കരീന കപൂറിന്റെ മുഖം ഇത്രയും തിളങ്ങുന്നതെങ്ങനെ? രഹസ്യം വെളിപ്പെടുത്തി നടിയുടെ ഡയറ്റീഷ്യൻ

By Desk

Updated: Tuesday, January 13, 2026, 20:23 [IST]

തിളക്കമുള്ള ചർമ്മത്തിന് അസംഖ്യം ഉൽപ്പന്നങ്ങൾ ആവശ്യമില്ലെന്ന് പറയുന്നത് മറ്റാരുമല്ല, ബോളിവുഡ് സൂപ്പർതാരം കരീന കപൂറിന്‍റെ ഡയറ്റീഷ്യനായ സെലിബ്രിറ്റി പോഷകാഹാര വിദഗ്ധ രൂജുത ദിവേക്കർ ആണ്. ലളിതവും ചെലവു കുറഞ്ഞതുമായ നാല് ശീലങ്ങൾക്കാണ് അവർ ഊന്നൽ നൽകുന്നത്: ആവശ്യത്തിന് വെള്ളം കുടിക്കുക, നേരത്തെ ഉറങ്ങാൻ ശ്രമിക്കുക, പതിവായി വ്യായാമം ചെയ്യുക, വൈറൽ സ്കിൻകെയർ ട്രെൻഡുകൾ ഒഴിവാക്കുക എന്നിവയാണവ. വിലയേറിയ ചർമ്മസംരക്ഷണ രീതികളെക്കാൾ സ്ഥിരമായ ആരോഗ്യകരമായ ജീവിതശൈലിയാണ് തിളക്കമുള്ള ചർമ്മത്തിന് ഫലപ്രദമെന്ന് ദിവേക്കർ ഉറപ്പിച്ചു പറയുന്നു.

സങ്കീർണ്ണമായ ചർമ്മസംരക്ഷണ രീതികളും ഉൽപ്പന്നങ്ങളും പലർക്കും മടുപ്പുണ്ടാക്കാം. സാമൂഹിക മാധ്യമങ്ങളിലൂടെ അമിതമായി ഉൽപ്പന്നങ്ങൾ അടിച്ചേൽപ്പിക്കപ്പെടുമ്പോൾ, കരീന കപൂറിന്റെ പോഷകാഹാര വിദഗ്ധയായ രൂജുത ദിവേക്കറുടെ അഭിപ്രായം വ്യത്യസ്തമാണ്. തിളക്കമുള്ള ചർമ്മം പത്ത് സൗന്ദര്യവർദ്ധക ഉൽപ്പന്നങ്ങളിൽ നിന്നല്ല, ലളിതമായ ചില ശീലങ്ങളിൽ നിന്നാണ് ലഭിക്കുന്നതെന്ന് അവർ ചൂണ്ടിക്കാട്ടുന്നു.

അടുത്തിടെ ഒരു ഇൻസ്റ്റാഗ്രാം വീഡിയോയിലൂടെ രൂജുത തന്റെ വ്യക്തിപരമായ ചർമ്മസംരക്ഷണ രീതി പങ്കുവെച്ചിരുന്നു. വീട്ടിൽ എളുപ്പത്തിൽ, ചെലവില്ലാതെ ചെയ്യാവുന്ന നാല് അടിസ്ഥാനപരമായ കാര്യങ്ങളാണവ. താൻ പിന്തുടരുന്ന എല്ലാ ശീലങ്ങളും എളുപ്പവും ചെലവ് കുറഞ്ഞതും, മിക്ക വീടുകളിലും ലഭ്യമായതുമാണെന്നും അവർ വ്യക്തമാക്കി.

ദിവസം മുഴുവൻ ശരീരത്തിൽ ജലാംശം നിലനിർത്തുക എന്നതാണ് രൂജുതയുടെ പ്രധാന നിയമങ്ങളിലൊന്ന്. വെള്ളം ഏറ്റവും ലളിതമായ 'ഗ്ലോ-അപ്പ്' ഉപാധിയാണെന്ന് അവർ പറയുന്നു. ഇത് ചർമ്മത്തെ മൃദുവും വ്യക്തവും ആരോഗ്യമുള്ളതുമാക്കാൻ സഹായകമാണ്, മങ്ങിയ ചർമ്മം ഒഴിവാക്കാനുമാകും.

നേരത്തെ ഉറങ്ങുക എന്നതാണ് രൂജുതയുടെ മറ്റൊരു പ്രധാന ശീലം. വിലകൂടിയ രാത്രികാല മാസ്കുകളേക്കാൾ ഗുണങ്ങൾ ഇത് ചർമ്മത്തിന് നൽകുന്നു. ശരീരത്തിൻ്റെ കേടുപാടുകൾ തീർക്കാനും കൊളാജൻ ഉത്പാദനം കൂട്ടാനും കണ്ണിനടിയിലെ കറുപ്പും വീക്കവും തടയാനും ഗുണമേന്മയുള്ള ഉറക്കം സഹായിക്കും. രാത്രി 9:30-നും 10 മണിക്കും ഇടയിൽ ഉറങ്ങാൻ അവർ ശ്രദ്ധിക്കാറുണ്ട്.

ശാരീരിക പ്രവർത്തനങ്ങളാണ് മറ്റൊരു പ്രധാന സൗന്ദര്യരഹസ്യമാണെന്ന് രൂജുത പറയുന്നു. വ്യായാമം രക്തയോട്ടം വർദ്ധിപ്പിച്ച്, ക്രീമില്ലാതെ തന്നെ ചർമ്മത്തിന് സ്വാഭാവിക തിളക്കം നൽകുന്നു. എത്ര തിരക്കാണെങ്കിലും രാവിലെ 9 മണിക്ക് മുൻപ് വ്യായാമം പൂർത്തിയാക്കാൻ അവർ പ്രത്യേകം ശ്രദ്ധിക്കാറുണ്ട്.

വൈറൽ 'അത്ഭുത' ചർമ്മസംരക്ഷണ വീഡിയോകൾ രൂജുത പൂർണ്ണമായും ഒഴിവാക്കുന്നു. തൽക്ഷണ ആന്റി-ഏജിംഗ്, ദശാബ്ദങ്ങൾ ചെറുപ്പമാക്കുമെന്നുള്ള വാഗ്ദാനങ്ങളിൽ അവർക്ക് താൽപ്പര്യമില്ല. ക്ഷണികമായ പരിഹാരങ്ങളെക്കാൾ ദീർഘകാല ശീലങ്ങൾക്കാണ് എപ്പോഴും മുൻഗണനയെന്ന് അവർ ഊന്നിപ്പറയുന്നു.

രൂജുതയുടെ സന്ദേശം ലളിതവും ശക്തവുമാണ്: നല്ല ചർമ്മത്തിന് ഉൽപ്പന്നങ്ങളെക്കാൾ ജീവിതശൈലിയാണ് പ്രധാനം. ശരീരത്തെ പരിപാലിക്കുക, നന്നായി ഉറങ്ങുക, സജീവമായിരിക്കുക, ആവശ്യത്തിന് വെള്ളം കുടിക്കുക. ഈ ശീലങ്ങളിലൂടെ ചർമ്മത്തിൽ അതിന്റെ മാറ്റങ്ങൾ പ്രകടമാകും. തിളക്കമുള്ള ചർമ്മത്തിന് പണം മുടക്കേണ്ടതില്ലെന്ന് ഇത് നമ്മെ ഓർമ്മിപ്പിക്കുന്നു.