'കഴിഞ്ഞത് കഴിഞ്ഞു, പഴയത് പറഞ്ഞ് വേദനിപ്പിക്കുന്നത് ചീപ്പാണേ..'; അറിയാം നല്ല ബന്ധത്തിന് വേണ്ട കാര്യങ്ങള്
ഏതൊരു ബന്ധത്തിന്റേയും അടിസ്ഥാനശില എന്ന് പറയുന്നത് പരസ്പര വിശ്വാസമാണ്. പലബന്ധങ്ങളും തകരുന്നതിന് കാരണമാകുന്നത് വിശ്വാസത്തില് വരുന്ന പാളിച്ചകളാണ്. ബന്ധങ്ങളിലെ തെറ്റിദ്ധാരണകള് പങ്കാളികള് തമ്മിലുള്ള സംഘര്ഷം, അവിശ്വാസം, വൈകാരിക അകലം എന്നിവയിലേക്ക് നയിച്ചേക്കാം. വിവാഹമോചനം നേടിയവരില് പലരും സമ്മതിക്കുന്ന കാര്യം നിസാരമായ കാര്യങ്ങള് വലിയ പ്രശ്നങ്ങളിലേക്ക് നയിച്ചേക്കാമെന്നാണ്.
അത് കൃത്യമായി അഭിസംബോധന ചെയ്തില്ലെങ്കില് ബന്ധങ്ങള് വിഷലിപ്തമാവുകയും ദുരന്തപര്യവസായിയായി അവസാനിക്കുകയും ചെയ്യും. ശക്തവും വിജയകരവുമായ ഒരു ബന്ധം കെട്ടിപ്പടുക്കുന്നതിന് ചില കാര്യങ്ങള് ശ്രദ്ധിക്കേണ്ടതുണ്ട്. എല്ലാ ബന്ധങ്ങളിലും ഉണ്ടാകുന്ന പൊതുവായ ചില തെറ്റിദ്ധാരണകള് എന്തൊക്കെയാണ് എന്ന് നോക്കാം.
കൃത്യമായ ആശയവിനിമയം കൂടാതെ നിങ്ങള്ക്ക് എന്താണ് വേണ്ടതെന്ന് നിങ്ങളുടെ പങ്കാളി അറിയണമെന്ന് കരുതുന്നതാണ് ബന്ധങ്ങളിലെ ഏറ്റവും വലിയ അപകടങ്ങളിലൊന്ന്. എപ്പോഴും അവര്ക്ക് മനസ് വായിക്കാന് കഴിയണം എന്ന് ശഠിക്കരുത്. പകരം സുതാര്യവും സത്യസന്ധവുമായ ആശയവിനിമയം പരിശീലിക്കണം. നിങ്ങളുടെ വികാരങ്ങള്, ആഗ്രഹങ്ങള്, ആശങ്കകള് എന്നിവ വ്യക്തമായി പ്രകടിപ്പിക്കണം.
സംഘര്ഷം ഒഴിവാക്കുകയും എല്ലാം ശരിയാണെന്ന് നടിക്കുകയും ചെയ്യുന്നത് താല്ക്കാലികമായി സമാധാനം നിലനിര്ത്താന് സഹായിക്കും. എന്നാല് ഇത് ദീര്ഘകാലാടിസ്ഥാനത്തില് നീരസത്തിനും പരിഹരിക്കപ്പെടാത്ത പ്രശ്നങ്ങള്ക്കും ഇടയാക്കാനും സാധ്യതയുണ്ട്. പ്രശ്നങ്ങള് ഉണ്ടാകുമ്പോള് ക്രിയാത്മക ചര്ച്ചകളില് ഏര്പ്പെട്ട് അവ പരിഹരിക്കുക. ഒരുമിച്ച് പരിഹാരങ്ങള് കണ്ടെത്താന് ശ്രമിക്കുക.
കൃത്യമായി അറിവില്ലാത്ത ഒരു കാര്യത്തിലും സ്വയം നിഗമനങ്ങളില് എത്തിച്ചേരുന്നത് നല്ലതല്ല. അതിന് പകരം അവരുടെ ഉദ്ദേശ്യങ്ങളെക്കുറിച്ച് നിങ്ങള്ക്ക് അനിശ്ചിതത്വം തോന്നുന്ന ഘട്ടത്തില് തന്നെ വിശദീകരണം ചോദിക്കുക. ഇത് അനാവശ്യ സംഘര്ഷങ്ങള് തടയുകയും ബന്ധത്തിലുള്ള വിശ്വാസം ശക്തിപ്പെടുത്തുകയും ചെയ്യും. ചിലപ്പോള് സ്വന്തം ആവശ്യങ്ങളെയും ആഗ്രഹങ്ങളെയും അവഗണിക്കുന്ന തരത്തില് ചിലര് ബന്ധത്തില് മുഴുകാറുണ്ട്.
ഇത് ആരോഗ്യകരമായ രീതിയില്ല. വ്യക്തിപരമായ ആഗ്രഹ പൂര്ത്തീകരണവും ബന്ധവും തമ്മില് സന്തുലിതാവസ്ഥ നിലനിര്ത്തേണ്ടത് അത്യാവശ്യമാണ്. വ്യക്തിപരമായ താല്പ്പര്യങ്ങള് പിന്തുടരുകയും രണ്ട് പങ്കാളികള്ക്കും വ്യക്തിഗതമായി വളരാന് ഇടമുണ്ടെന്ന് ഉറപ്പാക്കുകയും ചെയ്യുകയാണ് വേണ്ടത്. ഭൂതകാലത്തിലെ പ്രശ്നങ്ങൡ തന്നെ മുറുകെ പിടിക്കുന്നത് നല്ല ബന്ധത്തിന്റെ ലക്ഷണമല്ല.
തര്ക്കങ്ങലും വാദങ്ങളും ഉണ്ടാകുന്നത് സ്വാഭാവികമാണെങ്കിലും ക്ഷമിക്കാന് പഠിക്കുന്നത് ജീവിതത്തിലെ മുന്നോട്ട് പോക്കില് വളരെ പ്രധാനമാണ്. മുന്കാല പ്രശ്നങ്ങള് അപ്പോപ്പോള് പരിഹരിക്കുക. അഭിപ്രായവ്യത്യാസമുണ്ടാകുമ്പോള് നിങ്ങളുടെ പങ്കാളിയെ വേദനിപ്പിക്കാന് പഴയ കാര്യങ്ങള് പറഞ്ഞ് വേദനിപ്പിക്കാതിരിക്കുക. പകരം പ്രശ്നം പരിഹരിക്കുന്നതില് ശ്രദ്ധ കേന്ദ്രീകരിക്കുക.
Click it and Unblock the Notifications
Sign in with Google