ഇവ, യുവ നിക്ഷേപകർക്കിടയിൽ പ്രസക്തിയേറുന്നു. ഇവ തുടങ്ങാനും അക്ഷയ ത്രിതീയ ദിനം തിരഞ്ഞെടുക്കാം.

അക്ഷയ ത്രിതീയ ദിവസത്തിൽ പുസ്തകങ്ങൾ, പഠന സാമഗ്രികൾ വാങ്ങുന്നതിനും കോഴ്സുകൾക്ക് ചേരുന്നതും അർത്ഥവത്തായ മറ്റൊരു മാർഗ്ഗമാണ്. അറിവിനെ ഏറ്റവും വലിയ സമ്പത്തായി പല പാരമ്പര്യങ്ങളിലും കണക്കാക്കുന്നു. ഇത് തുടർച്ചയായ വളർച്ച എന്ന അക്ഷയ ത്രിതീയയുടെ ആശയവുമായി പൂർണ്ണമായും യോജിക്കുന്നു.

അടിസ്ഥാനപരമായി അക്ഷയ തൃതീയയുടെ പ്രാധാന്യം എത്ര ചെലവഴിച്ചു എന്നതിലല്ല, എന്തു തുടങ്ങി എന്നതിലാണ്. സാമ്പത്തിക നിക്ഷേപമായാലും വ്യക്തിഗത ലക്ഷ്യമായാലും പ്രതീകാത്മക വാങ്ങലായാലും, ദീർഘകാലാടിസ്ഥാനത്തിൽ വളർച്ചയും സ്ഥിരതയും നൽകുന്ന തീരുമാനങ്ങളെ ഈ ദിനം പ്രോത്സാഹിപ്പിക്കുന്നു.