ജീവിതം നശിപ്പിക്കുന്ന ഈ വില്ലനെ പത്തുവർഷം മുൻപേ തിരിച്ചറിയാം; ലക്ഷണങ്ങൾ ഇവയാണ്

മസ്തിഷ്കത്തെ ബാധിക്കുന്ന ഗൗരവകരമായ ഒരു നാഡീരോഗമാണ്(Parkinsons Disease) പാർക്കിൻസൺസ്. ലോകമെമ്പാടും ദശലക്ഷക്കണക്കിന് ആളുകളെ ബാധിക്കുന്ന ഈ അസുഖം പലപ്പോഴും വൈകിയാണ് തിരിച്ചറിയപ്പെടാറുള്ളത്. സാധാരണയായി വിറയലും ചലനത്തിലെ വേഗതക്കുറവുമാണ് ഈ രോഗത്തിന്റെ ലക്ഷണങ്ങളായി കരുതപ്പെടുന്നത്. എന്നാൽ പ്രധാന ലക്ഷണങ്ങൾ പ്രകടമാകുന്നതിന് പത്തോ ഇരുപതോ വർഷം മുൻപേ ശരീരം ചില സൂചനകൾ നൽകുമെന്നാണ് പഠനങ്ങൾ വ്യക്തമാക്കുന്നത്.

ശ്രദ്ധിക്കേണ്ട ആദ്യകാല ലക്ഷണങ്ങൾ

ഗന്ധം തിരിച്ചറിയാനുള്ള ശേഷി കുറയുക: പാർക്കിൻസൺസ് ബാധിച്ച 90 ശതമാനം പേർക്കും ഗന്ധമറിയാനുള്ള കഴിവ് കുറഞ്ഞതായി കാണപ്പെടുന്നു. സുഗന്ധവ്യഞ്ജനങ്ങളുടേയോ പൂക്കളുടേയോ ഗന്ധം തിരിച്ചറിയാൻ കഴിയാതെ വരുന്നത് രോഗത്തിന്റെ ആദ്യ സൂചനയാകാം. ഇത് പലപ്പോഴും അലർജിയോ സൈനസ് പ്രശ്നമോ ആയി തെറ്റിദ്ധരിക്കപ്പെടാറുണ്ട്.

ഉറക്കത്തിലെ അസ്വാഭാവികതകൾ: ഉറക്കത്തിൽ അമിതമായി സംസാരിക്കുക, കൈകാലുകൾ അടിക്കുക, പേടിസ്വപ്നങ്ങൾ കണ്ട് എഴുന്നേൽക്കുക (REM Sleep Behavior Disorder) എന്നിവ പാർക്കിൻസൺസിന്റെ മുന്നോടിയാകാം.

മലബന്ധം: ദഹനപ്രക്രിയയിലുണ്ടാകുന്ന മാറ്റങ്ങളും വിട്ടുമാറാത്ത മലബന്ധവും പാർക്കിൻസൺസ് സാധ്യതയിലേക്ക് വിരൽ ചൂണ്ടുന്നു. മസ്തിഷ്കത്തിന് മുൻപേ കുടലിലാകാം രോഗം ആരംഭിക്കുന്നതെന്ന പുതിയ പഠനങ്ങളും ഇതിന് അടിവരയിടുന്നു.

മുഖഭാവങ്ങളിലെ മാറ്റം: വൈകാരികമായ മാറ്റങ്ങൾ ഇല്ലെങ്കിലും മുഖത്ത് എപ്പോഴും ഗൗരവഭാവം നിലനിൽക്കുക (Parkinson's Mask), കണ്ണ് ചിമ്മുന്നതിന്റെ അളവ് കുറയുക എന്നിവ ശ്രദ്ധിക്കേണ്ടതാണ്.

എഴുത്തിലെ മാറ്റങ്ങൾ: അക്ഷരങ്ങൾ പെട്ടെന്ന് ചെറുതായി വരികയും വരികൾക്കിടയിലെ അകലം കുറയുകയും ചെയ്യുന്നത് (Micrographia) രോഗലക്ഷണമാണ്.

ശബ്ദത്തിലെ മാറ്റം: സംസാരത്തിലെ വ്യക്തത കുറയുകയും ശബ്ദം പതുക്കെയാവുകയും ചെയ്യുന്നത് തുടക്കകാലത്ത് കാണപ്പെടുന്ന ലക്ഷണമാണ്.

രോഗകാരണം

മസ്തിഷ്കത്തിലെ 'സബ്സ്റ്റൻഷ്യ നിഗ്ര' എന്ന ഭാഗത്തെ നാഡീകോശങ്ങൾ നശിക്കുകയും ചലനത്തെ നിയന്ത്രിക്കുന്ന 'ഡോപ്പമിൻ' എന്ന രാസപദാർത്ഥത്തിന്റെ അളവ് കുറയുകയും ചെയ്യുന്നതാണ് രോഗത്തിന് കാരണം. 80 ശതമാനം ഡോപ്പമിനും ഇല്ലാതാകുമ്പോഴാണ് വിറയൽ പോലുള്ള പ്രധാന ലക്ഷണങ്ങൾ പുറത്തുവരുന്നത്.

പാർക്കിൻസൺസ് പൂർണ്ണമായും ഭേദമാക്കാൻ നിലവിൽ മരുന്നുകളില്ല. എന്നാൽ തുടക്കത്തിലേ തിരിച്ചറിഞ്ഞാൽ കൃത്യമായ വ്യായാമത്തിലൂടെയും മരുന്നുകളിലൂടെയും രോഗം മൂർച്ഛിക്കുന്നത് തടയാനും ജീവിതനിലവാരം മെച്ചപ്പെടുത്താനും സാധിക്കും.